جاقىندا سەمەيدىڭ «قارا شالى» – وتىز جىلدان استام ۋاقىت ابايدىڭ مۋزەي-ءۇيىنىڭ شىراقشىسى بولعان توكەن يبراگيموۆ دۇنيەدەن وزعاندا دا, بىردەن زەينوللا ويعا ورالعان. سول «قارا شالدىڭ» زەينوللانى جازۋشىلار ۇيىنەن شىعارىپ سالعالى جاتقاندا سەمەيدەن جەتىپ, اڭىراپ داۋىس سالىپ كەلگەنى قازالى قاۋىمنىڭ ەسىندە. جايشىلىقتا دا سول توكەڭ: «بۇل سەرىكقاليەۆ تەك جاقسىلىقتان عانا جارالعان جان عوي» دەپ سىر توگەر ەدى.
ءيا, ناۋرىز ايى كەلگەندە دە ءبىز زەينوللانى ەسكە الامىز. سوندا جۇرت ناۋرىز مەرەكەسىن تويلاعالى جاتقاندا, جايساڭ جاننىڭ دەمى تاۋسىلىپ, سول ۇلىستىڭ ۇلى كۇنى ونى اقىرعى جولعا شىعارىپ سالعانبىز. جازۋشىلار ۇيىنە ونىمەن قوشتاسۋعا قانشاما ادام جينالدى دەسەڭىزشى! تۋعان قىزىنداي بولعان قىمبات قارىنداسىمىز: «ساعىنادى سان جۇرەك, ساعىنادى, عۇمىر كەشۋ باقىت قوي ماعىنالى, قازاناتتاي قازاقتىڭ ازاماتى, قاسقايىپ جۇرە تۇرسا نەعىلادى!» دەپ جوقتاۋ ايتقاندا, جۇرتتىڭ ساي-سۇيەگى سىرقىراعانى دا ەسكە تۇسەدى. جۇرە تۇرعاندا, زەينوللا سەرىكقالي ۇلى بۇگىن 80-گە كەلەر ەدى-اۋ. ال ول بۇدان 14 جىل بۇرىن دۇنيەدەن ءوتتى.
ۋاقىت – ەمشى. قايعىنى دا جازادى ەكەن. ول تۋرالى مۇڭدى وي بىرتە-بىرتە ساعىنىشقا اينالىپ, ونىڭ ازاماتتىق كەلبەتىن, مىنەزدەرىن ەسكە الىپ, جاقسى دوسپەن قايتا كەزىككەندەي بولادى ەكەنسىڭ. مۇڭدى ساعىنىش ۇنەمى ونى ىزدەتەدى. ءبىر جاقسىلىق بولعاندا, وسىعان زەينوللا قالاي قۋانار ەدى دەيسىڭ. كوڭىلىڭدى قۇلازىتقانداي كەمشىلىك كەزىكسە, الدەبىر سوراقى قىلىققا كۋا بولعاندا, وسى ساتتە زەينوللا نە دەر ەدى, قانداي ارەكەتكە بارار ەدى دەيسىڭ. ول اردىڭ ولشەمىندەي ازامات ەدى عوي.
