كوميتەت حاتشىسى بەيبىت مامراەۆتىڭ توراعالىعىمەن وتكەن وتىرىس جۇمىسىنا ءماجىلىس دەپۋتاتتارى, ءبىلىم جانە عىلىم مينيسترلىگى, اقپارات جانە كوممۋنيكاتسيالار مينيسترلىگى, ءبىلىم قىزمەتكەرلەرى كاسىپوداعىنىڭ, اتا-انالار كوميتەتىنىڭ وكىلدەرى, وقۋ ورىندارىنىڭ باسشىلارى مەن وقىتۋشىلارى قاتىستى.
ءىس-شارادا مۇعالىم ماماندىعىنىڭ بەدەلىن ارتتىرۋ تۋرالى ءبىلىم جانە عىلىم ۆيتسە-ءمينيسترى اسحات ايماعامبەتوۆ جانە ءماجىلىس دەپۋتاتى ناتاليا جۇمادىلداەۆا بايانداما جاسادى.
مىنبەرگە العاش بولىپ كوتەرىلگەن ۆيتسە-مينيستر ا.ايماعامبەتوۆ ءبىلىم سالاسىندا اتقارىلىپ جاتقان وڭ وزگەرىستەرگە توقتالدى. ونىڭ ايتۋىنشا, ەلباسى جولداۋىن جۇزەگە اسىرۋ بويىنشا ۇستازدارعا ەڭبەكاقى تولەۋدىڭ جاڭا جۇيەسى ەنگىزىلگەن. سوعان سايكەس, ءبىلىم بەرۋدىڭ جاڭارتىلعان مازمۇنى ءۇشىن 30 پايىز, بىلىكتىلىك ساناتى ءۇشىن 30-50 پايىز ارالىعىنداعى لاۋازىمدىق جالاقى قوسۋ قاراستىرىلعان.
ۆيتسە-ءمينيستردىڭ سوزىنە سۇيەنسەك, بىلىمگە قىزىعۋشىلاردىڭ سانى ارتىپ كەلەدى. ماسەلەن, 2017-2018 جىلداردا وسى سالاعا 8129 گرانت بولىنگەن. جىل سايىن ۇستازداردىڭ سانى ون مىڭعا جۋىق جاس مامانمەن تولىعادى ەكەن. سونداي-اق مۇعالىمدەردىڭ دەڭگەيى دە وسكەن. جوعارى ءبىلىمى بار ۇستازداردىڭ سانى 1991 جىلى 66 پايىز بولسا, بىلتىر بۇل كورسەتكىش 90,5 پايىزعا جەتكەن.
«كادرلىق الەۋەتتىڭ ساپاسىن ارتتىرۋ جانە اۋىلدىق جەرلەردەگى مامانداردى الەۋمەتتىك سالا مەن اگروونەركاسىپتىك كەشەندەرگە جىبەرۋ ماقساتىندا «ديپلوممەن اۋىلعا» جوباسى جۇزەگە اسىرىلىپ جاتىر. ۇستازداردىڭ بەدەلىن نىعايتۋ ءۇشىن ولا جونىندە بۇقارالىق اقپارات قۇرالدارىندا ماقالالار جاريالانىپ, «ۇزدىك مۇعالىم» بايقاۋى ۇيىمداستىرىلىپ, ءتۇرلى جيىندار وتكىزىلەدى», دەدى ا.ايماعامبەتوۆ.
بۇدان كەيىن بايانداما جاساعان ن.جۇمادىلداەۆا دا قازىرگى تاڭدا مۇعالىمدەردىڭ بەدەلى تومەندەپ كەتكەنىن ءسوز ەتتى. ونىڭ ايتۋىنشا, بۇعان ەڭبەكاقىنىڭ تومەندىگى, قۇرمەتتىڭ ازدىعى سەبەپ بولىپ وتىر.
«قازاقستاندا پەداگوگتاردىڭ ەڭبەكاقىسى ەلدەگى ورتاشا جالاقى مولشەرىنەن ەكى ەسەدەي از. ماسەلەن, مۇعالىمنىڭ ورتاشا جالاقىسى 99,0 مىڭ تەڭگە بولسا, مەملەكەت بويىنشا بۇل كورسەتكىش 140 265 تەڭگە. ەڭبەكاقىنىڭ ازدىعى تالانتتى ءارى قابىلەتتى جاستاردى ءبىلىم سالاسىنا تارتۋعا مۇمكىندىك بەرمەي وتىر. ەلىمىزدە «التىن بەلگى» يەگەرلەرىنىڭ 5-7 پايىزى عانا وسى سالانى تاڭدايدى ەكەن», دەدى ن.جۇمادىلداەۆا.
پىكىرتالاس بارىسىندا مۇعالىم مارتەبەسى, ەڭبەكتى قورعاۋ تۋرالى جانە مۇعالىمدەردىڭ كاسىپتىك قىزمەتتەرىن اتقارۋمەن بايلانىستى ەمەس قوسىمشا جاۋاپكەرشىلىكتەرىن تومەندەتۋ ماسەلەلەرى ءسوز بولدى. سونىمەن قاتار پەداگوگ قاتىسۋشىلار كادرلاردى دايارلاۋ, مەكتەپ پەن اتا-انالار اراسىنداعى ىنتىماقتاستىق جونىندە ءسوز سويلەپ, كوكەيدەگى ساۋالدارىن قويدى. جيىن سوڭىندا حالىق قالاۋلىلارى مۇعالىم ماماندىعىنىڭ بەدەلىن نىعايتۋداعى وزەكتى ماسەلەلەردى جان-جاقتى تالقىلاپ, بىرقاتار ۇسىنىستار قابىلدادى.
اباي اسانكەلدى ۇلى,
«ەگەمەن قازاقستان»
