ءۇشىنشى مىڭجىلدىقتا قوعام مەن مەملەكەتتىڭ ورنىقتى دامۋىنىڭ ەڭ باستى العىشارتى ساپالى بەرىلگەن ءبىلىم ەكەندىگى دالەلدەندى. ءبىز ء«بىلىم – عىلىم – يننوۆاتسيالار» ۇشتىگىنە نەگىزدەلگەن پوستيندۋستريالىق الەمگە قاراي قادام باسىپ كەلەمىز. جاھاندانۋ جاڭا تالاپتار مەن تىڭ باستامالاردى تالاپ ەتەدى. عالامدىق دامۋدىڭ جاڭا كەزەڭىندە لاتىن گرافيكاسىنا كوشۋ ماسەلەسى قاجەتتىلىك قانا ەمەس, ءتىلىمىزدىڭ تاريحي ەرەكشەلىگىن ساقتاۋ ارقىلى الەمدىك ينتەگراتسيا, اقپارات الۋ مۇمكىندىگىمىزدىڭ ارتۋىنا نەگىز بولىپ تابىلادى. سونىمەن قاتار لاتىن گرافيكاسىنا كوشۋ تىلىمىزدەگى جات دىبىستاردى تاڭبالايتىن ارىپتەردى قىسقارتىپ, سول ارقىلى ونىڭ تابيعي تازا قالپىن ساقتاۋعا مۇمكىندىك بەرەدى. لاتىن ءارىپى ءۇش تىلدە وقىتۋدى دامىتۋعا دا سەپتىگىن تيگىزبەك. مۇنداي قادام ءوز كەزەگىندە وتاندىق عىلىمنىڭ جاڭا كوكجيەكتەرىن اشادى, جاھاندىق عىلىمي ولشەم بازالارىنا تەزىرەك كىرۋگە مۇمكىندىك تۋعىزادى, قازاقستاندىق عالىمداردىڭ شەتەلدىك ارىپتەستەرىمەن قارىم-قاتىناسىن جانداندىرادى. ويتكەنى ادامزاتتىڭ كوپ بولىگى قۇرىلىمى لاتىن گرافيكاسىنا نەگىزدەلگەن لاتىن تاڭباسىن قولدانادى. بۇل – بىرىنشىدەن.
ەكىنشىدەن, بۇگىندە دۇنيە جۇزىندەگى اسا وزەكتى اقپاراتتار اعىنىنىڭ 70 پايىزى لاتىن گرافيكاسىمەن بەرىلەدى. سونداي-اق بۇل وزىق عىلىم مەن ءبىلىمنىڭ ياكي زاماناۋي يننوۆاتسيالاردىڭ جانە ەڭ باستىسى ينتەرنەت پەن اقپاراتتىق تەحنولوگيالارعا ورايلاستىرىلعان جۇرتشىلىقتىڭ سۇرانىستارىن ساناۋلى سەكۋندتاردا قاناعاتتاندىراتىن Yahoo, Google سياقتى زاماناۋي ىزدەۋ جۇيەلەرىنىڭ دە, تسيفرلى تەحنولوگيانىڭ دا نەگىزگى ىرگەتاسى.
ۇشىنشىدەن, جاڭا الىپبيگە ءوتۋ – تۇركى تىلدەس ەلدەردى جاقىنداستىراتىن ماڭىزدى شەشىم. تۇركى حالىقتارىنىڭ مادەنيەتى, سوزدىك قۇرامى لاتىنشا جازىلعاندىقتان, ولاردى زەرتتەۋ دە تيىسىنشە وڭايعا تۇسەدى. تاريحقا كوز جۇگىرتسەك, اتالعان جازۋ جۇيەسىن العاش بولىپ 1928 جىلى تۇركيا قابىلداسا, 1991 جىلدان كەيىن بۇل گرافيكاعا تۇرىكمەنستان, ازەربايجان جانە وزبەكستان مەملەكەتتەرى دە وتكەن بولاتىن.
تورتىنشىدەن, لاتىن الىپبيىنە اۋىسا وتىرىپ ءتىلىمىز حالىقارالىق دەڭگەيدە زور مارتەبەگە يە بولادى. سونىمەن قاتار بۇل قادام ارقىلى كيىز تۋىرلىقتى قازاق ءوز رۋحانياتىنىڭ تىزگىنىن ءوزى ۇستايدى. ءبىر بۇل عانا ەمەس. مەملەكەت باسشىسى ۇسىنعان قازاق ءتىلىن لاتىن گرافيكاسىنا كوشىرۋ جوباسى باسقا تىلدەردە سويلەيتىن ادامدارعا ءبىزدىڭ ءتىلدى جىلدامىراق ۇيرەنۋدى ىنتالاندىراتىن نۇسقا رەتىندە قاراستىرىلىپ وتىر.
قازىرگى كۇننىڭ باستى ترەندى ۇزدىكسىز دامۋ, نوۋ-حاۋ مەن يننوۆاتسيا بولىپ تابىلادى. جاڭا زاماننىڭ جاستارى وسىنداي وزگەرمەلى ۋاقىتتا ءومىر سۇرۋگە قابىلەتتى بولىپ قانا قويماي, وقيعالار مەن ۇدەرىستەردىڭ ورتاسىندا, كوش باسىندا بولۋى ءتيىس.
گاۋھار الدامبەرگەنوۆا,
پەداگوگيكا عىلىمدارىنىڭ دوكتورى, پروفەسسور
