ۇلى وتان سوعىسىنىڭ قايناپ جاتقان 1941 جىلدىڭ كۇزىندە لەنينگراد قالاسى جاۋ قورشاۋىندا قالىپ, حالقى اشتىقتان قينالعان شاقتا ءبىر ەشەلون (23 ۆاگون) ازىق-ت ۇلىكتى سىيعا تارتقان قازاقستاندىق دەلەگاتسيانىڭ قۇرامىندا اق تارىنىڭ اتاسى, گەكتارىنان 201 تسەنتنەر ءدان ءوسىرىپ, الەمدىك رەكورد جاساعان اقتوبەلىك شىعاناق بەرسيەۆ تە بار بولاتىن. وزات اقساقال قايتارىندا ماسكەۋدە كىدىرىپ, وعان جازۋشى ءسابيت مۇقانوۆ استانانىڭ كورىكتى جەرلەرىن ارالاتىپتى. كەشكىسىن سول كەزدە اتاعى جەر جارعان اكادەميك لىسەنكونىڭ ۇيىندە مەيمان بولىپ, ەلگە ءبىر جاساپ ورالادى. كەيىننەن عابيدەن مۇستافين ايگىلى «شىعاناق» رومانىن جازادى.
ەندى ەل نازارىنا ۇسىنىپ وتىرعان سۋرەتىمىزدى سويلەتەر بولساق, ونىڭ باستى كەيىپكەرى ءبىز ايتىپ وتىرعان اقتوبە وبلىسىنداعى «قۇرمان» كولحوزىنىڭ لەنين وردەندى تارى ءوسىرۋشىسى ش.بەرسيەۆ پەن كولحوز باسشىسى ش.راحمەتجان.
سول كەزەڭدەردە قازاق تەلەۆيزياسى دا «اق تارى نەگە ازايىپ كەتتى؟», «اق تارىنىڭ اتاسى» حابارلارىن جانە ء«ۇش بايتەرەك» تەلەپوۆەسىن جارىققا شىعارىپ, شىعاناق شىڭىن دارىپتەگەن ەدى. باعدارلاما بارىسىندا داڭقتى ديقاننىڭ ەڭبەگى تۇبەگەيلى زەرتتەلىپ, ونىڭ ءىس-تاجىريبەسى كەڭىنەن ناسيحاتتالدى. 1943 جىلى تۇسىرىلگەن سۋرەت تەلەۆيزيا مۇراعاتىنا سول پورترەتتىك باعدارلامانى جۇرتشىلىققا جاريالاپ جاتقان كەزەڭدەردە كەلسە كەرەك. بيىل قازاق تەلەۆيزياسىنىڭ 60 جىلدىعىنا وراي وڭتايلى ساتتە وسى سۋرەت وقىرمان نازارىنا جول تارتسا دەدىك.
قاجى قورعان ۇلى,
ارداگەر-جۋرناليست