ارينە زەينوللا سەرىكقالي ۇلى تۋرالى ايتقاندا, ەڭ الدىمەن ونىڭ شىعارماشىلىعىنا, سوڭىنا قالدىرعان مۇراسىنا, ەلىمىزدىڭ رۋحاني ءومىرىن كەمەلدەندىرۋ ماقساتىندا اتقارعان قىزمەتىنە توقتالعان ءجون. ول ۋنيۆەرسيتەتتىڭ جۋرناليستيكا فاكۋلتەتىن بىتىرگەندىكتەن دە, ەلىمىزدىڭ ءبىرشاما ءباسپاسوز ورىندارىندا جەمىستى ەڭبەك ەتتى. «پيونەر», «جۇلدىز» جۋرنالدارىندا, «سوتسياليستىك قازاقستان» گازەتىندە, «قازاقستان», «راريتەت» باسپالارىندا ونىڭ ايشىقتى ىزدەرى قالعان. م.اۋەزوۆ اتىنداعى ادەبيەت جانە ونەر ينستيتۋتىنداعى جاۋاپتى جۇمىستارىمەن بىرگە, مۇحتار اۋەزوۆتىڭ مۇراجاي-ۇيىندە ۇزاق جىل قىزمەت اتقارىپ, ۇلى جازۋشىنىڭ تولىق شىعارمالار جيناعىن شىعارۋعا تولىمدى ۇلەس قوستى. باسپا, پوليگرافيا جانە كىتاپ ساۋداسى كوميتەتىندەگى باسشىلىق قىزمەتىندە دە, پارلامەنتتەگى قىزمەتتەرىندە دە تالاي يگى ىستەردىڭ باسىندا ءجۇردى. مۇنىڭ ءبارىن قانشالىق جاقسى اتقارعانىمەن, جالاقى الىپ, كۇنكورىستىڭ قاجەتىن وتەگەن ءىسى دەسەك, قوعامدىق نەگىزدەگى جازۋشىلار وداعى باسقارماسىنىڭ مۇشەسى, سىن كەڭەسىنىڭ توراعاسى, جازۋشىلاردىڭ حالىقارالىق قاۋىمداستىعى تەكسەرۋ كوميسسياسىنىڭ مۇشەسى, بۇۇ-عا جاردەمدەسۋ قاۋىمداستىعى باسقارماسىنىڭ مۇشەسى, ۇكىمەت جانىنداعى ادەبيەت, ونەر جانە ساۋلەت سالاسىنداعى مەملەكەتتىك سىيلىقتار جونىندەگى كوميسسيانىڭ مۇشەسى رەتىندەگى اتقارعان جۇمىستارىنىڭ دا ءوزى نە تۇرادى؟!
قالدىرعان مۇراسى دەگەندە, عىلىمي-زەرتتەۋ, سىن كىتاپتارى, تاماشا اۋدارمالارى, مادەنيەت, ونەر جايىنداعى تانىمدىق جيناقتار ۇلكەن سورەنى تولتىرار ەدى. اسىرەسە سىن كىتاپتارىندا ادەبيەتىمىزدىڭ, ونەرىمىزدىڭ, مادەنيەتىمىزدىڭ كەلەلى ماسەلەلەرى تەرەڭ عىلىمي نەگىزدە, فيلوسوفيالىق پايىمدا تالداندى. كىتاپتارىنىڭ ءبىر ەرەكشەلىگى – ولاردىڭ مازمۇنى, كوتەرگەن ماسەلەسى قوسالقى اتاۋىنان ايقىن اڭعارىلىپ, وقىرماندى ويعا شاقىرىپ تۇرار ەدى. قاراڭىز: «ويلار, تولعانىستار. قازاق ادەبيەتىنىڭ قازىرگى ماسەلەلەرى» (1967), «جىلدار سازى. ادەبي سىن, زەرتتەۋ» (1971), «اقىل تارازىسى. عىلىمي جانە كوركەمدىك تانىم ەرەكشەلىكتەرى» (1976), «اق جول. سىن كىتابى: ماقالالار, زەرتتەۋلەر» (1990), «دۇنيەتانۋ دانالىعى. جوعارى وقۋ ورىندارى ۇستازدارى مەن ستۋدەنت جاستارعا ارنالعان وقۋ قۇرالى» (1994), «تاعدىر جانە ءبىز. ادەبي-سىنشىلدىق كوزقاراستار, تولعانىستار, ەسسە» (1997), «التىن جامبى. قازىرگى كوركەمدىك وي تانىمدارىنا كوزقاراس: تالداۋ, تولعانىستار» (2001).
