كەيىننەن ونىڭ ەسىمى تەك قازاق جۇرتىنا عانا ەمەس, سونىمەن بىرگە سول داۋىردەگى وداققا دا كەڭىنەن تانىلدى. تاريحي تۇلعا ەڭ الدىمەن اكەسى اشقان مەكتەپتە ءالىپبيدى بەس ساۋساعىنداي مەڭگەرىپ, بۇدان كەيىن ورىنبور مەن پەتەربور قالالارىندا ءبىلىم مەن عىلىمنىڭ قيا شىڭىنا قاراي قۇلاش سەرمەيدى. زياتكەر قالا پەتەربوردا قازاقتىڭ تۇڭعىش اسپيرانتى اتانادى. ول ۆ.ۆ.بارتولد, ن.يا.مارر, ا.ن.سامويلوۆيچ جانە ۆ.ا.بوگوروديچكي سىندى الەمگە ايگىلى شىعىستانۋشى عالىمداردىڭ الدىنان ءوتىپ, دارىستەرىن تىڭداعان. سونىمەن بىرگە پەتەربورداعى بىرقاتار ساڭلاق عالىمدارمەن تىزە قوسىپ, قاتار جۇرگەن. ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ رەكتورى, فيلولوگيا عىلىمىنىڭ دوكتورى, پروفەسسور باۋىرجان ەردەنبەكوۆ جۇبانتانۋ عىلىمي-زەرتتەۋ ورتالىعىنىڭ اشىلۋ ءراسىمى كەزىندە ءسوز ارناسىن وسى تۇستان تارقاتتى.
وسى باسقوسۋ كەزىندە ايتىلعانداي قۇدايبەرگەن جۇبانوۆ نەبارى 38 جىل عۇمىر كەشىپ, «قىزىل قىرعىننىڭ» قۇربانى بولىپ كەتە باردى. ءبىرتۋار عالىمنىڭ ەسىمى الەمدىك لينگۆيستيكانىڭ وزىق داستۇرلەرىن تەرەڭ ءارى جان-جاقتى يگەرۋىمەن ەرەكشە. ول وسى قىسقا عۇمىرىنىڭ ىشىندە قازاق ءتىل ءبىلىمى مەن تۇركولوگيا ماسەلەلەرىنە قاتىستى عىلىمي زەرتتەۋلەر جازىپ, كەيىنگى ۇرپاققا ۇسىنىپ كەتتى.
ءوز داۋىرىندە جۇبانوۆ الاقانىنىڭ جىلۋىن ماۋلەن بالاقاەۆ جانە عاينەددين مۇساباەۆ سىندى كەيىنگى قازاق ءتىل ءبىلىمى عىلىمىنىڭ كورنەكتى وكىلدەرىنە اينالعان عالىمدار دا سەزىنگەنى ءوز الدىنا بولەك ءبىر اڭگىمە. قۇدايبەرگەن جۇبانوۆتىڭ ەسىمىن يەلەنگەن جاڭا زەرتحانا ونىڭ ەڭبەكتەرىن زەرتتەۋ نىسانىنا اينالدىرۋ ماسەلەسىنە جاڭاشا ءبىر قىرىنان كەلەدى دەپ سەنىم ارتقىمىز كەلەدى. وزگەسىن ايتپاعاندا قايتالانباس تۇركىتانۋشى عالىم كەزىندە قازاق ءتىلىنىڭ لاتىن الىپبيىنە كوشۋىن قولداپ, بۇل ماسەلەگە بايلانىستى ءوزىنىڭ عىلىمي-زەرتتەۋ ەڭبەكتەرىن جازعانىن دا كوپشىلىك بىلە بەرمەۋى مۇمكىن. وسى تاقىرىپتىڭ ءوزى دە تۇتاس ءبىر عىلىمي جوبانىڭ تاقىرىبىنا سۇرانىپ تۇرعانداي كورىنەدى.
سونداي-اق تاريحي تۇلعانىڭ جان-جاقتىلىعى مەن وي-ءورىسىنىڭ كەڭدىگى جانە اقىل-پاراساتىنىڭ تەرەڭدىگى تىلدىك-لينگۆيستيكالىق تۇرپاتتاعى تۇيىندەردى جالاڭ قاراستىرماي ونى ادەبيەت پەن مۋزىكا جانە تۇركولوگيا سىندى عىلىم سالالارىمەن بايلانىستىرا قاراستىرۋىنان دا ايقىن كورىنىس تابا الادى. جاڭادان اشىلعان جۇبانوۆتانۋ عىلىمي-زەرتتەۋ ورتالىعىنىڭ ماماندارى عالىمنىڭ ارتىنا قالدىرعان وسى قىرلارىنا دا كوڭىل اۋدارسا يگى. ءبىر سوزبەن ايتقاندا قۇدايبەرگەن جۇبانوۆتىڭ عىلىمي ەڭبەكتەرى ەلىمىزدىڭ رۋحاني قازىناسىنىڭ قاتارىنان ورىن الاتىن قۇندى دۇنيەلەر ەكەنى انىق. جۇبانوۆتانۋ عىلىمي-زەرتتەۋ ورتالىعى ونىڭ وسى قادىر-قاسيەتىن كەيىنگى ۇرپاقتىڭ بويىنا ورنىقتىرۋ ماقساتىن قويىپ وتىر.
تەمىر قۇسايىن,
"ەگەمەن قازاقستان"
