جيىن بارىسىندا ەلشى سيرياداعى ءىس-قيمىلدار جونىندە اڭگىمەلەپ, ەلدەگى ماسەلەنى شەشۋدەگى استانا پروتسەسىنىڭ ماڭىزىن اتاپ كورسەتتى. ەڭ اۋەلى ن.ۋيانىك افريندەگى اسكەري وپەراتسيانىڭ ماقساتىن ءتۇسىندىرىپ ءوتتى.
«تۇركيا قارۋلى كۇشتەرى شەكارالىق ايماقتاردا قاۋىپسىزدىك پەن تۇراقتىلىقتى قامتاماسىز ەتۋ ماقساتىندا سيريانىڭ سولتۇستىك-باتىسىندا ورنالاسقان افرين ايماعىندا ء«زايتۇن بۇتاعى» اسكەري وپەراتسياسىن باستادى. ونىڭ ماقساتى – دايش (يليم), YPG, PYD سەكىلدى بىرقاتار تەرروريستىك توپتارعا توسقاۋىل قويىپ, دوستاس ءارى باۋىرلاس ەلدىڭ حالقىن سودىرلاردىڭ قىسىمىنان قۇتقارۋ. وسى وپەراتسيا بۇۇ جارعىسىنىڭ 51-بابىنا ساي ء«وزىن-ءوزى قورعاۋ قۇقىعى» شەڭبەرىندە جانە قاۋىپسىزدىك كەڭەسىنىڭ تەرروريزممەن كۇرەسكە قاتىستى قارارلارىنا ساي جۇرگىزىلدى», دەدى ن.ۋيانىك.
ەلشىنىڭ سوزىنە قاراعاندا, وسى ءىس-قيمىلداردان كەيىن الەۋمەتتىك جەلىلەر مەن بۇقارالىق اقپارات قۇرالدارىندا افريندەگى جاعدايعا قاتىستى جالعان اقپاراتتار قاپتاپ كەتكەن. وسىعان بايلانىستى ەلشىلىك تاراپى ماسەلەنىڭ ءمان-جايىن اشىپ ءتۇسىندىرۋدى ءجون دەپ تاۋىپتى.
ديپلومات سيريا داعدارىسى باستالعاننان بەرى تۇركيانىڭ ۇستانىمىنان اينىماي, ەلگە كومەك قولىن سوزىپ كەلە جاتقانىن اتاپ ءوتتى. قازىرگى تاڭدا ەلدەگى جاعدايى رەتتەۋ ءۇشىن جەنەۆا كەلىسسوزدەرىنە, استانا پروتسەسىنە كەپىل-مەملەكەت رەتىندە قاتىسىپ وتىرعانىنا دا توقتالدى. سيريادان بوسقان 3,5 ميلليون حالىق تۇركيادا باس ساۋعالاپ جۇرگەنىن دە ءسوز ەتتى. ەلشىنىڭ ايتۋىنشا, ء«زايتۇن بۇتاعى» وپەراتسياسى كەزىندە بەيبىت تۇرعىندار مەن ءدىني ورىندار, مادەني نىساندار, تاريحي جانە ارحەولوگيالىق ەسكەرتكىشتەرگە زاقىم كەلتىرمەۋ ءۇشىن ساقتىق شارالارى قاراستىرىلعان.
«وپەراتسيا باستالعاننان بەرى تۇركيا اۋە كۇشتەرى تەرروريستىك ۇيىمدارعا تيەسىلى 782 نىسان جويىلعان. بۇدان بولەك ەكى مىڭنان استام لاڭكەستىڭ كوزى قۇرتىلدى. قاقتىعىس بارىسىندا قارۋلى كۇشتەرىمىزدىڭ 32 ساربازى مەرت بولىپ, 183 جاۋىنگەرى جارالاندى. ءىس-قيمىلدار كەزىندە حالىقارالىق قوعامداستىق تىيىم سالعان وق-دارىلەر قولدانىلمايدى. مۇنداي قارۋلار تۇركيا ارسەنالىندا جوق», دەگەن ەلشى ء«زايتۇن بۇتاعى» وپەراتسياسىنىڭ ماڭىزىن ءتۇسىندىردى.
ن.ۋيانىك افريندەگى اسكەري ءىس-قيمىلداردان كەيىن الەۋمەتتىك جەلىلەر مەن باق-تا جالعان اقپاراتتىڭ تەز تاراپ جاتقانىنا قىنجىلىس ءبىلدىردى. وسىعان قاتىستى ەلشىلىك تاراپى ارنايى پرەزەنتاتسيا ازىرلەگەن ەكەن. بريفينگتە بۇل مالىمەتتەر دە جۋرناليستەرگە كورسەتىلدى. ەلشىنىڭ سوزىنە ساي, تەرروريستىك ۇيىمداردىڭ وكىلدەرى الەۋمەتتىك جەلىنى بەلسەندى قولدانىپ, جالعان جاڭالىقتاردى ءجيى-ءجيى جاريالايدى.
وسى ورايدا, ەلشى سيرياداعى داعدارىستى رەتتەۋدەگى استانا پروتسەسىنىڭ ناتيجەلەرىن ەرەكشە اتاپ كورسەتتى. ونىڭ پىكىرىنشە, جانجالداسقان تاراپتار تۇڭعىش رەت استانادا كەلىسسوزدەرى كەزىندە ءبىر ۇستەل باسىنا جينالۋى – قازاقستاننىڭ باستامالارىنىڭ ماڭىزدىلىعىن كورسەتەدى. سيريادا دەەسكالاتسيا ايماقتارىن قۇرۋ جونىندەگى شەشىم دە ەلدەگى احۋالدى قالپىنا كەلتىرۋگە ايتارلىقتاي ۇلەس قوساتىنىنا دا سەنىم ءبىلدىردى. سونداي-اق ن.ۋيانىك كەپىل مەملەكەتتەردىڭ سىرتقى ىستەر مينيسترلەرىنىڭ كەزدەسۋ الداعى ناۋرىزدا استانادا ءوتۋى مۇمكىن ەكەنىن جەتكىزدى.
بۇدان بولەك, ن.ۋيانىك تۇركيادا دەمالىس ماۋسىمى كەزىندە تۋريستەرگە قاتاڭ تەكسەرۋ جۇرگىزىلمەيتىنىن حابارلادى. ونىڭ ايتۋىنشا, كەيىنگى ەكى جىلدا ەل اۋماعىندا ەشقانداي تەرروريستىك شابۋىل بولعان جوق.
«تۇركيا تۋريستەر ءۇشىن ەڭ قاۋىپسىز ايماق سانالادى. قازىرگى تاڭدا تەرروريزممەن كۇرەس شەكارالىق ايماقتاردا عانا ەمەس, بۇكىل ەلدە جۇرگىزىلىپ جاتىر. سوندىقتان جاعداي تۇراقتى ەكەنىنە ءباس تىگە الامىن. قازاقستاندىق تۋريستەردى ەلىمىزگە قوناققا كەلۋگە شاقىرامىز», دەدى ن.ۋيانىك.
اباي اسانكەلدى ۇلى,
«ەگەمەن قازاقستان»
