فوتو: ەرلان ومار, "ەگەمەن قازاقستان"
سالتاناتتى شارادا ءسوز سويلەگەن پرەمەر-مينيستر كەڭسەسى باسشىسىنىڭ ورىنباسارى, ساياساتتانۋشى ەرجان باباقۇماروۆ بۇگىن وتە ماڭىزدى كىتاپتى تۇساۋى كەسىلگەنىن اتاپ ءوتتى. «مەنىڭ ويىمشا, بۇل جاي عانا كىتاپ ەمەس, بۇل - قازاقستان پرەزيدەنتى نۇرسۇلتان نازارباەۆتىڭ وتكەنگە جانە بولاشاققا كوزقاراسى. كىتاپتا وسى جىلدار ارالىعىندا بولعان وقيعالار سارالانعان. سونىمەن قاتار مۇندا تەك فاكتىلەر عانا ەمەس, تالقىلاۋ دا, تەرەڭ پايىم دا, بولاشاققا جاسالعان بولجامدار دا بار. مەن كىتاپتىڭ قۇندىلىعى بارلىعىمىز ءۇشىن ايقىن كورىنىپ تۇر دەپ ويلايمىن. سەبەبى كىتاپتىڭ اۆتورى - پرەزيدەنت نۇرسۇلتان نازارباەۆ وقيعالاردىڭ كۋاگەرى, قاتىسۋشىسى عانا ەمەس. ونى تاۋەلسىز مەملەكەتىمىزدىڭ تاريحىن جاساۋشى دەۋگە دە بولادى. سوندىقتان بۇل كىتاپ قاجەتتىلىگىن جوعالتپايتىن تۇتاس ءبىر ءداۋىردىڭ ماڭىزدى قۇجاتى ىسپەتتى», دەدى ەرجان باباقۇماروۆ. ونىڭ ايتۋىنشا, كىتاپتىڭ باستى ەرەكشەلىگى - نۇرسۇلتان نازارباەۆ تاۋەلسىز قازاقستاننىڭ ىرگەسىن كوتەرۋ كەزەڭىن الەمدىك وقيعالارمەن قاتار وربىگەنىن اسەرلى كورسەتكەن. «قازاقستان تاۋەلسىزدىك العان كەزەڭدە الەمدە دە ءتۇرلى وزگەرىستەر بولىپ جاتتى. قازاقستانداعى وقيعالار الەمدەگى ءىرى وزگەرىستەر كەزەڭىنە تۇسپا-تۇس كەلدى», - دەي كەلە پرەمەر-مينيستر كەڭسەسى باسشىسىنىڭ ورىنباسارى توقسانىنشى جىلدارى ەكونوميكا, ساياسات, الەۋمەتتىك سالادا زور وزگەرىستەر بولعانىن ايتتى.
ء«بىز توتاليتارلىق جۇيەنى ىسىردىق. نارىقتىق ەكونوميكاعا وتتىك. «تاۋەلسىزدىك ءداۋىرى» كىتابىندا پرەزيدەنت نۇرسۇلتان نازارباەۆ مەملەكەت تاريحىنداعى جاڭعىررۋ كەزەڭدەرىن كورسەتكەن. مىسالى, 1990 جىلدارى ەكونوميكادا, ساياساتتا, الەۋمەتتىك سالالاردا ۇشتىك ترانزيت كەزەڭى بولعانى بەلگىلى. ءدال وسى كەزەڭدە ءبىز نارىقتىق ەكونوميكاعا كوشتىك. ەكىنشى جاڭعىرۋ كەزەڭى 1990-2010 جىلدار ارالىعىندا بولدى. بۇل كەزدەرى ەكونوميكا جىلدام دامىدى. جاڭا استانا سالىندى. ەڭ باستىسى, قازاقستان-2030 ستراتەگياسىن ورىنداپ, باسەكەگە قابىلەتتى 50 مەملەكەتتىڭ قاتارىنان كورىندىك», دەي كەلە ەرجان باباقۇماروۆ قازاقستاننىڭ الەمدە بولعان ەكى داعدارىستان امان شىققانى مەملەكەت رەتىندە تولىق قالىپتاسىپ ۇلگەرگەنىمىزدىڭ ايعاعى ەكەنىن ايتتى.
