كامشات بايعازىقىزى دونەنباەۆا ەڭبەك جولىن ۇزىنكول ەلەۆاتورىندا جۇمىس ىستەۋدەن باستاعان. ول 1961 جىلدان قوستاناي وبلىسى, بوروۆسكي اۋدانى "حاركوۆ" سوۆحوزىندا مەحانيزاتور بولىپ ەڭبەك ەتكەن.
قوستاناي وبلىسىنىڭ مەڭدىقارا اۋدانىنداعى "كامەنسك-ۋرالسكي" كەڭشارىندا مەحانيزاتورلار دايىندايتىن كۋرستى, قوستاناي اۋىل شارۋاشىلىق تەحنيكۋمىن سىرتتاي وقىپ بىتىرگەن.
1972 جىلى قايىرماسىز سوقامەن جەر جىرتۋدا ايەل مەحانيزاتورلار اراسىندا وتكىزىلگەن وبلىستىق جارىستا ءبىرىنشى ورىنعا, رەسپۋبليكالىق جارىستا ءۇشىنشى ورىنعا, 1973 جىلى روستوۆ وبلىسىنداعى زەرنوگرادتا بۇكىلوداقتىق جارىستا جۇلدەلى ورىنعا يە بولعان.
1973 جىلى 26579 گا, 1974 جىلى 38158 گا, 1975 جىلى 37199 گا جەر جىرتىپ, جىلدىق مىندەتتەمەلەرىن اسىرا ورىنداعان.
قازاق قىزدارىنىڭ اۋىل شارۋاشىلىق تەحنيكالارىن مەڭگەرۋىنە ۇلگى ونەگە بولدى.
كامشات دونەنباەۆاعا بۇكىلوداقتىق حالىق شارۋاشىلىعى جەتىستىكتەرى كورمەسىنىڭ قۇرمەت ديپلومى جونە "موسكۆيچ" اۆتوماشيناسى بەرىلدى. ول سوكپ XXV سەزىنىڭ دەلەگاتى, IX سايلانعان كسرو جوعارى كەڭەسىنىڭ دەپۋتاتى (1974).
1990-1993 جىلدارى وسى كەڭشاردا قاۋىپسىزدىك تەحنيكاسىنىڭ ينجەنەرى, 1993 جىلدان شارۋا قوجالىعىن باسقارادى. 1980-1985 جىلدارى كسرو- جوعارعى كەڭەسىنىڭ ۇلتتار كەڭەسى توراعاسىنىڭ ورىنباسارى بولدى. 1976 جىلى كسرو مەملەكەتتىك سىيلىعىنىڭ لاۋرەاتى. ەكى رەت لەنين وردەنىمەن, قۇرمەت بەلگىسى وردەنىمەن ماراپاتتالعان.
كامشات دونەنباەۆانى جەرلەۋ ءراسىمى ەرتەڭ - 11 قاراشا كۇنى وتەدى.