نەگىزگى كىتاپتارىن اتاساق تا, وعان تالداۋ جاساۋعا جۇرەگىڭ داۋالامايدى. تىم كۇردەلى. اۋقىمدى. ءبىر-ەكى اۋىز سوزبەن ولاردى تۇجىرىمداي المايسىڭ. ايتار كەڭەسىڭ – ولاردى وقۋ كەرەك. وكىنبەيسىڭ. ساناڭ بايدى. بۇل كىتاپتارعا حالىقارالىق «الاش» سىيلىعى, مەملەكەتتىك سىيلىق جايدان-جاي بەرىلگەن جوق. سول اسىل دۇنيەلەردەن زەكەڭنىڭ ءوزىن, ونىڭ ازاماتتىق كەلبەتىن تاپقانداي بولاسىڭ.
ەندى ونىڭ سول ازاماتتىق كەلبەتىنە ويىسايىقشى. مۇنى ونىڭ ءار قادامىنان, باسقالارمەن قارىم-قاتىناسىنان, جاي ءجۇرىس-تۇرىسىنان دا اڭعارار ەدىڭ. زەينوللا قۋانا دا بىلەتىن, ارعا تيەتىن ارەكەتكە كەزىكسە رەنجي دە الاتىن. قۋاناتىن كەزى كوپ ەدى. جولداستارىنىڭ, تانىستارىنىڭ قۋانىشى ونىڭ دا قۋانىشى بولار ەدى. قۋانعاندا, ەرەكشە قۋانار ەدى. وزىنشە, زەينوللاشا قۋانار ەدى.
وقۋدى بىتىرگەننەن كەيىن مەن سىرتتا ءبىراز جىل جۇرىڭكىرەپ, الماتىعا كەيىنىرەك ورالدىم. زەينوللا الدىمنان شىقتى. ءوزى جاقىن ارالاساتىن ورتاعا كىرگىزگىسى كەلگەن. اسقار سۇلەيمەنوۆپەن تانىسۋىم ەستە قالىپتى. زەينوللانىڭ قالاعانىنا قاراماي, ەتەنە جاقىنداسىپ كەتە المادىق. ۇشەۋىمىز ءبىر وتىرعاندا: «مىناۋ ناحالنىي, ءوز دەگەنىنە باسقانىڭ كونگەنىن قالايدى. سەن وعان كونبەسسىڭ. تەك رەنجىسىپ قالماڭدار» دەپ كۇلگەن. راس, جاقىن تابىسا المادىق. سىيلاستىقپەن شەكتەلدىك. ونىڭ ەسەسىنە, ايتوتى-قىمبات اپامىزبەن ءتىل تابىسقانىمىز ەشقاشان ۇمىتىلمايدى.
اسقار دۇنيەدەن وتكەننەن كەيىن ونىڭ اناسى جايىندا زەينوللا اڭىزداي اڭگىمە ايتتى. اپامىزعا سالەم بەرىپ قايتايىقشى دەپ ءوتىنىش ايتتىم. ءسويتىپ زەينوللا ەكەۋمىز ۇلكەن الماتى وزەنىن بويلاپ, تاۋ جاققا قاراي جاياۋ تارتتىق. 5-6 شاقىرىمداي ءجۇرىپ جەتتىك. قىمبات اپامىز اسقاردىڭ بالاسى, ءوزىنىڭ نەمەرەسى الىشەردىڭ ۇيىندە تۇرادى ەكەن. قانداي كەزدەسۋ بولدى دەسەڭىزشى! ايتوتى-قىمبات اپامىزبەن كەزدەسۋىمىز, ول كىسىمەن سۇحباتتاسۋ ءوز الدىنا اڭگىمە. قازىرگى مەنىڭ ايتپاعىم – زەينوللانىڭ ءوز دوستارىنىڭ تۋىستارىمەن قارىم-قاتىناسى. مۇنداي قارىم-قاتىناس ادامدارىنا قاراي قالىپتاساتىن شىعار. اسقارداي ۇل وسىرگەن ادام دا تەگىن ەمەس. زەينوللا – سول ۇلدىڭ دوسى. جيىرەك كەزدەسەتىن اينالىپ-تولعانۋ, كوزگە الىپ, جاس ەلجىرەپ جاتۋ ەمەس, ءبىرتۇرلى ونداي كۇيرەكتىكتەن جوعارىلاۋ, دەگدارلىق قارىم-قاتىناس. كوڭىلدى كوتەرەتىن, ادامدى ءوزىمسىتىپ جاقىنداتا تۇسەتىن جۇمساق, ادەمى قالجىڭدار قانداي! اسقار اناسىمەن قاتتى قالجىڭداسادى ەكەن. زەينوللا دا قالجىڭعا باستى. اسقار قانداي بولسا, مەن دە سوندايمىن دەگەندى سوزبەن ەمەس, وسىنداي قارىم-قاتىناسپەن اڭعارتتى. كەيىن زەينوللا دۇنيەدەن وزعاندا ايتوتى اپامىز ونىڭ وتباسىنا كەلىپ, تۋعان بالاسىنان ايىرىلعانداي جوقتادى.
