«قازاقستان نەگىزىنەن مۇناي, مەتالل مەن مەتالل ونىمدەرىن, حيميالىق ونىمدەر, اۋىل شارۋاشىلىعى ازىق-ت ۇلىگىن ەكسپورتتاۋدا. ال فرانتسيادان مەملەكەتىمىز ەلەكتروندى جانە مەحانيكالىق جابدىقتار, تۇتىنۋشىلىق تاۋارلار, ءدارى-دارمەك پەن كوسمەتيكا, اۆتوكولىكتەر, تاعام ونىمدەرى مەن قۇرىلىس ماتەريالدارىن يمپورتتايدى. فرانتسيانىڭ قازاقستان ەكونوميكاسىنا 2005 جىلدان باستاپ 2016 جىلدىڭ جارتىسىنا دەيىن قۇيعان قارجىسى 12,7 ملرد دوللاردى قۇرادى. ءبىزدىڭ ەلىمىزدە فرانتسۋز كاپيتالى بار 135 كاسىپورىن جۇمىس ىستەۋدە. ولاردىڭ اراسىندا «توتال», «ارەۆا», «دانون», «ۆيكات», «پەجو», «الستوم» جانە باسقا دا كومپانيالار بار», دەدى وبلىس اكىمى جانسەيىت تۇيمەباەۆ جۇزدەسۋ بارىسىندا.
فرانتسۋز ەلشىسى فيليپپ مارتينە وقو مەن فرانتسيا ايماقتارى اراسىنداعى ءوزارا ءتيىمدى ساۋدا-ەكونوميكالىق, ينۆەستيتسيالىق, سونداي-اق مادەني-گۋمانيتارلىق ارىپتەستىكتى دامىتۋدىڭ الەۋەتى زور ەكەنىن ايتتى.
«ەكى ەل اراسىنداعى ىسكەرلىك قارىم-قاتىناستى ودان ءارى دامىتۋ ماقساتىندا ءبىزدىڭ ايماقتار اراسىندا يمپورت جانە ەكسپورت كوپ سالالاردى انىقتاۋ باعىتىندا بىرگە جۇمىس جاساۋدى ۇسىنامىن. سول سالالار بويىنشا بىرىككەن جاڭا ءوندىرىس ورىندارىن اشۋعا بولادى دەپ ويلايمىن. ءبىز ءوزارا ارىپتەستىگىمىزدى ۇزاق مەرزىمگە جالعاستىرۋعا سەنەمىز», دەدى ول.
فرانتسيا بۇگىنگى تاڭدا دامىعان يندۋستريالدى-اگرارلى ەل سانالادى. بۇل ەل وندىرىستىك ونەركاسىپ كولەمى بويىنشا الەمدە الدىڭعى قاتاردا كەلەدى. ماسەلەن, وڭدەۋ ونەركاسىبىنىڭ ماشينا جاساۋ, اۆتوكولىك جاساۋ, ەلەكتر-تەحنيكالىق جانە ەلەكتروندى ءوندىرىس, اۆياتسيا, كەمە جانە ستانوكتار جاساۋ سەكىلدى سالالارى جاقسى دامىعان. سونداي-اق فرانتسيا الەمدەگى ەڭ ءىرى حيميالىق جانە مۇناي حيميالىق ونىمدەر, قارا جانە ءتۇستى مەتالل شىعارۋشى مەملەكەتتىڭ ءبىرى سانالادى.
بۇدان كەيىن ەكى تاراپ مۇحتار اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىندە «فرانتسۋز اليانسىنىڭ» اشىلۋ سالتاناتىنا قاتىستى. اتالعان ۇيىم الەمدە 1883 جىلدان بەرى جۇمىس جاسايدى. 800-دەن استام وكىلدىگى بار. وسى ارقىلى فرانتسۋز ءتىلى مەن ءداستۇرىن, مادەنيەتىن ناسيحاتتاپ كەلەدى.
ايتۋلى جيىنعا پاريجدەگى «فرانتسۋز اليانسى» قورىنىڭ وكىلى بەككەر حانىم ارنايى كەلدى.
مامانداردىڭ ايتۋىنشا, ەكى ەل اراسىنداعى مادەني-ادەبي بايلانىستارى مەن لينگۆيستيكالىق جانە عىلىمي قارىم-قاتىناستى نىعايتۋعا بۇل اليانستىڭ ىقپالى جاقسى بولادى دەپ كۇتىلۋدە.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى
