2008 جىلى قور عىلىم, مادەنيەت جانە ونەر سالاسىندا ءوز سىياقىسىن تاعايىندادى. بۇل ءىس-شارا جاس تالانتتى قازاقستاندىقتاردى قولداۋ جانە ولاردىڭ قىزمەتىن تانۋ ءۇشىن بەرىلەتىن قوردىڭ ەڭ قۇرمەتتى ماراپاتتارىنىڭ ءبىرى بولىپ تابىلادى.
سىياقى بايقاۋ نەگىزىندە مۋزىكا, تەاتر جانە ساۋلەت ونەرى, حورەوگرافيا, كينەماتوگرافيا, كوركەم ادەبيەت, جۋرناليستيكا, فيزيكا, ماتەماتيكا, ينجەنەرلىك, قوعامدىق جانە گۋمانيتارلىق عىلىمدار نوميناتسيالارى بويىنشا ايرىقشا شىعارماشىلىق جوبالارىنا جانە زامانۋي عىلىمي زەرتتەۋلەرگە بەرىلەدى.
قور سىياقىسى تانىمال قايراتكەرلەر ءۇشىن جوعارى مارتەبەنى تاعى ءبىر دالەلدەۋ بولسا, دەبيۋتانتتار ءۇشىن – ءوزىن قازاقستانعا كورسەتۋدىڭ تاماشا مۇمكىندىگى بولىپ تابىلادى.
2017 جىلدىڭ قورىتىندىسى بويىنشا بايقاۋ كوميسسياسىنا مادەنيەت جانە ونەر باعىتتارى بويىنشا 57 تاپسىرىس كەلسە, عىلىم جانە تەحنيكا باعىتتارى بويىنشا 59 تاپسىرىس كەلىپ ءتۇستى. قور توڭىرەگىندە جۇمىس ىستەيتىن جاس عالىمدار كەڭەسى جانە شىعارماشىل جاستار كەڭەسىنىڭ مۇشەلەرىنەن تۇراتىن بايقاۋ كوميسسياسىنىڭ شەشىمى بويىنشا 12 نوميناتسيا بويىنشا 21 ادام لاۋرەات اتاندى.
ماراپاتتاۋدىڭ سالتاناتتى راسىمىندە ءاربىر لاۋرەاتقا ديپلوم, كەۋدە بەلگىسى جانە اقشالاي سىياقى تابىستالدى.
جاڭا لاۋرەاتتاردى قۇتتىقتاي وتىرىپ قر تۇڭعىش پرەزيدەنتى – ەلباسى قورىنىڭ اتقارۋشى ديرەكتورى قانات جۇماباەۆ بىلاي دەپ اتاپ ءوتتى: «بۇگىن ءبىز ءوزىنىڭ دارىنى, ەڭبەكقورلىعى, ءوز ىسىنە دەگەن ادالدىعى ارقاسىندا جەڭىستەرگە جەتكەن جاڭا ۇرپاق كوشباسشىلارىن – ءبىزدىڭ لاۋرەاتتارىمىزدى قوشەمەتتەۋ ءۇشىن جينالدىق».
قر اقپارات جانە كوممۋنيكاتسيالار ءمينيسترى - داۋرەن اباەۆ, قر پارلامەنتى ءماجىلىسى توراعاسىنىڭ ورىنباسارى - ۆلاديمير بوجكو, قر پارلامەنتى سەناتىنىڭ دەپۋتاتى – بىرعانىم ايتيموۆا, قازاقستاننىڭ ىسكەر ايەلدەر قاۋىمداستىعىنىڭ پرەزيدەنتى - راۋشان سارسەمباەۆا, كومپوزيتور – تولەگەن مۇحامەدجانوۆ جانە باسقا دا بەلگىلى مەملەكەت جانە قوعام قايراتكەرلەرى ءىس-شارانىڭ قۇرمەتتى قوناقتارى بولدى.
قور سىيلىقاقىسىنىڭ بەرىلە باستاعان ۋاقىتىنان باستاپ 200-دەن اسا عىلىم جانە مادەنيەت وكىلدەرى قوردىڭ لاۋرەاتتارى اتاندى. ولاردىڭ ىشىندە قازىر الەمگە تانىمال ءانشى - ديماش قۇدايبەرگەن, بەدەلدى حالىقارالىق كونكۋرستاردىڭ لاۋرەاتى, وپەرا ءانشىسى – سۇندەت بايعوجين, تانىمال بالەت ءارتىسى – دوسجان تابىلدى, تانىمال اقىن – قالقامان سارين, اكتريسا – اسەل ساعاتوۆا, ەسترادا ءانشىسى - اليشەر كاريموۆ بار.