جولداستىققا مارتتىك, دوسقا ادالدىق ونى ايرىقشا ەرەكشەلەندىرىپ تۇراتىن. بۇعان قاتىستى اڭگىمە كوپ. زيالى قاۋىمعا بەلگىلى ازامات, تەلەۆيدەنيە جانە باسپا ءىسىنىڭ بەلگىلى قايراتكەرى ماقسۇت اۋباكىروۆ ءبارىمىز بىرگە وقىدىق. جان-جاقتى شىعارماشىلىق قابىلەتى بار ازامات ءبىراز جىل ءتۇرلى اكىمشىلىك قىزمەتتە ءجۇردى دە. ءوزىنىڭ شىعارماشىلىق مۇمكىندىگىنە ونشا كوڭىل بولمەدى, ايتپەسە توگىلتىپ-توگىلتىپ ولەڭ دە جازاتىن, مولدىرەتىپ كوسەمسوزدى دە جازىپ تاستايتىن. بىراق سول قابىلەتىنە كوپ ءمان بەرە قويمايتىن. سوعان ءبارىمىز دە, اسىرەسە زەينوللا كوبىرەك رەنجىگەندەي بولاتىنبىز. جازسايشى دەيتىنبىز.
ماقسۇت ءبىرشاما جازىپ تا ءجۇرىپتى. سول جازعانىنان ۇزىندىلەرىن كەيىن گازەت-جۋرنالدارعا دا باستىردى. وكىنىشكە قاراي, اتپال ازامات ومىردەن ەرتەرەك وزدى دا, جازىپ جۇرگەن ۇلكەن شىعارماسى اياقتالماي قالدى. سول دۇنيەنى زەينوللا قولعا الدى. ءبىراز شارۋاسى بار ەكەن. ءتىپتى بىتكەن دۇنيەنى اۆتوردىڭ قايتا قارايتىنى دا بار عوي, ال بىتپەگەن نارسەنى اياقتاۋ وڭاي ەمەس. سوعان زەينوللا بىرنەشە ايىن ارناپ, تاپجىلماي وتىرىپ ءبىتىرىپ شىقتى. ول ءوزى قاعازى جوق, كىتاپ شىعارۋدىڭ قيىننان قيىن كەزەڭى ەدى, تاعى دا ءبىر باسپاگەر نۇرماحان ورازبەكتەي جومارت ازامات ارالاسىپ, رومان جارىق كوردى. ماقسۇتقا ۇلكەن ەسكەرتكىش تۇرعىزىلدى. زەينوللا بولماسا, سول كىتاپتىڭ شىعۋى ەكىتالاي ەدى. وعان زەينوللانىڭ جازۋشىلىق تالانتى, جان جومارتتىعى كەرەك ەدى. مۇنداي قاسيەتتەردىڭ باسقالاردان تابىلا بەرۋى دە سيرەك قوي.
