ء«بىز مۇنى قاشان اياقتايمىز؟ ءابىليازوۆ باستاعان بتا بانكى مەملەكەت پەن حالىقتىڭ اقشاسىن بارلىعىنىڭ كوز الدىندا جاپپاي ۇرلادى. بۇكىل الەمگە ءبىز مۇنى اشىپ كورسەتىپ, مەملەكەت اقشاسىن ۇرلاۋ ەكەندىگىن دالەلدەدىك. ال قازىر شە؟ بانك قۇردىق جانە ەندى وعان ادامدار, ۇلتتىق كومپانيالار بارا باستادى. اكتسيونەرلەر ول جاقتان اقشانى شىعارىپ جاتىر. ۇلتتىق بانك بولسا, مۇنى باقىلاپ قانا وتىر. بۇعان قالاي جول بەرۋگە بولادى؟ بىزگە قاداعالاۋشى ورگان نە ءۇشىن قاجەت؟ بارلىق بانكتە وسىنداي... بۇل مەنىڭ اشۋىمدى تۋدىرادى», - دەدى ەلباسى.
مەملەكەت باسشىسى وسى كۇنگە دەيىن ۇكىمەتتىڭ بانكتەردىڭ بانكروت بولۋىنا جول بەرمەي كەلگەندىگىن اتاپ ءوتتى. «بانكروت قىلۋ كەرەك جانە دە اقشانى قالدىرسىن. ول اكتسيونەرلەر ەشقايدا كەتكەن جوق, وسىندا وتىر. بانكتەردى اقشانى جيناپ, ودان كەيىن شىعارىپ الۋ ءۇشىن قۇرعان. تاپا تال تۇستە قالاي ۇرلىق جاساۋعا بولادى», - دەدى نۇرسۇلتان نازارباەۆ.
ءماجىلىس بارىسىندا ۇلتتىق بانك توراعاسى دانيار اقىشەۆ 2008-2009 جىلداردا ورىن العان داعدارىس كەزىندە تۋىنداعان بانك سەكتورىنداعى پروبلەمالاردىڭ وتكەن جىلى باياۋ شەشىلگەنىن اتاپ ءوتتى. ونىڭ ايتۋىنشا, بانكتەردىڭ پروبلەماسىن شىنايى مويىنداۋدىڭ ورنىنا ولارعا رەسترۋكتۋريزاتسيالاۋ جۇرگىزىلىپ, جەكەلەگەن كرەديتتەر شىعىنعا جاتقىزىلعان.
«بۇعان قوسا, نارىقتىڭ كەيبىر قاتىسۋشىلارى اكتسيونەرلەرمەن جانە مەنەدجەرلەرمەن بايلانىسى بار تۇلعالاردى كرەديتتەۋ بولىگىندە تاۋەكەلدى ساياسات جۇرگىزۋىن جالعاستىرا بەردى. دەگەنمەن, 2000 جىلدارى مۇنداي قىزمەت شەتەلدىك زاەم قاراجات ەسەبىنەن قارجىلاندىرىلىپ كەتسەك, سوڭعى جىلدارى مەملەكەت قاراجاتى ەسەبىنەن قارجىلاندىرىلۋدا. قازىرگى ۋاقىتتا مەملەكەتتىك حولدينگتەر مەن كۆازيمەملەكەتتىك كومپانيالاردىڭ بانكتەگى ەسەپ-شوتتارىندا 7,2 تريلليوننان استام تەڭگە بار», - دەدى بانك باسشىسى.
