«روسس 128 ب» دەپ اتالاتىن جاڭا عالامشاردىڭ عالىمداردى قىزىقتىرۋىنىڭ سەبەبى كوپ. بىرىنشىدەن, ونىڭ كولەمى جەرمەن بىردەي. ەكىنشىدەن, «روسس 128 ب» كۇن جۇيەسىنەن 11 جارىق جىلىنا تەڭ قاشىقتا ورنالاسقان. ياعني, جاڭا ەكزوپلانەتا تىم الىستا ەمەس. ۇشىنشىدەن, عالامشار ءومىر سۇرۋگە قولايلى بەلدەۋدە ورنالاسقان.
زەرتتەۋشىلەردىڭ ايتۋىنشا, ەكزوپلانەتانىڭ تەمپەراتۋراسى جەرگە وتە ۇقساس بولۋى ىقتيمال. سوندىقتان, وندا تىرشىلىككە ىڭعايلى جاعداي جاسالعان. جاڭا عالامشار ءوز وربيتاسىن 10 تاۋلىككە جۋىق مەرزىمدە اينالىپ شىعادى. ونى جىلۋمەن قامتاماسىز ەتىپ تۇرعان «روسس 128» قىزىل ەرگەجەيلى جۇلدىزىنا جاتادى.
ايتسە دە, «روسس 128 ب» جەرگە ەڭ جاقىن ەكزوپلانەتا ەمەس. تسەنتاۆر پروكسيماسىن اينالىپ جۇرگەن «پروكسيما ب» عالامشارى جەردەن 4,2 جارىق جىلىنا تەڭ قاشىقتا جاتىر. الايدا استرونومدار جۇلدىزداردىڭ ءبىر-بىرىنەن قاشىقتاپ بارا جاتقاندىقتان, 79 000 جىلدان كەيىن «روسس 128 ب» كۇن جۇيەسىنە ەڭ جاقىن عالامشارعا اينالاتىنىن ايتىپ وتىر.
جاڭا پلانەتا تۋرالى ەگجەي-تەگجەيلى اقپارات Astronomy & Astrophysics جۋرنالىنا جاريالاندى. ونى HARPS دەپ اتالاتىن جاڭا تەحنولوگيا ارقىلى انىقتاعان. بۇل جۇمىسپەن اينالىسۋعا الەمنىڭ بىرقاتار وزىق ۋنيۆەرسيتەتتەرىنىڭ عالىمدارى مەن پروفەسسورلارى ات سالىستى.
