ىلكىمدىلىك – ىلگەرىلەۋ كەپىلى, دەگەنمەن كەيبىر اۋدانداردا وڭ ناتيجەلەردىڭ بولماي جاتاتىنى بار. اۋدان اكىمدەرى ەسەپ بەرگەندە قاعاز بويىنشا ءبارى دۇرىس, پايىز بويىنشا جوعارى, بىراق راسىندا دا سولاي ما؟ كوپ جاعدايدا سول جەردەگى شەشىلمەي جاتقان ماسەلەنى ايتۋدان گورى, قۇجات جۇزىندە ەسەپ بەرگەندى دۇرىس سانايمىز. ەلباسى ءوزىنىڭ بيىلعى ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىندا اسىرەسە ونەركاسىپ سالاسىن دامىتۋدىڭ ماڭىزدىلىعىن اتاپ وتكەن بولاتىن. ونەركاسىپ ارقىلى ەكونوميكا دامىسا, الەۋەتتىڭ دە ارتا تۇسەتىنى ءسوزسىز.
جامبىل وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ مالىمەتىنشە, وبلىستىڭ وتكەن جىلعى الەۋمەتتىك-ەكونوميكالىق دامۋى ناتيجەلى. تاراز قالاسى مەن وزگە 7 اۋداندا ونەركاسىپ ءوندىرىسىنىڭ كولەمى 1,8 پايىزعا ارتسا, جامبىل جانە شۋ اۋداندارىندا كورسەتكىش سول قالپى. ال مەركى اۋدانىندا ءوندىرىس كولەمى تومەندەگەن. جالپى, اتالعان اۋداننىڭ قانت قىزىلشاسىن وڭدەۋمەن, سونداي-اق «مەركى ەت» جاۋاپكەرشىلىگى شەكتەۋلى سەرىكتەستىگى ارقىلى يران مەملەكەتىنە, باحرەين كورولدىگىنە توننالاپ ەكسپورتقا ەت جىبەرۋمەن اتى شىققان. بۇل رەتتە اۋداننىڭ كورسەتكىشىن جوعارى دەڭگەيدە باعالاۋعا دا نەگىز بار ەدى. الايدا وسى اۋداندا ءوندىرىس كولەمىنىڭ تومەندەگەنىن اتالعان باسقارما باسشىسى گۇلدانا جاۋىنبەكوۆا «ورتالىق ازيا قانت كورپوراتسياسى» جاۋاپكەرشىلىگى شەكتەۋلى سەرىكتەستىگىنىڭ مەركى فيليالىندا پەشتەردى جوندەۋ جۇمىستارىنىڭ جۇرگىزىلۋىمەن ءتۇسىندىرىپ وتىر.
اۋىل شارۋاشىلىعى سالاسىنداعى ءوسىم كولەمى شۋ, ت.رىسقۇلوۆ جانە قورداي اۋداندارىندا بايقالادى. ماسەلەن, ەت, ءسۇت, جۇمىرتقا, ءجۇن ءوندىرۋ كولەمى ۇلعايعان. سونىمەن قاتار ماساقتى ءداندى داقىلداردىڭ دا 2016 جىلمەن سالىستىرعاندا 34 مىڭ تونناعا ارتىق جينالعانىن ايتا كەتۋ كەرەك.
سوڭعى جىلدارى وڭىردە قۇرىلىس قارقىن الا باستادى. ماسەلەن, استانا كۇنىنە وراي تاراز قالاسىنداعى «اراي» شاعىن اۋدانىندا بوي كوتەرگەن پاتەرلەردەن 800 وتباسىنىڭ, ال تۇڭعىش پرەزيدەنت كۇنى مەن تاۋەلسىزدىك مەرەكەسى قارساڭىندا «قاراسۋ» القابىندا بوي كوتەرگەن 80 پاتەرلى ءۇيدىڭ بەرىلۋى دە وسىنى كورسەتەدى. سونىمەن قاتار اۋدانداردا دا وتكەن جىلى 33 بالاباقشا مەن 4 شاعىن ورتالىق پايدالانۋعا بەرىلگەن. الايدا ت.رىسقۇلوۆ اۋدانىندا قۇرىلىس قارقىنى تومەن بولىپ تۇر.