ايتپەسە ونىڭ اقىن ومىرزاق قوجامۇراتوۆتىڭ شىعارماشىلىق مۇراسىنا قامقور بولۋى – ازاماتتىقتىڭ بيىك ونەگەسى. جۇرت ءوز كىتابىن شىعارا الماي جاتادى. ال زەينوللا وسىناۋ اقىننىڭ قولجازبالارىن ىزدەپ وزبەكستانعا بارىپ, باسىن قۇراپ, ەكى كىتاپ شىعاردى. ءبىر اقىندى قايتا ءتىرىلتتى دەسەك بولادى. بۇل زەينوللاداي ۇلكەن جۇرەكتى ازاماتتىڭ عانا قولىنان كەلەدى.
ادامداردىڭ تانىلاتىن نارسەسى كوپ قوي. ءتىپتى قالاي دەمالاتىنىنا قاراپ تا ولاردىڭ كىم ەكەنىن اڭعارا الاسىڭ. زەينوللا تاۋعا شىعىپ دەمالعاندى جاقسى كورەتىن. تاۋعا بىرگە شىعىپ جۇردىك. باستاۋشىمىز – فوتوشەبەر نۇرعوجا اعامىز جۇبانوۆ. ۇلكەنىمىز – 80 جاستاعى اكادەميك بۇركىتباي ايدارحانوۆ. ءبارىمىز تابيعات-اناعا بالادايمىز. سوندا زەينوللا: «كەرەمەت قوي! قانداي سۋرەت! مۇنى ەشقانداي سۋرەت گالەرەياسىنان تابا المايسىڭ. جۇرت وسىنى نەگە تۇسىنبەيدى, نەگە تاۋعا شىقپايدى؟ ءبارىمىز ءبىر-ءبىر ادامدى ەرتىپ شىقساق, ودان كەيىن ءوز كەزەگىندە ولار دا باسقالاردى ەرتىپ شىقسا, قانشا ادام عاجايىپ دۇنيەمەن قاۋىشار ەدى!» دەپ ارمانداپ تا كەتەتىنى بولۋشى ەدى.
سول تاۋعا شىعىپ جۇرگەندە, بىزگە ءبىر وي كەلدى دە, سونى زەينوللامەن بولىستىك. حالقىمىزدا اۋليەلەردىڭ, اتاقتى ادامداردىڭ باسىنا بارىپ زيارات ەتەتىن ءداستۇر بار. سونى جاڭاشا جاڭعىرتىپ, ۇلىلارىمىزدىڭ باسىنا جاياۋ ساپارمەن بارىپ قۇرمەت كورسەتسەك, جۇرتقا وي سالعانداي ءىس بولماي ما دەدىك. زەينوللا بىردەن قولدادى. «سول ساپارلارعا قالايدا مەن دە قاتىسامىن» دەدى. كەيىن «ەگەمەن قازاقستان» گازەتىنىڭ داستۇرگە اينالعان « ۇلىلىققا تاعزىم» جاياۋ ساپار اكتسياسىن وتكىزۋ يدەياسى وسىلاي دۇنيەگە كەلگەن.
بۇل يدەيانىڭ ءوزى ۇلى ابايدىڭ 150 جىلدىق مەرەيتويىنا بايلانىستى تۋعان ەدى. رەداكتسيا باسشىلىعى ونى قولدادى. سەمەيدەن قاراۋىلعا دەيىنگى 181 شاقىرىم جولدى ءبىر توپ ادام بەس كۇندە جاياۋ ءجۇرىپ كەلگەنىمىزدى اۋدان جۇرتشىلىعى ۇلى جەرلەستەرىنە كورسەتىلگەن ەرەكشە قۇرمەت, تاربيەلىك ءمانى جوعارى شارا دەپ قابىلداپ, بىزگە ءبىراز قوشەمەت كورسەتتى. ساپارعا قاتىسقان ءتورت ادامعا «اباي اۋدانىنىڭ قۇرمەتتى ازاماتى» اتاعىن بەردى. سونىڭ ءبىرى – زەينوللا.
