باۋىرجان قاسەنوۆ وسى قىزمەتتە بۇعان دەيىن جۇمىس ىستەگەن سەرگەي سالاماتسكيدى اۋىستىردى. باسقا جۇمىسقا اۋىسۋىنا بايلانىستى س. سالاماتسكي اۋدان اكىمى لاۋازىمىنان بوساتىلدى. ال, ب. قاسەنوۆ بۇعان دەيىن وبلىس اكىمىنىڭ اۋىل شارۋاشىلىق ماسەلەلەرى جونىندەگى ورىنباسارى بولىپ قىزمەت ەتتى.
- ۋسپەن اۋدانى ءوڭىرىمىز ءۇشىن ماڭىزدى ستراتەگيالىق اۋدان. ينۆەستيتسيالىق تارتىمدىلىعى دا جوعارى. اۋداننىڭ مۇمكىندىگىن اۋىل شارۋاشىلىعىن دامىتۋ ءۇشىن تولىق پايدالانۋ قاجەت, - دەدى اۋداننىڭ اكتيۆ جيىنىندا وبلىس اكىمى.
سوندىقتان, بوس جاتقان جەرلەردى اينالىمعا ەنگىزۋ دە باستى ورىندا. جەكە ينۆەستيتسيالار ەسەبىنەن جول بويىنداعى سەرۆيستى دامىتىپ, قايتا وڭدەۋ نىساندارىن اشۋ جانە اۋىل شارۋاشىلىعى كووپەراتيۆتەرىن قۇرۋ كەرەك دەگەن تاپسىرمالار جۇكتەلدى.
فاريدا بىقاي
«ەگەمەن قازاقستان»
پاۆلودار وبلىسى
سۋرەتتى تۇسىرگەن: ۆالەري بۋگاەۆ
