«اۋىل شارۋاشىلىعىن ەكى تۇبەگەيلى ماسەلە بويىنشا سىنايمىز. ءبىرىنشىسى ەڭبەك ونىمدىلىگى ارتپاي وتىر. بۇل اۋىل شارۋاشىلىعى ونىمدەرىن وڭدەۋمەن جانە قوسىلعان قۇننىڭ ارتۋىمەن تىكەلەي بايلانىستى. ەكىنشى, ەكسپورت تومەن. مىنە, الدىڭدا تۇرعان ەكى ماسەلە, وسىنىڭ ىشىندە كوپ جۇمىس بار», - دەدى نۇرسۇلتان نازارباەۆ قر پرەمەر-ءمينيسترىنىڭ ورىنباسارى - اۋىل شارۋاشىلىعى ءمينيسترى ومىرزاق شوكەەۆكە قاراتا ايتقان سوزىندە.
وسى رەتتە ومىرزاق شوكەەۆ اۋىل شارۋاشىلىعى مينيسترلىگى الداعى ۋاقىتتا جۇمىسىن ءۇش باعىتتا جۇرگىزەتىندىگىن باسا ايتتى. ء«بىرىنشىسى - ەت يندۋسترياسىن قايتادان دامىتۋ. وعان بىزدە بارلىق نەگىز بار, ىرگەسى قالانعان. 86 رەپروۋكتور قازىر جۇمىس ىستەپ تۇر. اسىل تۇقىمدى مال باسى 3 جىلدىڭ ىشىندە 400-دەن 700 مىڭعا ءوستى. 16 مىڭ فەرمەلەر وسى باعىتتا جۇمىس ىستەپ جاتىر, اياق الىستارى جاقسى. وتكەندە اقتوبەدە بەردىبەك ماشبەك ۇلى (ساپارباەۆ - اۆت) ەكەۋىمىز ۇلكەن سەمينار وتكىزدىك. قىزىعۋشىلىق جوعارى. سوندىقتان وسى باعدارلامانى قايتا جاڭعىرتىپ, سىزگە ۇسىنىس ەنگىزەمىز دەپ وتىرمىز», - دەدى ول. وسى رەتتە ول اۋىل شارۋاشىلىعىن ەكسپورتقا شىعارۋ ءۇشىن الدىمەن ۆەتەريناريا ماسەلەسىن شەشۋ قاجەتتىگىن اتاپ ءوتتى. «كووپەراتسيانى كوبەيتەمىز دەدىك.ونىڭ سەبەبى بىزدە سالىنعان ەت, ءسۇت, كوكونىس وڭدەيتىن زاۋىتتار 30-40 پروتسەنتكە قولدانىلادى. ەگەر كووپەراتسيا بولسا, ءوندىرۋشى ءونىم بەرىپ, زاۋىت تولىعا تۇسەر ەدى. بۇل جۇمىستار قالاي بولىپ جاتىر», - دەپ سۇرادى قازاقستان پرەزيدەنتى مينيستردەن.
ءوز كەزەگىندە مينيستر ەلىمىزدىڭ بارلىق وبلىستارىندا مىڭداعان كووپەراتسيا قۇرىلعاندىعىن ايتتى. «قازىر سول كووپەراتيۆتەردىڭ ساپاسىن جاقسارتۋ ءۇشىن اكىمدەرمەن بىرلەسىپ جۇمىس ىستەيمىز», - دەدى شوكەەۆ.
