استانا قالاسى اكىمىنىڭ ءبىرىنشى ورىنباسارى سەرگەي حوروشۋن جاياۋ جۇرگىنشىلەر جولى ماسەلەسىن شەشۋ مەن جاياۋ جۇرگىنشىلەر جولىنداعى قاۋىپسىزدىك شارالارىن قامتاماسىز ەتۋ بويىنشا اكىمنىڭ تاپسىرماسى قالاي ورىندالىپ جاتقانى جونىندە باياندادى.
«جولاۋشىلار تاسىمالداۋ باسقارماسى مەن استانا قالاسى ءىىد ءاپب بىرلەسىپ, باقىلانبايتىن قاۋىپتى جاياۋ جۇرگىنشىلەر ۋچاسكەسىن انىقتادى. ولاردىڭ جالپى سانى – 104. ونىڭ ىشىندە ترانسپورت قيىلىسىندا ورنالاسقان 16-نا جوبالاۋ-سمەتالىق قۇجاتى دايىندالدى, ال قالعان 88-ءى – جاياۋ جۇرگىنشىلەر جولى. بۇلارعا دا ءىىد ءاپب كەلىسىپ سحەما جاسالماق», – دەپ حابارلادى س.حوروشۋن.
ەستەرىڭىزگە سالا كەتەيىك, استانا اكىمى اسەت يسەكەشەۆ 2018 جىلى جاياۋ جۇرگىنشىلەر جولىنا قاتىستى قاۋىپسىزدىك ماسەلەسىن قامتاماسىز ەتۋدى تاپسىرعان بولاتىن. ياعني بارلىق ماگيسترالدى جولداعى جاياۋ جۇرگىنشىلەر جولىن الىپ تاستاپ, باعدارشام ورناتۋدى, كەدەرگىسىز بىرىكتىرىلگەن «جاسىل تولقىن» دەپ اتالاتىن اۆتوترانسپورت اعىمىن قامتاماسىز ەتۋ. ال كىشىگىرىم كوشەلەردەگى جاياۋ جۇرگىنشىلەر جولاعىن قالدىرىپ, وىن جارىقتاندىرۋ كەرەكتىگىن ايتقان-دى. بۇل ماسەلەنى دە وسى 2018 جىلى شەشۋى ءتيىس.
اسەت يسەكەشەۆ اۋدان اكىمدەرىنە قاراتا اۆتوبۋس ايالدامالارىن ءبىلىم, دەنساۋلىق ساقتاۋ, الەۋمەتتىك قورعاۋ باسقارمالارىمەن بىرلەسىپ, جىلى ايالدامالار ورناتاتىن ورىندى جوسپارلاۋ كەرەكتىگىن ايتتى. بارىنەن بۇرىن ولاردىڭ ورنالاسقان جەرى مۇمكىندىگى شەكتەۋلى ادامدار ءۇشىن قولايلى, مەكتەپكە, اۋرۋحاناعا, باسقا دا الەۋمەتتىك نىساندارعا جاقىن بولۋى كەرەك. بيىل كۇز بەن قىس ايى جاقىنداعانشا قاجەتتى جەرلەرگە جىلى ايالدامانى ورناتىپ ۇلگەرۋ قاجەت.
وسىعان بايلانىستى, اكىم سەرگەي حوروشۋنگە ءبىر اپتانىڭ ىشىندە ايالدامانىڭ ءتىزىمى مەن جوسپارىن بەكىتىپ, جوبانى ىسكە اسىرۋدى تاپسىردى.
ال توتەنشە جاعداي, سانيتارلىق-ەپيدەميولوگيالىق, قالا تىرشىلىگىندەگى اعىمداعى نىسانداردىڭ احۋالى جانە جىلۋ ماۋسىمىنىڭ بارىسى تۋرالى قالا اكىمىنىڭ ورىنباسارى قوسمان ايتمۇحامەتوۆ باياندادى. ونىڭ ايتۋىنشا, وتكەن اپتادا توتەنشە جاعدايلار تىركەلگەن جوق, جۇقپالى اۋرۋلار بويىنشا ەپيدەميولوگيالىق احۋال تۇراقتى, جاعداي باقىلاۋ دەڭگەيىنەن اسىپ كەتپەگەن. استانادا جىلۋ ماۋسىمى شتاتتىق رەجيمدە ءوتىپ جاتىر. ەنەرگيا كوزدەرى جانار-جاعارماي قورىنداعى نورماتيۆپەن قامتاماسىز ەتىلگەن.
