شىمكەنت قالاسىنداعى «كورمە» ورتالىعىندا ءۇش كۇن بويى وتەتىن التىنشى حالىقارالىق مامانداندىرىلعان كورمەنىڭ اشىلۋ سالتاناتىنا قاتىسقان وبلىس اكىمى ج.تۇيمەباەۆ وڭتۇستىك قازاقستان وبلىسى اۋىل شارۋاشىلىعى سالاسىندا ەكونوميكانىڭ جاڭا درايۆەرىنە اينالىپ كەلەتىنىن جەتكىزدى.
«بۇل مەملەكەتتىڭ قولداۋى مەن شارۋالاردىڭ تىنىمسىز ەڭبەگىنىڭ جەمىسى. وبلىستىڭ ەگىن شارۋاشىلىعىندا زاماناۋي تەحنولوگيالاردى قولدانۋ جۇمىسى قارقىندى تۇردە دامىپ كەلەدى. مىسالى, بۇگىنگى تاڭعا وبلىسىمىزدى 2,8 مىڭ گا قارقىندى باۋ بار, ولاردىڭ ونىمدىلىگى 29,0 مىڭ گا باسقا باۋعا قاراعاندا 1,5-2 ەسەگە ارتىق. سونىمەن قاتار, وبلىستا 5 مىڭ شارۋاشىلىققا تيەسىلى 1,3 مىڭ گەكتاردان استام جىلىجايلار بار, ونىڭ ىشىندە 17 بىرلىك اۆتوماتتاندىرىلعان وندىرىستىك جىلىجايلار. سونىمەن قاتار ءسۇت باعىتىندا جاڭا تەحنولوگيالاردى قولدانۋ بەلسەندى تۇردە جۇرگىزىلۋدە. زاماناۋي قوندىرعىلاردىڭ ارقاسىندا سيىردىڭ ءاربىر باسىنان جىلىنا 7 مىڭ ليترگە دەيىن ءسۇت الىنادى. ال تسيفرلىق تەحنولوگيانى قولدانۋدىڭ ناتيجەسىندە قۇس ەتىن ءوندىرۋ 5 ەسەگە دەيىن ارتادى»,-دەدى ايماق باسشىسى.
بۇگىنگى كورمەدە قازاقستاننان بولەك, وڭتۇستىك كورەيا, رەسەي, تۇركيا, وزبەكستان سىندى شەتەلدىك 50-دەن استام كومپانيا وكىلدەرى ءوز ونىمدەرىن ۇسىنىپ وتىر. وندا كەلۋشىلەر اۋىلشارۋاشىلىق تەحنيكاسى مەن جابدىقتارىن, قوسالقى بولشەكتەردى, سۋارۋ جانە تىڭايتۋ تەحنولوگيالارىن, جىلىجايلاردى, تۇقىمدار مەن ەكپەلەردى, تىڭايتقىشتاردى, وسىمدىكتەردى قورعاۋ قۇرالدارىن, مال شارۋاشىلىعىنا ارنالعان تەحنولوگيالاردى, ۆەتەرينارلىق تەحنولوگيالاردى كورە الادى.
حالىقارالىق كورمەدە وتاندىق جانە شەتەلدىك كومپانيالار مەن كاسىپورىندار وبلىستىڭ اگرارلىق سالاداعى جەتىستىكتەرىن كورسەتىپ قانا قويماي, ولارمەن ىسكەرلىك بايلانىستى نىعايتىپ, وزىق تەحنولوگيالار تۋرالى پايدالى ماعلۇماتتار الا الادى. داستۇرگە اينالعان AgriTek Shymkent – 2017 كورمەسى قازاقستان مەن شەت مەملەكەتتەردىڭ اگرارلىق سالاداعى جەتىستىكتەرىن ودان ءارى مولايتا تۇسەتىن بولادى.
ايتا كەتەيىك, جالپى اۋىل شارۋاشىلىعى ونىمدەرىنىڭ ساپاسى مەن ءونىم كولەمىن ارتتىرۋ ءۇشىن بيىل وڭتۇستىكتىڭ شارۋالارى 900-دەن استام اۋىل شارۋاشىلىعى تەحنيكالارىن ساتىپ العان.
