ساپار بارىسىندا «ابايتانۋ» عىلىمي-زەرتتەۋ ورتالىعىنىڭ سالتاناتتى تۇردە اشىلۋىنا قاتىستى. شارانى ۋنيۆەرسيتەت رەكتورى, فيلولوگيا عىلىمدارىنىڭ دوكتورى, پروفەسسور باۋىرجان ەردەمبەكوۆ قۇتتىقتاۋ سوزىمەن اشتى. سالتاناتتى شاراعا جينالعاندار «ادامزاتتىڭ ابايى» كورمەسىن تاماشالاپ, جادىگەرلەرگە قىزىعۋشىلىقتارىن تانىتتى.
- «ابايتانۋ» عىلىمي-زەرتتەۋ ورتالىعىنىڭ اشىلۋىنا اباي مۋزەيى وزىندىك ۇلەسىن قوسىپ وتىر,-دەدى مۋزەي ديرەكتورى بولات جۇنىسبەكوۆ,-ماسەلەن, ورتالىققا مۋزەي قورىنداعى قۇندى ماتەريالدار, دەرەكتەر, فوتوسۋرەتتەر, ەستەلىكتەردىڭ كوشىرمەلەرى تابىستالىپ, ءار جىلدارى شىققان «اباي» جۋرنالىنىڭ ساندارى مەن مۋزەيدىڭ باسپا ونىمدەرىن دە سىيعا تارتتىق. «ادامزاتتىڭ ابايى» كورمەسىنىڭ ماقساتى-عالامدىق تۇلعا اباي قۇنانباي ۇلىنىڭ ءومىرى مەن شىعارماشىلىعىن كەڭىنەن ناسيحاتتاۋ جانە اقىننىڭ قولى تيگەن قۇندى جادىگەرلەرمەن حالىقتى ەتەنە تانىستىرۋ بولىپ تابىلادى. ادامزاتتى سۇيۋگە شاقىرعان اقىن جىرلارى, قارا سوزدەرى جانە ونىڭ تۇتىنعان زاتتارى قاي زاماندا دا ماڭىزدىلىعىن جوعالتپاق ەمەس.
بۇدان كەيىن ابايدىڭ مەملەكەتتىك قورىق-مۋزەيىنىڭ ۇجىمى «ادامزاتتىڭ ابايى» كورمەسىمەن اتىراۋ قالاسىنا اتباسىن بۇردى. وسىندا وتكەن «اباي كەشى» قايىرىمدىلىق شاراسىنا بەلسەنە اتسالىستى. كەشتى ۇيىمداستىرۋشى – «قوعامدىق سەنىم» قورى ەكەن.
قايىرىمدىلىق كەشتە دانىشپان اقىننىڭ «كوزىمنىڭ قاراسى», «ايتتىم سالەم قالامقاس», «جەلسىز تۇندە جارىق اي» اندەرى ورىندالىپ, «ولسەم, ورنىم قارا جەر سىز بولماي ما؟», «جارق ەتپەس قارا كوڭىلىم نە قىلسا دا» ولەڭدەرى وقىلدى. اتىراۋلىقتار ابايدىڭ 1885 جىلى سەمەيدەگى ولكەتانۋ مۋزەيىنە تاپسىرعان قۇندى جادىگەرلەرىن كوزبەن كورىپ, ەرەكشە ريزا بولدى. ءسويتىپ «اباي كەشىنەن» جينالعان قاراجات قالاداعى الەۋمەتتىك دەڭگەيى تومەن وتباسىلارىنا جانە جەتىمدەر ۇيىنە تاپسىرىلدى. شارا سوڭىندا, «قوعامدىق سەنىم» قورى «اباي كەشىن» قولداپ, ايرىقشا اتسالىسقانى ءۇشىن اباي مۋزەيىنىڭ ۇجىمىنا العىس حات تابىستادى.
راۋشان نۇعمانبەك,
«ەگەمەن قازاقستان»
اتىراۋ-اقتوبە-سەمەي
