تاۋەلسىزدىك تۇسىنداعى تولاعاي تابىستارىمىزدا ەلباسىنىڭ ەڭبەگى ولشەۋسىز. بۇعان سىرتتا دا, ىشتە دە ەشكىم ءشۇبا كەلتىرە المايدى. قىتاي حالقىنىڭ «وتپەلى كەزەڭدە ءومىر ءسۇرۋدى قۇداي باسقا بەرمەسىن» دەگەن تاعىلىمدى ماقالى بار. 90-شى جىلداردىڭ باسىنداعى كۇيىمىز قانداي ەدى؟! قازىر قانداي كۇي كەشىپ جاتىرمىز؟! ەكى ارادا شيرەك عاسىر ءوتتى دەۋ ساناعا سىيمايتىنداي كورىنەدى. ەلباسىنىڭ دانا باسشىلىعىمەن ءبىز كەڭەس وداعىنان كەيىنگى وتپەلى كەزەڭنەن الدىرماي-شالدىرماي, ابىرويمەن وتتىك.
جان-جاقتان رەسەي جانە قىتاي سياقتى الىپ ەلدەر ىقپال ەتۋگە تىرىسقان, كوپ ۇلتتى, كوپ كونفەسسيالى ەلدە ءبارى بولۋى مۇمكىن ەدى. گرۋزيادا, قىرعىزستاندا نە بولعانىن, ۋكراينادا نە بولىپ جاتقانىن ءبارىمىز بىلەمىز. ال ءبىزدىڭ ەلىمىزدە تىنىشتىق, تۇسىنىستىك, تۇراقتىلىق ورنادى. ءارالۋان ۇلتتاردىڭ, ۇلىستاردىڭ قارىم-قاتىناسىندا ىنتىماق, بىرلىك قالىپتاستى. مۇنداي ۇردىستەر وزدىگىنەن بولعان جوق. بۇعان ءبىز جان-جاقتى ويلاستىرىلعان ىشكى جانە سىرتقى ساياساتتىڭ ارقاسىندا قول جەتكىزدىك.
دەر كەزىندە رەت-رەتىمەن ءارتۇرلى رەفورمالار, جاڭعىرۋلار, ەل ءۇشىن, حالىق ءۇشىن شەشۋشى ماڭىزى بار شارالار قولعا الىنىپ, جۇزەگە اسىپ جاتىر. ءبىز وزىمىزبەن ءوزىمىز بولىپ, ءوز مۇددەلەرىمىزبەن شەكتەلىپ, باسقالارمەن بايلانىسپاي ءومىر ءسۇرىپ جاتقان جوقپىز. الەمدىك ساياساتقا ارالاسىپ, جەر بەتىندە بولىپ جاتقان ۇردىستەرگە وزىمىزشە ۇلەس قوسىپ كەلەمىز. بۇكىلالەمدىك ساياساتتىڭ تەتىگىن ۇستاپ وتىرعان ەلدەردىڭ باسشىلارى قازاقستانمەن, ونىڭ پرەزيدەنتى ن.ءا.نازارباەۆپەن ساناساتىن, اقىلداساتىن بولدى. مۇنى قالاي ايتپاسقا؟!
وسىنىڭ ءبارىن جەتكىنشەك جاستارىمىزعا ءتۇسىندىرۋىمىز كەرەك. وسى ءۇردىستى جالعاستىراتىن سولار. سەبەبى ەلباسى قالىپتاستىرعان داستۇرلەر ساپىندا ءۇزىلىس بولماۋى كەرەك. جاڭا كىتاپ وسى ماقساتقا كومەگىن تيگىزەرى ءسوزسىز.
ەلباسى جىل سايىنعى جولداۋلارىندا, باعدارلامالىق سوزدەرىندە, كەزدەسۋلەرىندە قاداۋ-قاداۋ ماسەلەلەردى قوزعاپ, تايعا تاڭبا باسقانداي ەتىپ ناقتى تاپسىرمالار بەرىپ, ءىرى مىندەتتەر قويىپ جاتادى. ايتقانىنىڭ ءبارى ورىندى, ءبارى ناقتى. بيلىك تارماعىنا جاستاردى دا, ايەلدەردى دە ءجيى-ءجيى تارتىپ كەلەدى. وزىنە ارتىلعان سەنىمدى بىرەۋ اقتاسا, ەندى بىرەۋىنىڭ شاماسى كەلمەي جاتادى. ءبىز ەلباسىمەن ماقتانۋىمىز كەرەك, ونىڭ ەڭبەگى, ەلىمىزدىڭ جەتىستىكتەرى وسىنداي سۇبەلى دۇنيەلەرگە ارقاۋ بولا بەرۋگە ءتيىس.
تىلەكجان رىسقاليەۆ,
فيلوسوفيا عىلىمدارىنىڭ دوكتورى, پروفەسسور
ورال
