ەلباسىنىڭ پارتيا قىزمەتىن جاڭعىرتۋ جونىندەگى تاپسىرماسىنا وراي الەۋمەتتىك باعىتتاعى جۇمىس بارىسىن ودان ءارى كۇشەيتۋ كوزدەلىپ وتىر. سوعان بايلانىستى مۇمكىندىگى شەكتەۋلى جاندارعا, ارداگەرلەرگە جانە حالىقتىڭ از قامتىلعان توبىنا قولداۋ كورسەتۋگە باعىتتالعان بارلىق پارتيالىق جوبالار قايتا قارالىپ, ولاردىڭ وزەكتىلىگى ارتا تۇسپەك. باستى ماقسات – بۇل جوبالاردى پارتيالىق قولداۋ كورسەتۋدىڭ مەيلىنشە ءتيىمدى قۇرالىنا اينالدىرىپ, سول ارقىلى حالىققا ناقتى ءارى ايتارلىقتاي پايدا اكەلۋ.
ساپار اياسىندا ماۋلەن اشىمباەۆ ەرەكشە قاجەتتىلىگى بار بالالارعا ارنالعان كۇندىزگى ورتالىق بولىمدەرىنىڭ بىرىنە ارنايى ات باسىن بۇردى. اتالعان ءبولىم «كەدەرگىسىز كەلەشەك» پارتيالىق جوباسىن جۇزەگە اسىرۋ ماقساتىندا «نۇر وتاننىڭ» تىكەلەي باستاماسىمەن جانە قولداۋىمەن اشىلعان بولاتىن. بۇگىندە مۇندا 30 بالا جارتىلاي ستاتسيونار جاعدايىندا ارنايى الەۋمەتتىك قىزمەتتەردى تەگىن الىپ كەلەدى. جالپى, قالا بويىنشا 200 بالاعا قىزمەت كورسەتىپ وتىرعان وسىنداي 3 ءبولىم جۇمىس ىستەيدى. تاياۋدا جەتىسۋ جانە ناۋرىزباي اۋداندارىنان تاعى 2 ءبولىم اشۋ جوسپارلانىپ وتىر.
سونىمەن قاتار «نۇر وتان» پارتياسى توراعاسىنىڭ ءبىرىنشى ورىنباسارى بالالاردى وڭالتۋ جانە بەيىمدەۋ جۇمىستارى جۇرگىزىلەتىن ارنايى كابينەتتەرگە باس سۇقتى. اتالعان مەديتسينالىق مەكەمە قىزمەتكەرلەرىمەن كەزدەسكەن ماۋلەن اشىمباەۆ وسى سالاداعى وزەكتى ماسەلەلەردى شەشۋ جولدارىن تالقىلادى. ءوز سوزىندە ول الداعى ۋاقىتتا پارتيا ەرەكشە قاجەتتىلىگى بار جاس قازاقستاندىقتاردى قولداۋعا ايرىقشا كوڭىل بولەتىنىن جەتكىزدى. جۇزدەسۋ سوڭىندا بالالارعا «نۇر وتان» پارتياسىنىڭ اتىنان ارنايى سىيلىقتار تابىستالدى. ال ورتالىققا قازىرگى زامانعى «دەلفا» لوگوپەدتى جاتتىعۋ قۇرالى تارتۋ ەتىلدى. بۇل جاتتىعۋ قۇرالىنىڭ كومەگىمەن كەيبىر بالالاردا كەزدەسەتىن ءتۇرلى سۋردولوگوپەدتى ماسەلەلەردى وڭتايلى شەشۋگە مۇمكىندىك بار.
ساپار بارىسىندا پارتيا توراعاسىنىڭ ءبىرىنشى ورىنباسارى الماتىداعى ەڭ ءىرى ساۋدا-ويىن-ساۋىق ورتالىقتارىنىڭ بىرىندە بولىپ, قالانىڭ شاعىن بيزنەس وكىلدەرىمەن كەزدەستى. كاسىپكەرلەرمەن ەركىن پىكىر الماسىپ, وسى سالانى ودان ءارى دامىتۋدىڭ قىر-سىرىن تالقىلاعان ماۋلەن اشىمباەۆ جاقىن ارادا پارتيا تاراپىنان شاعىن جانە ورتا بيزنەس سالاسىنا ايتارلىقتاي قولداۋ كورسەتىلەتىنىن جەتكىزدى. ناقتى ايتقاندا, ەلباسى, پارتيا توراعاسى نۇرسۇلتان نازارباەۆتىڭ تاپسىرماسىنا وراي «نۇر وتان» شاعىن جانە ورتا بيزنەستى دامىتۋعا جانە قولداۋعا باعىتتالعان جاڭا جوبانى قولعا الماق.
