قوعامدا لاتىنعا كوشۋ تۋرالى قوزعالىس باستالعالى بەرى ۇسىنىلعان ونداعان جوبالاردان باستاپ, كەشەگى 19 اقپان كۇنى ەلباسى جارلىعىمەن بەكىتىلگەن نۇسقاعا دەيىنگى بارلىق جوبالاردى مۇمكىندىگىنشە قاداعالاپ, تانىسىپ وتىرۋعا تىرىستىم. 32 دىبىستى تاڭبالاعان 32 ءارىپ جالپى العاندا, كوڭىلىمنەن شىقتى. ەڭ العاشقى ۇلتتىق ءالىپبيىمىزدىڭ اۆتورى احمەت بايتۇرسىن ۇلىنىڭ توتە جازۋعا نەگىزدەلگەن الىپبيىمەن جاس كۇنىمنەن جاقسى تانىس ەدىم. ءتىل بىلگىرى تۇزگەن 29 ءارىپ پەن ءتول دىبىستارىمىزدى ايقىندايتىن دايەكشە بارىمىزگە بەلگىلى. سونداعى ء«ا», ء«و» سەكىلدى ءتول دىبىستارىمىزدى كەسكىندەگەن دايەكشە مەنىڭ كوڭىلىمە الابوتەن جاقىن ەدى جانە جوبالاردى تالقىلاۋ ءجۇرىپ جاتقان كەزدە «شىركىن-اي, سول دايەكشەلەردى نەگە قولدانىسقا ەنگىزىپ, قابىلداماسقا» دەگەن پىكىرىمدى ءار جەردە ايتىپ تا ءجۇردىم. سوڭعى بەكىتىلگەن وزگەرىستە ەڭ الدىمەن سول دايەكشەلەر كوزىمە وتتاي باسىلدى. لاتىن گرافيكاسىنا نەگىزدەلگەن قازاق ءالىپبيى قولايلى كورىندى, سونىسىمەن بارىمىزگە ۇنادى جانە وسى نۇسقانى تولىق قولدايمىن. بىراق الەمدىك قوعامداستىقتا جەكە-دارا ەمەس, وزگە شەت مەملەكەتتەرمەن دە وتە تىعىز بايلانىسىپ, ءومىر ءسۇرىپ جاتقاندىقتان, بۇل ءالىپبيدى ءالى دە جەتىلدىرە ءتۇسۋ كەرەك دەپ ويلايمىن. مىسالى, ء«بىر دىبىس – ءبىر تاڭبا» جۇيەسى بويىنشا بارلىق ارىپتەر ءبىر تاڭبامەن, دايەكشەلەردىڭ كومەگىمەن تاڭبالانىپ كەلەدى دە, «ش» مەن «چ»-عا كەلگەندە بۇل قاعيدات بۇزىلىپ, ەكى ءارىپتى ديگرافتىق تاسىلمەن قوساقتاپ قويعانى كوڭىلىمنەن شىقپادى. بۇل شەشىمنىڭ نەگىزگى دىبىستى جەتكىزۋدە ءدال, ناقتى ەمەس ەكەنى ءوز الدىنا, جۇرتتى شاتاستىرۋعا الىپ باراتىنى انىق. سوندىقتان بۇل تۇپكىلىكتى شەشىم بولماۋى ءتيىس, ءالى دە بىلىكتى ءتىل ماماندارىنىڭ كاسىبي ۇسىنىستارىنا قۇلاق اسىپ, مەملەكەتشىلدىك مۇددە تۇرعىسىنان قاراپ, كەڭ اۋقىمدا كەڭەسىپ, ويلاستىرۋدى قاجەت ەتەدى.
ەڭ باستىسى, بۇل ءالىپبي جاڭا تەحنولوگيالاردىڭ ءتىلىن مەڭگەرۋ جولىندا جۇمىس ىستەيتىن تەحنيكا سالاسىنداعى مامانداردىڭ كەلەشەگىنە داڭعىل جول اشىپ بەرەتىن بولادى. تەحنيكاعا بايلانىستى عىلىمي ەڭبەكتەر, ماقالالار, كۇندەلىكتى اقپاراتتار لاتىن گرافيكاسى ارقىلى تارايدى. كيريلليتسادا جۇرگەن كەزدىڭ وزىندە-اق وزگە سالاداعى ارىپتەستەرىندەي ەمەس, تەحنيكا جاعىندا جۇرگەن ماماندارعا لاتىن قارپىمەن تىكەلەي بەتپە-بەت كەلىپ, جۇمىس ىستەۋگە تۋرا كەلەتىن جاعداي ءجيى تۋىندايتىن. قاجەتتىلىك بۇرىننان بار ەدى, بىراق ول كەزدە مۇمكىندىك بولمادى. سول سەبەپتى بۇل قادام بىزگە كوپ جەڭىلدىكتەر تۋعىزىپ وتىر. بۇل بارشا قازاقستاندىقتاردىڭ الەمدىك اقپاراتتىق كەڭىستىكتە ەمىن-ەركىن ءجۇزىپ, جۇمىسىنىڭ ساپاسى جاقسارۋىنا, جاڭا تەحنولوگياعا تاڭىرىدەي تابىنىپ وتىرعان وركەنيەت كوشىنەن قالماۋعا كەڭ-مول مۇمكىندىك تۋعىزعان ماڭىزدى قادام بولۋىمەن قۋانتادى.
ۇلىقپان سىدىقوۆ,
قازاقستاننىڭ ەڭبەك سىڭىرگەن قايراتكەرى
الماتى
