قازاق زيالىلارىنىڭ الپىسىنشى جىلعى تولقىنى باستاعان سول ءۇردىس ۇدايى جاس ۇرپاقتان قولداۋ تاۋىپ, ءار ءسات سايىن جاڭا قادامدار جاساپ وتىردى. ودان ءارى احمەت جۇبانوۆ «عاسىر پەرنەلەرى», «زامانا بۇلبۇلدارى» دەپ ءان مەن كۇيدىڭ مول قازىناسىنا باستاۋ سالىپ كەتسە, كەيىنىرەك بۇل سالا اقسەلەۋ سەيدىمبەكتىڭ «قازاقتىڭ كۇي ونەرى» دەگەن ىرگەلى ەڭبەگىمەن جالعاسىن تاۋىپتى.
ەڭبەك جولىن جۋرناليست, جازۋشى بولىپ باستاعان اقسەلەۋ سلان ۇلىنىڭ عۇمىر جولى كۇرەسكە, قايراتكەرلىككە تولى. عىلىمي تاريحتا كوپ ايتىلا بەرمەيتىن «قازاقتىڭ اۋىزشا تاريحى» كىتابىنىڭ ءوزى – قازاق بولمىسىنىڭ ايشىقتى ورنەگىندەي. اقسەلەۋ سەيدىمبەكتىڭ جازۋ ونەرىنەن بولەك, زەرگەرلىك بۇيىمداردى دا ءوزى جاساۋى ەڭ الدىمەن ۇلتىن تانۋ, ءوزىن تانۋ, سول ارقىلى قازاق بولمىسىن جۇرتقا ناسيحاتتاۋ ەدى. ءوز قولىمەن جاساعان دومبىراسى, قامشىسى, تاياعى, شاقشاسى بۇگىن جادىگەرگە اينالعان. ءار قازاقتىڭ دەمەسەك تە, جالپى ۇلت بويىنان وشپەۋگە ءتيىس اتا ونەردىڭ ءبىرى – وسى. ۇنەمى ۇلتقا قاجەت دەيتىن تاقىرىپتىڭ توڭىرەگىنەن تابىلىپ, ۇدايى جاس ۇرپاققا كەرەك دەگەن تانىمدىق دۇنيەلەردى جازعان, سول ارقىلى قازاق بولمىسىنىڭ ىزدەۋشىسىنە اينالعان اقسەلەۋ سەيدىمبەكتىڭ دۇنيەگە كەلگەنىنە بيىل 75 جىل. مارقۇمدى ەسكە الۋ ءۇشىن ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە «اقسەلەۋ سەيدىمبەك جانە تاريح عىلىمىنداعى شەجىرەتانۋ ماسەلەلەرى» اتتى حالىقارالىق عىلىمي-تاجىريبەلىك كونفەرەنتسيا ءوتتى.
ۋنيۆەرسيتەت جانىنداعى «قازاقستان حالقى اسسامبلەياسى تولەرانتتىلىعى جانە ەتنوسارالىق قاتىناستار ورتالىعى» ۇيىمداستىرعان شاراعا شەتەلدەن عالىمدار, ەلىمىزدىڭ بەلگىلى مەملەكەت جانە قوعام قايراتكەرلەرى, اقىن-جازۋشىلار قاتىستى. حالىقارالىق كونفەرەنتسيا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى, ۇعا اكادەميگى ەرلان سىدىقوۆتىڭ العى سوزىمەن اشىلىپ, جيىنعا ەۇۋ-ءدىڭ الەۋمەتتىك-مادەني دامۋ جونىندەگى پرورەكتورى, اكادەميك ديحان قامزابەك ۇلى مودەراتورلىق جاسادى. پلەنارلىق ماجىلىستە مەملەكەتتىك سىيلىقتىڭ لاۋرەاتى ق.سالعارا «اقسەلەۋ – ۇلتتىق تۇلعا», قازاقستان حالقى اسسامبلەياسى تولەرانتتىلىعى جانە ەتنوسارالىق قاتىناستار ورتالىعىنىڭ ديرەكتورى, تاريح عىلىمدارىنىڭ دوكتورى, پروفەسسور س.سىزدىقوۆ «ورتاعاسىرلىق قارلىق تۇركىلەرىنىڭ قازاق شەجىرەسىمەن بايلانىسى», ۇعا اكادەميگى ح. ءابجانوۆ «ساكرالدى گەوگرافيا: ءمانى, قۇرىلىمى, كەلەشەگى», فيلولوگيا عىلىمدارىنىڭ دوكتورى, پروفەسسور ش. ىبىراەۆ «قازاقتىڭ ءداستۇرلى مادەنيەتىن زەرتتەۋشىسى», فيلولوگيا عىلىمدارىنىڭ دوكتورى ب.راحىموۆ «سەلەۋلى دالا پەرزەنتى» تاقىرىبىندا باياندامالار جاسادى. كونفەرەنتسيا بارىسىندا ا.سەيدىمبەك تۋرالى دەرەكتى فيلم كورسەتىلىپ, عالىم تۋرالى كىتاپتاردىڭ تۇساۋكەسەر ءراسىمى ۇيىمداستىرىلدى. حالىقارالىق شارا «ەۋرازيانىڭ اۋىزشا تاريح ءداستۇرى (شەجىرە)» جانە «ادەبيەتتانۋ, ءتىلى ءبىلىمى جانە جۋرناليستيكانى زەرتتەۋ ماسەلەلەرى» تاقىرىبىندا ەكى سەكتسيا بويىنشا ءوز جۇمىسىن جالعاستىردى.
اقسەلەۋ سلان ۇلىنىڭ ەل بىرلىگىن ساقتاۋ, مەملەكەت تاۋەلسىزدىگىن نىعايتۋ, ۇلت رۋحانياتىن ۇلىقتاۋ تاقىرىبىنا جازعان تاعىلىمدى ەڭبەكتەرى ءوز الدىنا ءبىر توبە. وتىزعا جۋىق كوركەم, عىلىمي-كوپشىلىك, مونوگرافيالىق ەڭبەكتەر جازىپ, سوڭىنا مول مۇرا قالدىرعان اقسەلەۋ سەيدىمبەكتىڭ ارداقتى ەسىمى – قازاق جۇرەگىندە.
باعاشار تۇرسىنباي ۇلى,
«ەگەمەن قازاقستان»