«نۇر وتان» پارتياسى توراعاسىنىڭ ءبىرىنشى ورىنباسارى وڭتۇستىك استانامىزدىڭ جاستارىمەن دە ارنايى كەزدەسىپ, ءارتۇرلى تاقىرىپتا اڭگىمە ءوربىتتى. كەزدەسۋ SmArt.Point كوۆوركينگ-ورتالىعىندا ءوتتى. اتالعان ورتالىق ءتۇرلى ستارتاپتاردى جۇزەگە اسىراتىن ورىن رەتىندە دە بەلگىلى. بۇل جەر اپتانىڭ جەتى كۇنىندە تاۋلىگىنە 24 ساعات جۇمىس ىستەيدى. مۇندا سويلەسۋ بولمەلەرى, ويىنعا ارنالعان ورىندار جانە سپورت, كونفەرەنتس-زالدارى بار.
كەزدەسۋدە ماۋلەن اشىمباەۆ ەلباسى, پارتيا توراعاسى نۇرسۇلتان نازارباەۆ ەل جاستارىنىڭ جان-جاقتى دامۋىنا بارلىق جاعدايدى جاساپ وتىرعانىنا نازار اۋدارىپ, جاس ونەرتاپقىشتار مەن يننوۆاتورلاردى ەلباسىنىڭ تاپسىرماسىنا سايكەس «نۇر وتاننىڭ» ۇيىمداستىرۋىمەن وتەتىن جاستار اراسىنداعى ءداستۇرلى رەسپۋبليكالىق يننوۆاتسيالىق جوبالار بايقاۋىنا قاتىسۋعا شاقىردى. وسى رەتتە «نۇر وتاننىڭ» جىل سايىن جاس ونەرتاپقىشتارعا ءوز جوبالارىن جۇزەگە اسىرۋ ءۇشىن ارنايى جۇلدە تاعايىندايتىنىن ايتا كەتكەن ءجون.
جاستارمەن كەزدەسۋ بارىسىندا پارتيا توراعاسىنىڭ ءبىرىنشى ورىنباسارى الدا بولاتىن «جاس وتان» جاستار قاناتىنىڭ سەزىنە دە توقتالدى. ونىڭ سوزىنە قاراعاندا, بۇل سەزد ەلىمىزدەگى جاستار ساياساتىنا جاڭاشا قارقىن بەرەتىن ءىرى ءىس-شارا بولادى دەپ كۇتىلۋدە.
ساپار سوڭىندا ماۋلەن اشىمباەۆ الماتى قالاسىنىڭ اكىمى, پارتيا قالالىق فيليالىنىڭ توراعاسى باۋىرجان بايبەك باستاعان شاھاردىڭ پارتيالىق اكتيۆىمەن كەزدەستى. پارتيا توراعاسىنىڭ ءبىرىنشى ورىنباسارى فيليالدا جاڭادان اشىلعان Office of political analysis كەڭسەسىنىڭ جۇمىسىمەن تانىستى. بۇل جەردە ساراپتامالىق رەسۋرستاردى, ءارتۇرلى بولجامداردى جانە ۇلگىلەۋلەردى جەدەل باسقارۋعا, ولارمەن جۇمىس ىستەۋگە بارلىق جاعداي جاسالعان.
سونداي-اق ماۋلەن اشىمباەۆ «نۇر وتان» پارتياسىنىڭ العاشقى مۋلتيمەديالىق مۋزەيىندە بولدى. مۋزەي بار بولعانى 10 شارشى مەتر اۋماقتى قامتيدى. ونىڭ باستى ەرەكشەلىگى دە وسى. مۇندا الدىڭعى قاتارلى تسيفرلى تەحنولوگيا كەڭىنەن قولدانىلعان. سونىڭ ارقاسىندا كەلۋشىلەر ارنايى LED-ەكراننان ەلباسى, پارتيا توراعاسىنىڭ ءومىربايانىن تاماشالاي الادى.
قالالىق پارتيا اكتيۆىمەن كەزدەسۋدە ماۋلەن اشىمباەۆ ەلباسىنىڭ پارتيا قىزمەتىن جاڭعىرتۋ جانە «نۇر وتاندى» اۋقىمدى «قايتا جۇكتەۋ» تۋرالى تاپسىرماسى تۋرالى كەڭىنەن ايتىپ, ونى جۇزەگە اسىرۋدىڭ باسىم باعىتتارىن ۇسىندى.
ساپارباي پارمانقۇل,
«ەگەمەن قازاقستان»
الماتى
