مينيستر Astana Hub حالىقارالىق IT-ستارتاپتار تەحنوپاركىن قۇرۋ يدەياسى «تسيفرلى قازاقستان» مەملەكەتتىك باعدارلاماسى اياسىندا قامتىلعانىن, سونداي-اق جوبا تۇجىرىمداماسى حالىقارالىق تاجىريبەنى زەرتتەۋ نەگىزىندە دايىندالعانىن اتاپ ءوتتى. «تەحنوپارك دارىندى ءىت-ماماندار ءۇشىن جاڭا تەحنولوگيالىق باستامالار الاڭىنا اينالارىنا سەنىمدىمىز. سونىمەن قاتار بۇل الاڭ ۇلتتىق يننوۆاتسيالىق ەكوجۇيەنىڭ وزەگى بولۋى ءتيىس. تەحنوپارككە وتاندىق جانە شەت مەملەكەتتەردەن ستارتاپتاردى تارتا وتىرىپ, تسيفرلى ەكونوميكانى قولداۋ ءۇشىن بارلىق جاعدايدى جاساۋعا تىرىسامىز. Astana Hub-تىڭ نەگىزگى ماقساتى – 2025 جىلعا قاراي جەرگىلىكتى ءىت-كومپانيالاردىڭ كاپيتالىن 1 ملرد اقش دوللارىنا جەتكىزۋ. بۇگىن وسى اكسەلەراتسيا باعدارلاماسىن اشۋ ارقىلى ماڭىزدى قادام جاساپ وتىرمىز», دەدى د.اباەۆ.
ال ءوز كەزەگىندە Astana Hub حالىقارالىق IT-ستارتاپتار تەحنوپاركىنىڭ باسشىسى ماعجان ماديەۆ «Garage» جانە «C-Lab» ستارتاپ-باعدارلامالارىنىڭ قازىرگى ناتيجەلەرىمەن ءبولىستى. «اتالعان باعدارلامالار اياسىندا ءبىز يدەيا جانە پروتوتيپ كەزەڭىندە تۇرعان ستارتاپ-كوماندالارمەن جۇمىس جۇرگىزەمىز. «Garage» پرەاكسەلەراتسيالىق باعدارلاماسىنا 151 ءوتىنىم كەلىپ ءتۇستى, ولاردىڭ ىشىندەگى 43 جوبا Demo Day-گە وتكىزىلدى. «C-lab» باعدارلاماسىنا 100-دەن اسا ءوتىنىم جىبەرىلدى. بۇگىن قاتىسۋشىلار العاش رەت كورپوراتسيالارمەن كەزدەسىپ وتىر, ءارى قاراي كوماندالارمەن ەتەنە جۇمىس جۇرگىزىلىپ, اقپاراتتىق سەسسيالار, جەكە كەڭەس بەرۋلەر وتكىزىلەدى, يدەيانى دامىتىپ, ونىڭ ءپروتوتيپىن جاسايتىن بولامىز. جازدا جوبالاردى تەستىلەپ, كومپانيالاردىڭ بازاسىندا ىسكە قوسقالى وتىرمىز», دەپ اتاپ ءوتتى م.ماديەۆ.
«Garage» باعدارلاماسى اياسىندا كوماندالار ءوز ستارتاپىنىڭ يدەياسىن تەستىلەپ, ەڭ كەم دەگەندە جۇمىسقا جارايتىن ءونىمدى (MVP) جاساپ شىعارۋعا, العاشقى كليەنتتەردى تارتىپ, ءوز جوبالارىن ينۆەستورلارعا تانىستىرۋعا مۇمكىندىك الماق.
كەشە ءاربىر كوماندا ءوز بيزنەس-جوباسىن تانىستىردى, ولاردىڭ ىشىندەگى ۇزدىكتەرى «Garage» ستارتاپ-ينكۋباتورىنا قاتىسۋ ءۇشىن تاڭدالدى. وسىلايشا ءىسىن جاڭادان باستاعان كاسىپكەرلەر تاجىريبەلى تالىمگەرلەردىڭ قول استىندا جوبانى باسقارۋ, ءونىم جاساۋ جانە ماركەتينگ جونىندە تەگىن بىلىمدەردى يگەرۋگە مۇمكىندىك الادى. ستارتاپ-جوبالاردى تانىستىرۋمەن قاتار, جاستار اراسىندا كاسىپكەرلىك مادەنيەتتى دامىتۋ جانە وتاندىق بيزنەستى حالىقارالىق نارىققا شىعارۋ تاقىرىبىنا ارنالعان ەكى پانەلدىك سەسسيا ءوتتى.
دينارا بىتىك,
«ەگەمەن قازاقستان»