بۇدان كەيىنگى ساپارلاردان زەينوللا قالعان ەمەس. ءتىپتى ءبىر جولى باسشىلىعى جۇمىس كوپ دەپ, ونى بوساتقىسى كەلمەگەندە, سوندا ول جوعارعى كەڭەستىڭ اپپاراتىندا ىستەيتىن, وندا جۇمىستان دا كەتەمىن دەپ شارت قويىپ, ساپارعا قاتىسقانى بار. زەينوللامەن بىرگە جامبىلدىڭ 150 جىلدىعى, مۇحتار اۋەزوۆ پەن قانىش ساتباەۆتىڭ, كەيىنىرەك عابيت مۇسىرەپوۆتىڭ 100 جىلدىق, سونداي-اق تۇركىستان قالاسىنىڭ 1500 جىلدىق مەرەكەلەرى قارساڭىنداعى جاياۋ ساپاردا بىرگە جۇردىك.
سول ساپارلارىمىزدى زەينوللا ەرەكشە باعالايتىن. وعان ايرىقشا ازىرلەنەتىن دە. جول-جونەكەي حالىقپەن كەزدەسۋلەردە تەبىرەنە سويلەر ەدى. ونىڭ اڭگىمەلەرىنە حالىق تا وزگەشە ىقىلاس بىلدىرەتىن. ءار ساپارىمىزدان ءبارىمىز دە جەلپىنىپ قايتۋشى ەدىك. «كەرەمەت بولدى. ەندى مۇنى توقتاتپاي, جالعاي بەرەيىكشى» دەيتىن زەكەڭ.
« ۇلىلىققا تاعزىم» جاياۋ ساپارىن زەينوللا باردا جەتى رەت وتكىزدىك. سوڭعىسىنا ول قاتىسا المادى. ءدال وسى ساپارعا قاتىسسام دەپ ارماندايتىن. ۇلىلارىمىزعا قۇرمەت كورسەتكەنىمىز ءوز الدىنا, وسىناۋ ساپارلار كەزىندە ءبىز ەلىمىزدىڭ شىعىسىندا, وڭتۇستىگىندە, سولتۇستىگىندە, ەرتىس وزەنىنىڭ, سىرداريا وزەنىنىڭ بويىندا بولعانىمىز بار ەدى. ەندى ەلىمىزدىڭ باتىسىندا, زەينوللانىڭ تۋعان وڭىرىندە, جايىقتىڭ بويىندا بولماق ەدىك. بىزگە تۋعان ولكەمدى تانىستىرسام دەيتىن.
ۇلى ماحامبەتتىڭ 200 جىلدىق مەرەيتويى قارساڭىندا ول اۋرۋحانادا جاتتى. الماتىدان اتتانار ساپارشىلار زەكەڭە كىرىپ-شىققانبىز. ادەتىنشە ەلجىرەپ, ك ۇلىپ قارسى الىپ, ك ۇلىپ شىعارىپ سالعان. «كەلەسىسىنە قاتىسامىن عوي» دەگەن. وعان ءدام جازبادى عوي.
زەكەڭ تۋرالى, ونىڭ ازاماتتىق كەلبەتى تۋرالى ايتاتىن اڭگىمە كوپ. ونىڭ قايسىبىرىن ايتىپ تاۋىساسىڭ. جانى جومارت ازامات. جاقسى جولداس. ادال دوس. سۇيىكتى جار. مۇنىڭ ءبارى پەندەگە ءتان قاسيەتتەر. ومىردە تىم كوپ بولماسا دا, كەزدەسىپ جاتادى. ال زەينوللا ەڭ الدىمەن, ۇلكەن قايراتكەر. بەلگىلى ادەبيەتشى. بۇل ەندى كوپ ادامعا ەمەس, تاڭداۋلىلاردىڭ عانا پەشەنەسىنە جازىلاتىن ۇلەس.
