سۋرەتتى تۇسىرگەن ايباتىر نۇراش
- ەلىمىزدە سالىناتىن ءتورتىنشى مۇناي وڭدەۋ زاۋىتىنىڭ تەحنيكالىق قۇجاتتارى قازىر جاسالۋ ۇستىندە. جول كارتاسى جاسالىپ, ماماندار جۇمىس ىستەپ جاتىر. ونىڭ قاي وڭىردە سالىناتىنى بيىلعى قازان-قاراشا ايلارىندا بەلگىلى بولادى, - دەدى قانات بوزىمباەۆ.
ءمينيستردىڭ ايتۋىنشا, «كوندەنسات» اق-نىڭ قاراشىعاناقتا سالىنعان جاڭا زاۋىتى جىلىنا 80 مىڭ توننادان استام ءونىم شىعارۋعا قابىلەتتى. بۇل باتىس قازاقستان وبلىسىنىڭ ىشكى قاجەتتىلىگىن تولىق وتەي الادى. ەگەر تاياۋداعى 1-2 اي ىشىندە زاۋىتتىڭ ديزەل وتىنىن وڭدەيتىن جەلىسى ىسكە قوسىلاتىن بولسا, مينيسترلىك زاۋىتتى شيكىزاتپەن قامتاماسىز ەتۋ ماسەلەسىن شەشەدى. «زاۋىت وسى ءبىر-ەكى اي ىشىندە جاڭا جەلىسىن ىسكە قوسسا, كاسىپورىن جۇمىس ىستەۋگە قاجەتتى شيكىزاتتى اتىراۋدان نەمەسە وسى قاراشىعاناق كەنىشىنەن بەرۋ ماسەلەسىن شەشەمىز» دەدى قانات بوزىمباەۆ. ايتا كەتەيىك, قازىنالى كەنىشتىڭ ءدال ۇستىندە وتىرعان وتاندىق كاسىپورىندى شيكىزاتپەن قامتۋ بۇعان دەيىن تالاي مارتە تىعىرىققا تىرەلىپ, شيكى مۇناي وزگە وڭىردەن تاسىلىپ كەلگەن ەدى.
مينيستر بوزىمباەۆ جەرگىلىكتى تۇرعىنداردىڭ نارازىلىعىن ءجيى تۋعىزاتىن ماسەلە – گاز ءتاريفى تۋرالى دا ايتتى. «تەگىن گاز جوق, بولمايدى دا» دەگەن قانات الدابەرگەن ۇلى باتىسقازاقستاندىقتار تۇتىنىپ وتىرعان قاراشىعاناق گازىنىڭ قۇرامىندا كۇكىرت كوپتىگىن, ونى وڭدەۋ قىمباتقا تۇسەتىنىن جانە شەتەلدە – ورىنبوردا وڭدەلەتىنىن ايتىپ, ء«تاريفتى تومەندەتۋ مۇمكىندىگى جوق» دەدى.
- قاراشىعاناق گازىنىڭ ورىنبوردا وڭدەلىپ, قايتادان وزىمىزگە كەلگەن كەزدە شەكاراداعى قۇنى – 43 دوللاردان. شيكىزاتتىڭ وزىندىك قۇنى, وڭدەۋگە, تاسىمالداۋعا قانشا شىعىن كەتەتىنى تولىق باقىلاۋدا. راس, باتىسقازاقستاندىقتار اقتوبە, اتىراۋ, اقتاۋمەن سالىستىرعاندا قىمباتتاۋ گاز تۇتىنادى. ونىڭ سەبەبى – اقتوبە گازى وزدەرىندە وڭدەلەدى, ءارى شيكىزاتتىڭ ساپاسى دا جاقسى. اتىراۋدا دا وسىنداي جاعداي, تشو-نىڭ وڭدەۋ زاۋىتى سالىستىرمالى تۇردە ارزان ءونىم شىعارادى. بىراق شىمكەنت, الماتى, جامبىل وڭىرلەرىندە گاز باعاسى ورالدان قىمبات قوي. بۇل جەردە تاريف ءونىمنىڭ وزىندىك قۇنىنا بايلانىستى تۇزىلەدى. ءبىز, مينيسترلىك تاراپىنان تاريفتەردىڭ اشىقتىعىن قاتاڭ باقىلايتىن بولامىز, - دەدى قانات بوزىمباەۆ.
مينيستر بيىل جىل ورتاسىنا تامان پارلامەنتتە «تۇرعىن ءۇي قاتىناستارى تۋرالى» جاڭا زاڭ قارالاتىنىن, بۇل زاڭ بويىنشا وڭىرلەردە گاز-تەحنيكالىق ينسپەكتسيا قىزمەتىن قۇرۋ ماسەلەسى قاراستىرىلاتىنىن ايتتى. «حالىقپەن كەزدەسكەندە ءجيى ەستىپ ءجۇرمىز, «قازترانسگازايماق» مەكەمەسىنە ايتىلاتىن سىن كوپ. گاز-تەحنيكالىق ينسپەكتسيا قۇرىلار بولسا, جەرگىلىكتى بيلىك ورىندارى گاز تاسىمالداۋشى قۇرىلىمداردىڭ جۇمىسىن باقىلاپ, ىقپال ەتۋ تەتىگىنە يە بولادى. مۇنىڭ ءوزى تۇرعىنداردى كوگىلدىر وتىنمەن قامتۋ ماسەلەسىندە كەزدەسەتىن كەيبىر تۇيتكىلدەردى وڭىنان شەشۋگە ءتيىس, - دەدى مينيستر.
قازبەك قۇتتىمۇرات ۇلى,
«ەگەمەن قازاقستان»
ورال