«پرەزيدەنت كىتاپتا بىزدىڭ قوعام ءۇشىن ەڭ كۇردەلى بولعان كەزەڭدەر تۋرالى تالداپ جازعان. سونىمەن قاتار قازاقستان-2050 ستراتەگياسىندا جاڭا ماقساتتار قويىلعانىن, مەملەكەتىمىزدىڭ الەمدەگى ۇزدىك توپ-30 قاتارىنا كىرۋگە تالپىنىس جاساعانىن اتاپ وتكەن. 2014-2016 جىلدارى الەمدە گەوساياسات, گەوەكونوميكا, جاڭا تەحنولوگيالارعا قاتىستى الەمدە وتە كۇردەلى پروتسەستەر باستالعانى بەلگىلى. سول كەزەڭدە قازاقستاندا «نۇرلى جول» باعدارلاماسى مەن 5 ينستيتۋتسيونالدى رەفورما قابىلداندى. نەبارى ءۇش جىلدىڭ ىشىندە مەملەكەت جاڭا جاھاندىق احۋالدارعا بەيىمدەلىپ كەتت. 2016 جىلدىڭ سوڭىندا ەكونوميكالىق ءوسىمدى قايتا قالپىنا كەلتىردىى», دەدى ەرجان باباقۇماروۆ. ونىڭ ايتۋىنشا, پرەزيدەنت كىتاپتا قابىلدانعان شەشىمدەردىڭ ىشكى لوگيكاسىن كورسەتە وتىرىپ, سول ارقىلى قيىندىقتاردى قالاي ەڭسەرگەنىن كورسەتكەن.
ء«دىني, ۇلتتىق مادەني, ءتىل, ۇلت بولاشاعىنا قاتىستى ەڭ وزەكتى سۇراقتارعا كەلگەندە كۇردەلى ماسەلەلەر شەشىمىن تاپتى. رەسەي-تۇركيا قارىم-قاتىناسىن رەتتەۋدىڭ ءمان-جايى بەلگىلى بولدى. مەن ءۇشىن «تاۋەلسىزدىك ءداۋىرى» بۇل تەك وتكەن جىلدار تۋرالى كىتاپ قانا ەمەس, ءبىزدىڭ ەلدىڭ دامۋ جولىنىڭ بولاشاقتا قانداي قاعيداتتارعا سۇيەنۋ كەرەكتىگىن كورسەتەتىن تۋىندى. كىتاپتا نۇرسۇلتان نازارباەۆ مەملەكەتتى باسقارۋ, ستراتەگيالىق جوسپارلاۋ تاجىريبەسى كورىنىپ تۇر», - دەدى ەرجان باباقۇماروۆ. ول ءسوزىن قورىتىندىلاي كەلە ابىلاي حاننىڭ ء ۇش ارمانى بولعانىن ەسىنە الدى. «ابىلاي حان قازاقتاردىڭ الەمنىڭ ءتورت تۇكپىرىمەن بەيبىتشىلىكتە ءومىر سۇرگەنىن, حالىقتىڭ وتىرىقشى ءومىر سالتىنا كوشكەنىن, ءۇش ءجۇزدىڭ باسى قوسىلعانىن قالاپتى. قازىر وسى ءۇش ارمانعا دا قولىمىز جەتتى. مەنىڭ ويىمشا, پرەزيدەنتتىڭ بۇل تۋىندىسى حالىق ارمانىنىڭ ورىندالعانى تۋرالى كىتاپ», دەدى ول.
گۇلنۇر قۋانىشبەكقىزى,
«ەگەمەن قازاقستان»
