وتىرىسقا وبلىستاردىڭ, استانا جانە الماتى قالالارىنىڭ سايلاۋ كوميسسيالارىنىڭ توراعالارى مەن حاتشىلارى, وبلىستاردىڭ, استانا جانە الماتى قالالارى اكىمدەرى اپپاراتتارىنىڭ جەتەكشىلەرى, پارلامەنت ءماجىلىسىنىڭ دەپۋتاتتارى, ادىلەت, ءبىلىم جانە عىلىم مينيسترلىكتەرىنىڭ, قازاقستان رەسپۋبليكاسىنىڭ پرەزيدەنتى جانىنداعى مەملەكەتتىك باسقارۋ اكادەمياسىنىڭ, قازاقستان حالقى اسسامبلەياسىنىڭ وكىلدەرى جانە ەلەكتورالدى ءبىلىم بەرۋ بويىنشا جاتتىقتىرۋشىلار قاتىستى.
ورتالىق سايلاۋ كوميسسياسىنىڭ توراعاسى بەرىك يماشەۆ وتىرىستا سويلەگەن العىسوزىندە 2017 جىلى وسك-نىڭ جۇمىسى سايلاۋ جۇيەسىنىڭ زاڭنامالىق نەگىزىن جاقسارتۋ, حالىقارالىق ىنتىماقتاستىقتى دامىتۋ, سايلاۋ پروتسەستەرىن تسيفرلاندىرۋ جانە ەلەكتورالدى ءبىلىم بەرۋ جۇيەسىن ۇيىمداستىرۋعا باعىتتالعانىن اتاپ ءوتتى. جىل قورىتىندىسى بويىنشا باياندامانى توراعانىڭ ورىنباسارى كونستانتين پەتروۆ جاسادى.
ب.يماشەۆ ورتالىق سايلاۋ كوميسسياسىنا كەلىپ تۇسكەن جانە مۇددەلى ورگاندارمەن كەلىسۋ ءۇشىن ەنگىزىلگەن, ۇكىمەت ۇسىنعان «قازاقستان رەسپۋبليكاسىنداعى سايلاۋ تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا وزگەرتۋلەر مەن تولىقتىرۋلار ەنگىزۋ تۋرالى» زاڭ جوباسىنا نازار اۋداردى.
وتىرىستا ادىلەت ۆيتسە-ءمينيسترى ن.پان, پارلامەنت ءماجىلىسى دەپۋتاتتىق فراكتسيالارىنىڭ جەتەكشىلەرى: «نۇر وتان» پارتياسىنان ي.ارونوۆا, «اق جول» پارتياسىنان ا.پەرۋاشەۆ, قكحپ حاتشىسى ۆ.كوسارەۆ, قازاقستان حالقى اسسامبلەياسىنان س.ابدراحمانوۆ, ادام قۇقىعى بويىنشا ۇلتتىق ورتالىقتىڭ جەتەكشىسى س.وسپانوۆ, ەۋروپالىق قۇقىق جانە ادام قۇقىقتارى بويىنشا ساراپشىلىق ينستيتۋتىنىڭ ديرەكتورى م.باشيموۆ ءسوز سويلەدى. سونىمەن قاتار قوستاناي وبلىستىق سايلاۋ كوميسسياسىنىڭ ءتورايىمى ا.ماركوۆا جانە الماتى وبلىستىق سايلاۋ كوميسسياسىنىڭ توراعاسى ت.داۋتوۆ ءوز ويلارىمەن ءبولىستى.
وسك توراعاسى بەرىك يماشەۆ ەلىمىزدىڭ سايلاۋ جۇيەسى 93 مىڭنان استام سايلاۋ كوميسسياسى مۇشەلەرىن قامتيتىنىن جانە ورتالىق سايلاۋ كوميسسياسى سايلاۋ بويىنشا زاڭنامانى وزگەرتۋگە مۇددەلى تاراپتاردىڭ جانە قوعامنىڭ قاتىسۋىمەن پىكىر الىساتىن ەڭ ءتيىمدى تالقىلاۋ الاڭى ەكەنىن اتاپ ءوتتى. سونداي-اق ب.يماشەۆ ورتالىق سايلاۋ كوميسسياسى جۇمىسىنىڭ الداعى ۋاقىتقا قويعان باسىمدىقتارى مەن ناقتى باعىتتارىن ۇيىمداستىرۋدا جاڭا فورمالار مەن ءادىس-تاسىلدەرىن قولدانۋ جايلى, ساياسي پارتيالار جانە ازاماتتىق قوعاممەن ىنتىماقتاستىق ماسەلەلەرى جونىندە ايتىپ ءوتتى.
جاقسىباي سامرات,
سۋرەتتى تۇسىرگەن ەرلان ومار,
«ەگەمەن قازاقستان»
