– اللو, بالام, بۇگىن مەن تۇنگى كەزەكشىلىكتەمىن. تاماعىڭدى دايىنداپ قويدىم, كەشىكپەي قايت ۇيگە...
– دا, مام...
بايلانىس سوڭعى ءسوزدى ايتىپ ۇلگەرگەنشە ءۇزىلىپ كەتتى.
گۇلزيانىڭ قالقامانداعى اۋرۋحانادا حيرۋرگ بولىپ قىزمەت ەتكەنىنە ءبىراز جىل. دانيار جالعىز ۇلى. ءوزى اسىراپ, جەتكىزىپ كەلەدى. بيىل ون التىعا شىقتى. كوللەدجدىڭ اقىلى بولىمىندە وقيدى. كولىك اپەر دەپ قىلقىلداعالى التى اي بولدى. دوستارىنىڭ الدى «بەنتلي» ءمىنىپتى.
قايدا, جالعىز مۇنىڭ اقشاسى «تويوتاعا» جەتسىن بە... حيرۋرگتىڭ تابىسى جامان ەمەس نەگىزى, اسىرەسە وتا جاسار الدىندا قالتاسى قامپيىپ قالاتىنى بار.
«...ادامدار دا قىزىق قوي, تاپ اجالدان بۇل الىپ قالاتىنداي, مىنە جانى شىعاردا سۇيرەتىلىپ كەلەدى دە, يمانىنا دەيىن حيرۋرگتىڭ الاقانىنا ءيىرىپ سالۋعا شاق. ءيا, دامە دەگەن ادامدى بۇزا باستايدى ەكەن. قازىر بولىمدەگى قىزدار كەزەكشىلىككە شىققاندا قانشا تاپقانىن ايتىپ جارىساتىنداي جاعدايدا... وتكەندە, پەريزاتقا كولىك اپاتىنا تۇسكەن بالاسىنىڭ جاراسىن جۋىپ بەرگەنى ءۇشىن عانا ءبىر بايشىكەش ۋىستاپ دوللار ۇستاتا ساپتى. اجەتحانادان شىقپاي ساناعان ول پاقىر ءبىر جىلاپ, ءبىر ك ۇلىپتى. ەندى, باقانداي 1800 دوللاردى ۇستاتا سالسا... بايلار جومارت قازىر. اسىرەسە, جاقىندارى كولىك اپاتىنا ۇشىراعاندا جاندارى بەزەك قاعادى. سوسىن بۇلار دا قالتالىنى الىستان اجىراتاتىن بولعان. ايتپەسە, قالتاعا تيىن سالماق تۇگىلى, ءوزىڭدى ءتۇتىپ جەيتىن كەدەي-كەپشىك تولىپ جاتىر. باستىققا شاعىنىپ, سوتقا بەرەمىن دەپ بايبالام سالاتىنىن قايتەسىڭ...».
گۇلزيا وسىنداي وي جەتەگىمەن ىرعاتىلىپ وتىرعاندا ءنومىرى 16-اۆتوبۋس قالقامانعا جەتىپ تە قويدى.
– گۋليا ءامىرجانوۆنا, ەرتە كەلگەنىڭىز قانداي جاقسى بولدى. قازىر عانا مومىش ۇلىنىڭ بويىندا بولعان اپاتتان ادامداردى الىپ كەلدى. جەدەل وپەراتسياعا كىرەسىز.
اعا مەدبيكە تىزاقتاپ ءجۇر ەكەن. حيرۋرگيانىڭ ءدالىزى پوليتسياعا تولىپ كەتىپتى. باس كيىمىن مىجعىلاي بەرگەن پودپولكوۆنيك, بۇعان قارسى ءجۇردى: «دوكتور, بالا مەنىكى ەدى. جالعىز ۇلىم عوي... قۇتقارىڭىز, باس سۇيەگى جارىلعان دەيدى, قۇتقارىپ قالىڭىز. ايانبايمىن, بارىم سىزدىكى, دارىگەر...». بۇل قارتاڭ پودپولكوۆنيكتىڭ جالىنىشتى جۇزىنە ك ۇلىمسىرەي قاراپ جۇرە بەرگەن.
نە... قاسىنان مەدبيكەلەر جۇگىرە سۇيرەتىپ وتكەن زەمبىلگە نازار اۋدارماسا دا, كەۋدەسى شىم ەتە ءتۇستى. القىنىپ كەتكەنى نەسى؟.. «مىناۋ كوك دجينسي شالباردى قايدان كورىپ ەدى. كەتشى, نە كوپ, شالبار كوپ ەمەس پە؟» مىرس ەتكەن ول وتا بولمەسىنە بەتتەگەن.
...اۋىر وتا جاساعانى وسى شىعار. ەكى ساعات بويى سىنعان باس سۇيەكتى تازالاپ, ۇزىلگەن قان تامىردى جالعاپ, اقىرى جاس جىگىتتى قۇتقاردى-اۋ... دارىگەرلەر بولمەسىنە بەتتەگەن ونى تاعى دا اعا مەيىربيكە توقتاتتى. «گۋليا ءامىرجانوۆنا, مىندا تاعى ءبىر اۋىر سوققى العان بالا بار. ەسىن جيماي جاتىر, باسىنان سوققى العان, گەماتوم بولۋى كەرەك. ءوزىنىڭ ارتىنان ەشكىم كەلمەي جاتىر. قارايسىز با؟», – دەدى شىر-پىرى شىعىپ.
– جانىم-اۋ, ارتىنان جاقىندارى ىزدەمەسە ءبىز نە ىستەي الامىز؟ پروتسەدۋرانى جاساي بەرىڭدەر, كىرىپ شىعامىن...
دارىگەرلەر بولمەسىنىڭ ەسىك اۋىزىندا مۇنى پودپولكوۆنيك كۇتىپ تۇر ەكەن.
– دارىگەر...
– ءتىرى بالاڭىز, الىپ قالدىق!
بۇل قاتقىلداۋ سويلەگەن. اناۋ ءيىلىپ الەك...
– قازىر, سۋ ىشۋگە مۇرسات بەرەسىزدەر مە ءوزى؟
كابينەتكە كىرە قول سومكەسىنەن ۇيالى تەلفونىن ىزدەگەن. 12 رەت قوڭىراۋ شالىنىپتى. «توقتا, دانيار نەگە ىزدەدى ەكەن سونشا...».
– اللو, دانكو...
– اللو, اللو, – ارعى جاقتاعى ەر ادامنىڭ داۋسى قۇلاعىن جارىپ جىبەرە جازدادى, – ءسىز بۇل تەلەفوننىڭ يەسىنە كىم بولاسىز؟
– مەن... مەن ماماسىمىن!
– ماماسى, سابىر ەتىڭىز, مەن اۋەزوۆ اۋداندىق جول پوليتسياسىنىڭ قىزمەتكەرى بولامىن. ءسىزدىڭ ۇلىڭىز جول اپاتىنا ءتۇسىپ, قالقامانداعى اۋرۋحاناعا جونەلتىلدى... اللو, اللو...
سوڭعى ءسوزدى ەستىمەگەن گۇلزيا كابينەتتەن يتتەن قاشىپ شىققانداي تاپىراقتاي جونەلدى.
«باسە, باسە, كوك دجينسي شالبار...»
قالماحانبەت مۇقامەتقالي,
«ەگەمەن قازاقستان»