ادەبيەتكە ايرىقشا ادال ادام ەدى عوي. مىناداي ءبىر جايت كوڭىلگە ورالادى. مەملەكەتتىك سىيلىققا ءبىراز ادامدار ۇسىنىلىپ, ءبىراز جۇرت الاشاپقىندا جۇرگەن كەز ەدى. زەينوللا سەرىكقالي ۇلى – سول سىيلىقتار جونىندەگى كوميسسيانىڭ مۇشەسى. ءبىر ۇمىتكەر, ورتاق تانىسىمىز قولقا سالدى. زەينوللاعا ايتۋ كەرەك. ءوزى دە جاقسى تانيدى. سويتسە دە, جاقىنداۋ جۇرگەن مەن ايتسام, اسەرلىلەۋ بولار دا ەدى-اۋ. ايتتىم. زەكەڭ كۇمىلجىپ, ىڭعايسىزدانا سويلەدى: ء«وزىم دە ونى جاقسى بىلەمىن عوي, وزىمە-اق ايتپادى ما... تۇسىندىرەر ەدىم عوي. بۇل جولى قاليحانعا داۋىس بەرمەسەم, ادەبيەتكە وبال بولادى عوي» دەدى. «جارايدى» دەسە, كىمنىڭ كىمگە داۋىس بەرگەنىن كىم ءبىلىپ جاتىر. مەن دە ريزا, ۇمىتكەر تانىسىمىز دا ريزا. زەينوللا ويتە المايدى. شىنىن ايتىپ, ازاماتتىعىن ءبىلدىردى. قاليحان ىسقاقوۆتى تاڭداپ, ادەبيەتكە ادالدىعىن ءبىلدىردى.
بىردە زەينوللا «ۋاقىت جانە تالعام (قازىرگى كوركەمدىك وي تانىمىنا كوزقاراس)» دەپ اتالاتىن كولەمدى ماقالاسىنىڭ قولجازباسىن رەداكتسياعا الىپ كەلدى. ماشينكاعا باستىردىق. وقىپ شىعىپ, پىكىرىمدى ءبىلدىردىم. قاتقىلداۋ كورىندى. زەكەڭ جۇمسارتقىسى كەلمەدى. گازەتكە تىم ۇزاقتاۋ كورىندى. زەكەڭ قىسقارتقىسى كەلمەدى. «اڭگىمە مەنىڭ جەكە باسىما قاتىستى بولسا, ءتىپتى وسىنى جازباس تا ەدىم عوي. اڭگىمە ادەبيەت جايىندا بولىپ تۇر عوي, قايتىپ جۇمسارتام, قايتىپ قىسقارتام؟!» دەپ شىرىلدادى زەكەڭ. ادەبيەت ءۇشىن. كەيىن سول ماقالا ونىڭ مەملەكەتتىك سىيلىق العان «التىن جامبى» كىتابىنا بەتاشار ماقالا بوپ كىردى.
كىممەن ارالاسسا دا, قايدا جۇرسە دە ادالدىقتىڭ اق تۋىن كوتەرىپ جۇرەتىن ازامات ارامىزدان كەتپەگەن سياقتى كورىنەدى دە تۇرادى. ونى ءبىز ۇنەمى ىزدەيمىز. قۋانعاندا ىزدەيمىز, رەنىشتى جاعداي شارشاتقاندا ىزدەيمىز, سوندا ول ادەمى ساعىنىش بولىپ ورالادى. جاقسى ادامنىڭ ورالعانى قاشاندا جاقسى. زەينوللا ارقاشان بىزبەن بىرگە.
ماماديار جاقىپ,
قازاقستاننىڭ قۇرمەتتى ءجۋرناليسى
