سول تۇستا اتوم ەلەكتر ستانساسىنداعى اپاتتى جويۋعا الىپ دەرجاۆانىڭ تۇكپىر-تۇكپىرىنەن ەرىكتىلەر مەن جۇمىسشى جاساقتار لەگى اعىلىپ كەلىپ جاتتى. ال قۋاتتى يزوتوپتاردان بولىنگەن قاتەرلى ساۋلە اۋاعا جىلدام تاراپ, قورشاعان ورتانى ۋلاپ, تۇرعىندار مەن قۇتقارۋشىلاردىڭ دەنساۋلىعىنا وراسان زيان تيگىزدى. سودان بەرى شيرەك عاسىردان استام ۋاقىت وتسە دە, چەرنوبىل اپاتىنىڭ جۇرەكتەرگە سالعان جاراسى جازىلعان جوق. اسىرەسە, اپاتتى ايماقتا بولعان ادامداردىڭ سانى جىل سايىن ازايىپ بار جاتقانى قاسىرەتتى شىندىق...
چەرنوبىل اتوم ەلەكتر ستانساسىنداعى قۇتقارۋ جۇمىستارىنا قازاقستاننان 32 مىڭنان استام ادام قاتىسقان ەكەن. ال ولاردىڭ اراسىندا الماتى وبلىسىنان 2 مىڭنان استام ازامات بولعان. وكىنىشتىسى, بۇگىندە سول تىزىمدەگى ادامداردىڭ دەنى ءتۇرلى سىرقاتتان كوز جۇمعان, قازىر وبلىستا 602 ازامات تۇرىپ جاتىر.
جاقىندا تالدىقورعان قالاسىندا چەرنوبىل اپاتى قۇرباندارىن ەسكە الۋعا جانە الماتى وبلىستىق «چەرنوبىل ارداگەرلەرى مەن مۇگەدەكتەرى» قوعامدىق بىرلەستىگىنىڭ قۇرىلعانىنا 25 جىل تولۋىنا وراي «ەرلىككە تاعزىم» اتتى سالتاناتتى جيىن ءوتتى. جينالعاندار قۇربان بولعانداردى ءبىر مينۋت ۇنسىزدىكپەن ەسكە الىپ, وراسان اپاتتىڭ سالدارىن جويۋعا قاتىسقاندارعا تاعزىم ەتتى. وسى شارادا ءسوز العان الماتى وبلىسى اكىمىنىڭ ءبىرىنشى ورىنباسارى ءلاززات تۇرلاشوۆ:
- چەرنوبىل اپاتى بۇكىل الەمگە اتوم ەنەرگياسىنىڭ باقىلاۋدان شىعىپ كەتسە قانداي كۇيگە ۇشىراتىنىن كورسەتىپ بەردى. سونىمەن قاتار بۇل قايعىلى وقيعا ءوز ومىرلەرىن اياماستان اپاتتىڭ زاردابىن جويۋعا اتسالىسقان ادامداردىڭ ەرىك-جىگەرى مەن باتىرلىق ۇلگىسىن دە تانىتا الدى, -دەدى.
سالتاناتتى شارا ماراپاتتاۋ راسىمىمەن جالعاسىپ, ءتيىستى ماراپاتتار تابىستالدى.
قالماحانبەت مۇقامەتقالي,
«ەگەمەن قازاقستان»
الماتى وبلىسى
