وتباسىمەن بىرگە ەرەكشە بيزنەستى قولعا الىپ, قوعامعا دا, ادامعا دا اعىل-تەگىل پايدا كەلتىرە باستاعان ولار بۇگىندە بودەنە ءوسىرۋ ۇستىندە. اينالىسىپ جاتقانىنا از عانا ۋاقىت وتسە دە, شارۋاشىلىعى شاما-شارقىنشا جان-جاعىنا شاپاعاتىن شاشا باستاعان. جالپى, نۇرا اۋدانىنا قارايتىن يزەندى اۋىلى قۇت قونىپ, ىرىس دارىعان بەرەكەلى مەكەن. ونداعى ءبىر عانا «وتقانجار» جشس-نىڭ ءوزى اۋىلدىڭ وزەگىنە اينالىپ كەتكەن. ءبىز ايتىپ وتىرعان جاس كاسىپكەر جارلىعاسىن ساتىبالدين دە اۋەلدە اسەم استانادان يزەندى اۋىلىنا وسى سەرىكتەستىكتى ارقا تۇتىپ كەلگەن. كوشىپ كەلگەن العاشقى ۋاقىتتا-اق «وتقانجار» جشس ديرەكتورى قانات وتارباەۆ اۋىلدا تۇراقتاپ قالۋ, شارۋاشىلىعىن دامىتۋ ماقساتىندا ەكى تۇرعىن ءۇي بەرەدى. باستاپقىدا ءۇيدى جابدىقتاپ, جارى ايناش ەكەۋى بودەنەنىڭ 50 جۇمىرتقاسىن ساتىپ الادى. بودەنەلەردى باپتاپ قولعا ۇيرەتۋگە بولاتىنىن بايقاعان سوڭ, تاعى 300 بودەنە ساتىپ الۋعا بەل بۋادى. ۋاقىت وتە كەلە ءوز قاراجاتى ەسەبىنەن استىقتى ۇنتاقتاۋشى, ءبىر رەت پايدالانىلاتىن ماشينا, ينكۋباتور جانە باسقا قاجەتتى جابدىقتار ساتىپ الىپ, بۇگىندە «دىنمۇحامەد» جەكە كاسىپكەرلىگىن اشىپ وتىر. اتالمىش شارۋاشىلىق قازىرگى تاڭدا بودەنەدەن كۇنىنە 400 جۇمىرتقا الىپ وتىرعان جايى بار. قۇس شارۋاشىلىعىندا 600 ەركەك, 400 ۇرعاشى بودەنە بار. بۇدان باسقا تاعى 2300 ەتتى برويلەر تاۋىق ءوسىرىپ, شارۋاشىلىقتىڭ شالعايىن كەڭەيتۋدە. الداعى ۋاقىتتا قاز, ۇيرەك, كۇركەتاۋىق, ەتتى بودەنە ءوسىرۋدى كوزدەپ وتىر.
قازىرگى زامانعى يندۋستريالى قۇس شارۋاشىلىعى ەكى باعىت بويىنشا داميدى: ەتتى جانە جۇمىرتقالايتىن قۇستار. ال ءونىمنىڭ ەكى ءتۇرى تابىستىلىعى بويىنشا باسقا ءۇي قۇستارىنان الدەقايدا اسىپ تۇسەدى ەكەن.
– مەنىڭ قولعا العان بيزنەسىمە كوپ ادامداردىڭ تاڭىرقاي قاراۋى مۇمكىن. بىردەن «نەگە بودەنە؟» دەگەن سۇراق قويىلاتىنى سودان. بۇل قۇستىڭ ەتى مەن جۇمىرتقاسىنىڭ ەمدىك قاسيەتىنىڭ بار ەكەندىگى مەديتسينادا دالەلدەنگەن. ەتى ءدامدى ءارى شيپالى, جەڭىل قورىتىلادى. ماسەلە ءىستىڭ كوزىن تابۋدا. بودەنەنى دە قولعا ۇستاۋعا بولادى ەكەن. راس, باستاپقىدا كوپ قيىندىقتار بولدى. تۇششى سۋدان قانشاما قۇسىمىزدى قىرىپ الدىق. ەرەكشە كۇتىم مەن باپتاۋدىڭ ارقاسىندا جونگە كەلىپ قالدىق دەسەم بولادى. ۋاقىت وتە كەلە بۇل قۇستاردىڭ ءتىلىن تاپقانداي بولدىم. جەم-سۋىن ۋاقىتىندا بەرىپ, كۇتىمىنە ەرەكشە كوڭىل بولىنسە, بودەنەنىڭ بەرەتىن تابىسى مول. وعان كوزىم تولىق جەتتى, – دەيدى جاس كاسىپكەر شارۋاشىلىعى جايلى.
جەتىستىك جەڭىل جولمەن كەلمەيتىنى اقيقات. ال كاسىپكەردىڭ پايىمداۋىنشا, تاۋىقتارعا قاراعاندا بودەنە ءوسىرۋ جەڭىل كورىنەدى. جۇمىرتقاسى دا سونداي جۇعىمدى قاسيەتكە يە. بودەنەنىڭ جۇمىرتقاسى مەن ەتى جاس بالالاردىڭ اقىل-ەسىنىڭ تەز دامۋىنا يگى اسەرىن تيگىزەدى ەكەن. بودەنەنىڭ جۇمىرتقالارى ەرەكشە قاسيەتكە, اتاپ ايتقاندا, ادام اعزاسىنىڭ راديونۋكليدتەرىن جويۋعا, جۇرەك-قان تامىرلارى بەلسەندىلىگىن جاقسارتۋعا جانە يممۋنيتەتتى كوتەرۋگە كومەكتەسەدى. ەمدىك قاسيەتىنە بايلانىستى بودەنە ەتى مەن ونىڭ جۇمىرتقاسىنا سۇرانىس جوعارى بولعانىمەن, اۋىلدىق جەردە, تۇرعىنداردىڭ وزدەرىنىڭ قۇستارى بار جەردە ونى ساتۋ مەن تاسىمالداۋدىڭ اجەپتاۋىر قيىندىقتارى بار ەكەنى بايقالادى. سوعان قاراماستان جاس كاسىپكەر جارىلعاسىن ءساتىبالديننىڭ ويعا العان ماقساتتارى جەتكىلىكتى-اق. ەرەكشە كاسىپ يەسىنە الار اسۋلارى بيىك ءارى بولسىن دەيمىز.
ميراس اسان,
«ەگەمەن قازاقستان»
قاراعاندى وبلىسى,
نۇرا اۋدانى