قىلمىستىق احۋال مەن استاناداعى قۇقىقتىق ءتارتىپتى قامتاماسىز ەتۋدە قولدانعان شارالار جونىندە قالانىڭ ءىىد باسشىسى مارات قوجاەۆ ەسەپ بەردى.
«استانادا وپەراتيۆتى جاعداي تۇراقتى. وتكەن اپتادا 502 قىلمىس تىركەلدى. بۇل وتكەن اپتامەن سالىستىرعاندا 101 وقيعاعا از جانە وتكەن جىلمەن سالىستىرعاندا 326 وقيعاعا ازايعان. قىلمىستىڭ ءىزىن سۋىتپاي 73 وقيعا اشىلدى, بۇرىن جاسالعانى – 41, وتكەن جىلعىسى – 25. سوت پەن تەرگەۋدەن قاشىپ جۇرگەن 9 قىلمىسكەر ۇستالدى, ءىز-ءتۇزسىز جوعالىپ كەتكەن 5 ادام تابىلدى. ۋاقىتشا تەرگەۋ يزولياتورىنا 39 ادام جىبەرىلدى», – دەدى م.قوجاەۆ.
بەينەباقىلاۋ كامەراسىنىڭ كومەگىمەن 14 قىلمىس انىقتالىپ, 1 303 اكىمشىلىك قۇقىق بۇزۋشىلىق انىقتالدى.
قۇقىق بۇزباۋداعى «نولدىك توزىمدىلىكتى» ەنگىزۋ جۇمىستارى جالعاسۋدا. 1 142 اكىمشىلىك قۇقىق بۇزۋشىلىق انىقتالدى, ونىڭ 75-ءى ۇساق بۇزاقىلىق, 85 – تىنىشتىقتى بۇزۋ, 256 – الكوگولدى ىشىمدىك ءىشۋ, قوعامدىق ورىنداردا ماساڭ كۇيدە ءجۇرۋ, بەكىتىلمەگەن جەرلەردە 303 تەمەكى شەگۋ وقيعاسى, 394 – اباتتاندىرۋ ەرەجەسىن بۇزۋ, بەلگىلەنبەگەن ورىندا ساۋدا جاساۋ – 29.
ءدارى-دارمەك پەن ونىڭ قورى تۋرالى دەنساۋلىق ساقتاۋ باسقارماسىنىڭ باسشىسى كامالجان نادىروۆ باياندادى.
ايتۋىنشا, قالانىڭ بارلىق ستاتسيونارى قاجەتتى ءدارى-دارمەكتەر قورىمەن جانە مەديتسينالىق قۇرالدارمەن جابدىقتالعان. ءدارى-دارمەكپەن قامتاماسىز ەتۋ ۇنەمى باقىلاۋدا تۇر.
قالانىڭ قوعامدىق ترانسپورتىنىڭ جۇمىسى جايلى «استانا LRT» جشس باسقارماسىنىڭ توراعاسى بەكمىرزا يگەنبەردينوۆ ايتىپ شىقتى.
اسەت يسەكەشەۆ حالىقتىڭ تاراپىنان قوعامدىق كولىكتىڭ جۇمىسىنا قاتىستى ءالى دە كوپتەگەن ساۋالدارى بارىن ايتا كەتتى. وسىعان بايلانىستى, كاسىبي جۇرگىزۋشىلەردى تارتۋ بويىنشا جۇمىستى كۇشەيتۋ قاجەتتىگىن, كاسىبي دايىندىقتى قامتاماسىز ەتىپ, حالىققا ىڭعايسىزدىق تۋدىرماس ءۇشىن اۆتوبۋستاردىڭ ۋاقتىلى ءوز لينياسىمەن ءجۇرۋ كەرەكتىگىن العا تارتتى. سونداي-اق, اتقارىلىپ جاتقان جۇمىستار جونىندە اپتا سايىن ەسەپ بەرىپ تۇرۋىن تاپسىردى.
اپپارات وتىرىسىندا قالانى اباتتاندىرۋ ماسەلەسى بويىنشا الماتى, ەسىل, سارىارقا اۋدانى اكىمدەرىنىڭ باياندامالارى دا تىڭدالدى.
