«ارينە, ءبىز بانكتەردى قارجىلاندىرۋ ماقساتىندا ۇلتتىق قوردان ءبىرشاما قاراجات بولدىك. ويتكەنى, بانكتەر – ەل ەكونوميكاسىنىڭ كۇرەتامىرى. ەگەر قيىن جاعدايدا ولارعا كومەكتەسىپ, قول ۇشىن سوزىپ, قۇتقارىپ قالماساق تۇتاس ەكونوميكامىز كەرى كەتۋى مۇمكىن», دەگەن مەملەكەت باسشىسى قارجىلىق نارىقتى تىعىرىقتان شىعارۋ ارەكەتىمىز ەلدىڭ الەۋمەتتىك تۇرمىستىق ماسەلەلەرىنىڭ تۇزەلۋىنە قالاي اسەر ەتەتىندىگىن ءتۇسىندىردى.
«وزدەرىڭىز بىلەسىزدەر مۇعالىمدەردىڭ جالاقىسىن 30 پايىزعا دەيىن كوتەردىك. قازىرگىدەي جاعدايدا ۇستازدارىنىڭ الەۋمەتتىك جاعدايىنىڭ تۇزەلۋى ءۇشىن وسىنشالىقتى كوڭىل ءبولىپ وتىرعان ەلدەر سانى از. ال ەندى بانكتەردى قارجىلاندىرۋ مەن الەۋمەتتىك سالا قىزمەتكەرلەرىنىڭ جالاقىسىن بايلانىستىرا وتىرىپ, ماسەلەنى قاراپايىم تىلمەن ءتۇسىندىرىپ كورەيىن. ءبىز ەكى-ءۇش جىل بۇرىن مەديتسينالىق قىزمەت سالاسىن ءساتتى رەفورمالاي الدىق. قازىر بۇل باعىتتاعى جۇمىستار زاماناۋي تالاپپەن ۇيلەسىپ, الەمدىك تاجىريبەگە ساي قىزمەت كورسەتۋدە. ەندىگى جەردە ءبىلىم سالاسىن دا وسىلاي رەفورمالاۋ قاجەت. ماسەلەن, جاڭا تەحنولوگيانى جەتىك مەڭگەرگەن, ءبىلىم بەرۋدىڭ زاماناۋي ۇلگىسىن وزىق يگەرگەن مۇعالىمنىڭ جالاقىسىنا 30 پايىز كولەمىندە ۇستەماقى تولەنە باستادى. سول سياقتى جوعارى وقۋ ورىندارىندا دا وسىنداي جۇيە قولدانىسقا ەنۋدە. ايتالىق, جوعارى ساناتتى ۇستازدىڭ سوڭىنان جۇرگەن ستۋدەنتتەردىڭ كوپتىگىنەن ونىڭ ءبىلىم-بىلىگى باعالانادى. ولارعا 50 پايىزعا دەيىن ۇستەماقى تولەنۋدە. مىنە, بۇل جۇيە نارىقتىق ەكونوميكانىڭ زاڭدىلىعى. الەۋمەتتىك سالانىڭ تۇرالاپ قالماۋى ءۇشىن قارجىلىق ينستيتۋتتارعا ۇلتتىق قور ارقىلى قولداۋ كورسەتۋدەمىز. ول قارجى كەلەشەكتە قايتارىلاتىن بولادى», دەدى پرەزيدەنت.
