وبلىستىق اۋرۋحانا دارىگەرلەرىنىڭ حابارلاۋىنشا, ءالى 9 جولاۋشى ەم قابىلداۋدا. سونىمەن قاتار, 2 ناۋقاس حيرۋرگيالىق بولىمدە, 3 ادام تراۆماتولوگيا بولىمىندە ورتاشا اۋىر حالدە. ال جاعدايى اۋىر 2 جولاۋشى جانساقتاۋ بولىمىنەن ءالى اۋىستىرىلماعان.
جول اپاتىنان زارداپ شەككەن تاعى 2 ءبۇلدىرشىن وبلىستىق بالالار اۋرۋحاناسىندا ەمدەلىپ جاتىر. ناۋقاستىڭ ءبىرى - 2007 جىلى تۋعان. ونىڭ سان سۇيەگىنە سىرتقى فيكسەرلەۋشى قۇرىلعىنى قولدانۋ بويىنشا وتا جاسالىپ, ءارى قاراي ەمدەۋ جانە تەكسەرۋ بويىنشا كەڭەس بەرىلگەن. ءجاسوسپىرىمنىڭ قازىرگى تاڭداعى جالپى جاعدايى اۋىر. ال, 2011 جىلى تۋعان ۇل بالا جانساقتاۋ بولىمىنەن تراۆماتولوگيا جانە ورتوپەديا بولىمىنە اۋىستىرىلعان, جاعدايى تۇراقتى.
جاڭاوزەن قالالىق اكىمدىگىندە جول كولىك وقيعاسىنان زارداپ شەككەندەردىڭ جانۇيالارىنا مورالدىك جانە ماتەريالدىق كومەك كورسەتۋ ءۇشىن جۇمىسشى توبى قۇرىلعان بولاتىن. قازىرگى تاڭدا جۇمىسشى توپ قايتىس بولعانداردىڭ جانۇيالارىنا قاجەتتى ماتەريالدىق كومەكتەر كورسەتۋدە. «قازاقستان تەمىر جولى» اق تاراپىنان قايتىس بولعان 9 جانۇيانىڭ وتباسىنا 1 ملن. تەڭگەدەن, اۋىر جاراقات العان 9 ادامعا 600 مىڭ تەڭگەدەن جانە ورتاشا جانە جەڭىل جاراقات العان 18 ادامعا 300 مىڭ تەڭگە كولەمىندە اقشالاي قاراجات بەرىلگەن.
سونىمەن قاتار, جول كولىك وقيعاسىنان زارداپ شەككەندەرگە ماتەريالدىق كومەك كورسەتۋ ماقساتىندا قوعامدىق قور قۇرىلىپ, قالا تۇرعىندارى مەن وبلىس اۋماعىندا ورنالاسقان مەكەمەلەردەن 300 مىڭ تەڭگە اۋدارىلعان.
قازىرگى ۋاقىتتا جەرگىلىكتى پوليتسيا قىزمەتى جول كولىك وقيعالارىنىڭ الدىن الۋ ماقساتىندا قوعامدىق كولىكتەردە ارتىق جولاۋشىلار تاسىمالىنىڭ الدىن الۋ باعىتىندا كۇندەلىكتى جەدەل-پروفيلاكتيكالىق شارالار وتكىزۋدە. اكىمدىك تاراپىنان قوعامدىق كولىكتەرگە ءۇش مەزگىل مونيتورينگ جۇرگىزىلىپ جاتىر.
25 قاراشادا جاڭاوزەن قالاسى مەن تەڭگە اۋىلى اراسىنداعى تەمىر جول وتكەلىندە جولاۋشىلار تاسىمالداۋشى №3 قوعامدىق كولىگى مەن تەپلوۆوز سوقتىعىسقان بولاتىن. اپات كەزىندە 9 جولاۋشى قايتىس بولىپ, 27-ءسى جاراقات العان ەدى.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى
