وسىدان التى جىل بۇرىن ەلباسى ن.ءا.نازارباەۆ «قازاقستان-2050» ستراتەگياسىندا ء«بىز 2025 جىلدان باستاپ ءالىپبيىمىزدى لاتىن قارپىنە, لاتىن الىپبيىنە كوشىرۋگە كىرىسۋىمىز كەرەك», دەگەن بولاتىن. مەملەكەت باسشىسىنىڭ بۇل ساياسي شەشىمى وتكەن جىلعى «بولاشاققا باعدار: رۋحاني جاڭعىرۋ» باعدارلامالىق ماقالاسىندا دا كورىنىس تاپقان بولاتىن. ناتيجەسىندە, وتكەن جىلى «قازاق ءتىلى ءالىپبيىن كيريلليتسادان لاتىن گرافيكاسىنا كوشىرۋ تۋرالى» قازاقستان رەسپۋبليكاسى پرەزيدەنتىنىڭ №569 جارلىعى شىقتى.
ءالىپبيدىڭ اپوستروفتار قولدانىلاتىن سول كەزدەگى نۇسقاسى حالىق پەن ساراپشىلار اراسىندا كوپتەگەن پىكىرتالاس تۋعىزدى. مۇنىڭ بارلىعىن ەسكەرگەن ەلباسى اتالمىش جارلىققا وزگەرىستەر ەنگىزدى. بۇل ەلىمىزدەگى ءالىپبي رەفورماسى باعىتىنىڭ كورسەتكىشى دەپ ويلايمىز. ويتكەنى قوعامدىق پىكىر ارقىلى ءتىل ساياساتىنداعى رەفورمانى بۇكىلحالىقتىق دەڭگەيدە جۇرگىزۋ جاقسىلىقتىڭ نىشانى. سالا ماماندارى مەن بەلسەندى ازاماتتاردىڭ قاتىسۋىمەن ءوتىپ جاتقان پىكىرتالاس ماڭىزدى شەشىمنىڭ بەلگىسىن كورسەتەدى.
تاريحتان بەلگىلى قازاقستان وتكەن عاسىردا ءۇش رەت ءالىپبي اۋىستىردى. 1929 جىلعا دەيىن ارابشا, 1929-1940 جىلدار ارالىعىندا لاتىنشا, 1940 جىلدان كەيىن كيريلليتسانى پايدالاندى. دەمەك, ەلىمىزدە بۇرىن ون جىلدان استام ۋاقىت كولەمىندە لاتىن گرافيكاسىن قولدانۋ بويىنشا تاجىريبە بولدى. كەڭەستەر ەلىنىڭ يدەولوگيالىق ساياساتىنا بايلانىستى ەلىمىز كيريلليتساعا كوشۋگە ءماجبۇر بولدى. سوندىقتان ەلىمىز وسى ماڭىزدى شارا بارىسىندا ءساتتى قادامىن جاسايدى دەپ ويلايمىز. سەبەبى ەلىمىزدىڭ لاتىن الىپبيىنە كوشۋى قازاق رۋحىنىڭ, انا ءتىلىمىزدىڭ جاڭعىرۋىنىڭ باستاۋى بولماق.
بوتاگوز پاريدينوۆا,
فيلوسوفيا ماگيسترى
قىزىلوردا
