ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى كەزەكتى جولداۋىندا پرەزيدەنت جۇزەگە اسۋى ءتيىس 10 نەگىزگى مىندەتتى اتاپ كورسەتتى. مىندەتتەر اسا كۇردەلى, مەيلىنشە وزەكتى. كەز كەلگەن قوعامنىڭ ءومىر ءسۇرۋى مەن دامۋ ۇدەرىسىنىڭ ەڭ نەگىزگى قوزعاۋشى كۇشى, ول سول قوعامنىڭ ازاماتتارى, ياعني ادامي كاپيتالى. سوندىقتان دا پرەزيدەنت جولداۋدىڭ 7-مىندەتىن «ادامي كاپيتال – جاڭعىرۋ نەگىزى» دەپ اتاپ, ءبىلىم بەرۋ سالاسىنداعى اتقارىلۋى ءتيىس شارالارعا توقتالدى.
ءبىزدىڭ پايىمداۋىمىزشا, كوپتەن بەرى ايتىلىپ كەلە جاتقان مۇعالىمنىڭ مارتەبەسىن كوتەرۋ جانە ونىڭ جالاقىسى مولشەرىن 30%-دان 50% -عا دەيىن ۇلعايتۋ تۋرالى شەشىم, ەلباسىنىڭ ميلليونداعان ۇستازدار مەن ولاردىڭ شاكىرتتەرىنە جاساعان قامقورلىعى, قولداۋى. ويتكەنى ۇستاز-ءبىلىم, تاربيە بەرۋ ۇدەرىسىندەگى ەڭ باستى تۇلعا. سوندىقتان دا ول بار بولمىسىمەن – بىلىمىمەن, مورالدىق كەسكىن-كەلبەتىمەن, ءتىپتى كيىم كيىسى, ءجۇرىس-تۇرىسىمەن دە شاكىرتتەرىنە ۇلگى بولۋى ءتيىس. سوندا عانا ول قوعامنىڭ, ەڭ باستىسى شاكىرتتەرىنىڭ قۇرمەت-قوشەمەتىنە بولەنەدى. مۇنداي ۇستازداردىڭ جۇمىسى دا جەمىستى بولادى. اتتارى اڭىزعا اينالعان قازاقتىڭ قاھارمان ۇل-قىزدارى تالعات پەن باۋىرجان, ءاليا مەن مانشۇك, كۇمىس كومەي انشىلەرىمىز روزا مەن بيبىگۇل, تاعى دا باسقا كوپتەگەن مەملەكەت, قوعام قايراتكەرلەرى سول ۇستازدار ەڭبەكتەرىنىڭ جەمىسى.
جولداۋداعى 10 مىندەتتى جۇزەگە اسىرۋعا ءاربىر قازاقستاندىق, تەرەڭ ءبىلىمدى, جوعارى بىلىكتى جانە ءوز وتانىن جانىنداي سۇيەتىن پاتريوت ماماندار ەرەكشە اتسالىسۋى ءتيىس. سوندىقتان دا پرەزيدەنت ورتا جانە جوعارى ءبىلىم بەرەتىن وقۋ ورىندارىنىڭ جۇمىسىن زاماناۋي تالاپتارعا ساي ەتۋ ماسەلەلەرىنە, پەداگوگتاردىڭ بىلىكتىلىگىن كوتەرۋ, پەداگوگيكالىق كافەدرالار مەن دەكاناتتاردىڭ جۇمىسىن جەتىلدىرە ءتۇسۋ, سونداي-اق ماتەماتيكا مەن جاراتىلىستانۋ عىلىمدارىن وقىتۋ ساپاسىن كوتەرۋ قاجەتتىلىگىن اتاپ ءوتتى.
جۇمىس بەرۋشىلەردى تارتا وتىرىپ, وتكەن جىلى باستالعان بارشاعا تەگىن كاسىپتىك-تەحنيكالىق ءبىلىم بەرۋ باعدارلاماسىن حالىقارالىق جانە تسيفرلى تالاپتارعا سايكەستەندىرە جاڭارتىپ جالعاستىرا بەرۋ كەرەك. وسىلايشا مەملەكەت جاستارعا العاشقى ماماندىق الۋعا مۇمكىندىك جاسايدى. بۇل دەگەنىمىز ەلىمىزدەگى تاپشىلىققا اينالعان تەحنيكالىق كادرلار ماسەلەسىن شەشۋدىڭ ەڭ توتە جولى بولماق.
كونستيتۋتسيامىزدا ايشىقتاپ جازىلعانداي قازاق ءتىلى – مەملەكەتتىك ءتىل. ول قازاق حالقىنىڭ تاريحىن, مادەنيەتىن, سالت-داستۇرلەرى مەن ادەت-عۇرىپتارىن مەڭگەرۋدىڭ التىن كىلتى. سوندىقتان دا پرەزيدەنتتىڭ حالىقارالىق قولدانىستاعى تەرميندەردى قازاق تىلىنە تارجىمەلەۋدە مەيلىنشە اباي بولىپ, ءتىلدى ورىنسىز كۇردەلەندىرمەۋگە شاقىرۋىن تولىعىمەن قۇپتايمىز. ايتا كەتۋ كەرەك, حالىقارالىق تەرميندەر ەجەلدەن, سوناۋ انتيكالىق داۋىردەن باستاۋ الىپ, عاسىرلار بويىندا قالىپتاسىپ كەلگەن. پرەزيدەنت ءوز جولداۋىندا «قازاقستاندىقتاردىڭ بولاشاعى – قازاق, ورىس جانە اعىلشىن تىلدەرىن ەركىن مەڭگەرۋىندە» ەكەنىن اتاپ كورسەتتى. سوندا عانا ناعىز ازاماتتىق قوعام ورناپ ەل ازاماتتارى ءبىرتۇتاس ۇلتقا اينالادى.
جولداۋدا ايشىقتالعان مىندەتتەر اۋقىمدى, ءارى كۇردەلى. ولاردى جۇزەگە اسىرۋدى ۇيىمداستىرىپ, ۇيلەستىرىپ وتىرۋدا اتقارۋشى جانە وكىلەتتى ورگانداردىڭ ءرولى ارتا ءتۇسۋى ءتيىس. بۇل ورايدا وڭىرىمىزدە ءبىلىم بەرۋ سالاسىنداعى تۇيتكىلدى ماسەلەلەر, اسىرەسە اپاتتى, ءۇش اۋىسىمدى مەكتەپتەر پروبلەمالارى ءجىتى نازارعا الىنىپ وتىر. اتالعان ماسەلەلەردىڭ دە شەشىلەتىن كۇنى الىس ەمەس. سونىمەن جولداۋ جاريالانىپ, 10 ماڭىزدى مىندەت كۇن تارتىبىنە قويىلدى. بارشامىز بولىپ ايانباي ەڭبەك ەتسەك, ولاردى دا ويداعىداي ەتىپ ەڭسەرەمىز.
ساتتار قۋاشباي,
وڭتۇستىك قازاقستان وبلىستىق ءماسليحاتىنىڭ دەپۋتاتى
شىمكەنت
