كونفەرەنتسيانى ءبىلىم جانە عىلىم مينيسترلىگىنىڭ عىلىم كوميتەتىنە قاراستى زوولوگيا ينستيتۋتى مەن «قانسونار» رەسپۋبليكالىق اڭشىلىق شارۋاشىلىعى قاۋىمداستىعى بىرلەسىپ ۇيىمداستىردى.
كونفەرەنتسيادا العاشقى ءسوزدى العان «قانسونار» قاۋىمداستىعىنىڭ توراعاسى ورالباي ابدىكارىموۆ بۇل شاراعا ۇلتتىق مۇراعا بەيجاي قاراي المايتىن قوناقتاردىڭ قاتىسىپ وتىرعانىن ايتتى.
«قۇسبەگى ەشقاشان ءتىرى تابيعاتتى اياققا تاپتامايدى. باردىڭ قادىرىن ءبىلىپ, قۇسى ارقىلى تابيعاتتىڭ جان دۇنيەسىن تانيدى. بۇل تابيعات بايلىعىنا ۇكىپتى قاراۋعا تاربيەلەيدى. ءبىز مۇمكىندىگىمىزشە وسى باعىتتا ءبىرشاما جۇمىس اتقارۋعا تىرىسىپ كەلەمىز. ايماقتاردا جىرتقىش قۇستاردى تىركەپ, ساناۋدان بولەك, قازاق داستۇرىنە ساي, ۇلتتىق اڭشىلىق ويىندارىن وتكىزۋدەمىز», دەدى و.ابدىكارىموۆ. ايتۋىنشا, مۇنداي شارالار اڭشىلىق تۇرلەرىنە قوعام قىزىعۋشىلىعىن ارتتىرىپ, بۇركىتشىلەردىڭ داستۇرلەرى مەن مەكتەبىن ساقتاپ قالۋعا ۇلەس قوسادى.
كونفەرەنتسيا بارىسىندا قاتىسۋشىلار قازاقستان اۋماعىنداعى قۇسبەگىلىك تۋرالى ءسوز قوزعاپ, بۇگىنگى جاي-كۇيىن تالقىلادى. قازاقستان, قىرعىزستان, تۇرىكمەنستان, رەسەي, موڭعوليا مەن قىتايداعى قۇسبەگىلىك جايىندا تاريحي دەرەكتەرمەن ءبولىستى.
«قانسونار» قاۋىمداستىعىنىڭ باس ديرەكتورى الەكساندر بەربەر تاۋەلسىزدىكتىڭ العاشقى جىلدارى قازاقستاندا بۇركىتشىلەردىڭ سانى ساۋساقپەن سانارلىق بولعانىن, ال قىران باپتاۋشىلاردىڭ مۇلدە بولماعانىن تىلگە تيەك ەتتى.
قازىرگى ەل اۋماعىندا 105 بۇركىت پەن 17 سۇڭقار سالىپ وتىرعان 102 ادام بار. ولاردىڭ سانى جىل وتكەن سايىن ارتا تۇسۋدە. ەسەسىنە, قارتايىپ نەمەسە قايتپاي قالىپ جاتقان قۇستاردىڭ ورنىن تولتىرۋعا دەگەن تالاپ تا ارتىپ كەلەدى. قازاقستانداعى قۇسبەگىلەر مەكتەبىن دامىتۋعا ارنايى كۆوتا قاراستىرىلماعان. مەكتەپ باسشىلىعىنا جىل سايىن تابيعات اياسىنان بىرنەشە قۇستى الىپ ۇيرەتۋلەرىنە تۋرا كەلىپ تۇر.
وسىعان قاراماستان الماتى, قاراعاندى, شىمكەنت قالالارىنداعى «اق سۇڭقار», «ميلەنيۋم سوكول», «Heaven Star» تالىمباقتارىندا كوممەرتسيالىق باعىتتا قۇس ءوسىرىپ, ونى ءساتتى تۇردە جۇزەگە اسىرىپ وتىر. بۇل سالادا كورشى قىرعىز ەلىندەگىدەي ازاماتتارعا ارنايى سەرتيفيكات پەن اڭشى-بۇركىتشى كۋالىكتەرىن بەرۋ جەتىسپەي وتىر. ءبىزدىڭ ۇسىنىسىمىزدى ەسكەرە وتىرىپ, قۇقىقتىق-نورماتيۆتىك بازانىڭ نىعايۋى ءداستۇرلى قۇسبەگىلىكتى ودان ءارى دامىتىپ, بولاشاق ۇرپاق ءۇشىن ساقتاپ قالۋعا جول اشار ەدى دەدى ا.بەربەر.
كونفەرەنتسيانىڭ اياسىندا جويىلۋدىڭ از الدىندا تۇرعان يتەلگىنى ساقتاپ قالۋ ماسەلەلەرى تالقىلاندى.
ساپارباي پارمانقۇل,
«ەگەمەن قازاقستان»
الماتى