اۋليەاتانىڭ الەۋمەتتىك تە, ەكونوميكالىق تا الەۋەتى جاقسى. وتكەن جىلعى ەسەپتى كەزەڭدە بيۋدجەتتىڭ كىرىس بولىگى 241 ميلليارد تەڭگەنى قۇراعان. سولاي بولعانىمەن, جامبىل, قورداي, مويىنقۇم, ت.رىسقۇلوۆ جانە شۋ اۋداندارىندا ءالى دە 5 مەكتەپ اپاتتى جاعدايدا, ال 3 مەكتەپ ءۇش اۋىسىمدا جۇمىس ىستەپ كەلەدى. بۇل جەردە بالالاردىڭ دۇرىس ءبىلىم الۋى دا كۇمان تۋدىرادى. سەبەبى اپاتتى جاعدايداعى مەكتەپتىڭ قاي كۇنى, قاي ساعاتقا دەيىن شىداس بەرەتىنى بەيمالىم. وبلىستى وركەندەتۋ ءۇشىن بيۋدجەتتەن قىرۋار قاراجات ءبولىپ, قۇرىلىس جۇرگىزىپ جاتقاندا ءبىلىم وشاقتارىنا دا نازار بۇرعانىمىز دۇرىس شىعار.
سونداي-اق وتكەن جىلى وبلىستا 14 دەنساۋلىق ساقتاۋ نىسانىنىڭ قۇرىلىسى جۇرگىزىلگەن. بۇل دا ەلدىڭ دەنساۋلىعىنىڭ تۇزەلۋىنە, سىرقاتتىڭ الدىن الۋعا وڭ اسەر ەتەدى. بۇگىندە حالىقتىڭ دەنساۋلىعى بىرقالىپتى, ءولىم-ءجىتىم سانى ءبىرشاما تومەندەدى دەسەك تە, ناشاقورلىق پەن قان اينالىمى جۇيەسى اۋرۋلارىنا شالدىعۋ دەڭگەيى ءوسىپ تۇر. وتكەن جىلى وبلىس كولەمىندە ءۇش انا ءولىمى تىركەلگەن.
بىلتىرعىمەن سالىستىرۋ ارقىلى جاسالعان پايىزدىق ولشەم بۇگىندە ناقتى اتقارىلعان جۇمىستاردىڭ ەسەبىنە كىرىپ بارا جاتقانداي. ياعني 100 پايىزدان اسىرا ورىندالعان سالادا ەشقانداي ماسەلە جوق سياقتى. بىراق جامبىل وبلىسىنىڭ اكىمى اسقار مىرزاحمەتوۆ اۋدان اكىمدەرى مەن باسقارما باسشىلارىن تىڭداعان جيىندا وتكەن جىلمەن سالىستىرعاندا جوعارى كورسەتكىشكە يە بولعاندى, 100 پايىزدان اسقاندى جەتىستىك دەپ قاراۋعا بولمايتىنىن ايتقان. ءسويتىپ رەسپۋبليكالىق كورسەتكىشتەن بولەك, وبلىستىڭ كورسەتكىشىن جاساۋدى تاپسىرعان. بالكىم الداعى ۋاقىتتاردا ونەركاسىپ ءوندىرىسى تومەندەگەن اۋداندا دا, قۇرىلىسى قارقىن الا الماي وتىرعان اۋداندا دا, ءتىپتى اپاتتى مەكتەپتەر ورنالاسقان اۋدانداردا دا اتالعان ماسەلەلەر شەشىمىن تاۋىپ, كورسەتكىشكە عانا ەمەس, ناقتى ناتيجەگە دە جۇمىس ىستەيتىن كۇن تۋار.
حاميت ەسامان,
«ەگەمەن قازاقستان»
جامبىل وبلىسى
