«Nationlook» توپتاماسىندا كەشەگى مەن بۇگىنگىنىڭ, ياعني ەسكى مەن جاڭانىڭ جاراسىمدى ۇيلەسىمى كورىنىس تاپقان. توپتاما 20 تۋىندىدان تۇرادى. ولاردىڭ باسىم بولىگىندە اۆتورلىق ويۋ-ورنەكتەر مەن تابيعي تەرىلەر قولدانىلعان, ءارى زاماناۋي ءسان ۇلگىسىنە ساي تىگىلگەن.
شارانىڭ باستى ماقساتى – ەتنوستيلدىڭ حالىق اراسىندا قولدانىلۋ اياسىن كەڭەيتۋ, قازاقتىڭ ۇلتتىق كيىمدەرىن ءۇندى ءساريى نەمەسە جاپون كيمونوسى سەكىلدى تانىمالدىق دەڭگەيىنە جەتكىزۋ.
كورمەگە كەلگەن وسى سالاداعى بىلىكتى مامانداردىڭ ءبىرى, ەۋرازيالىق ديزاينەرلەر وداعىنىڭ مۇشەسى سەرگەي سادىكوۆ: «بۇگىن «تۇمار» دەپ اتالاتىن بالالار كيىمدەرىنىڭ توپتاماسى كورسەتىلدى. بۇل كيىمدەر ءتۇرلى ۇلتتىق ويۋ-ورنەكتەرمەن كومكەرىلگەن. ال بۇل ويۋ-ورنەكتەردىڭ ءوز ماعىناسى بارىن بارلىعىمىز بىلەمىز. وسى ارقىلى حالقىمىزدىڭ مادەنيەتىن تانىتۋعا بولاتىنى انىق», – دەپ ءوز پىكىرىن ءبىلدىردى.
كورسەتىلىم بارىسىندا قايروللا ابىشەۆتىڭ «زەكەنمودا» جانە راحيما ابىشەۆانىڭ «Arujan» ءسان ءۇيىنىڭ توپتامالارى كورسەتىلدى.
قايروللا ابىشەۆتىڭ شىعارماشىلىق باعىتى نەگىزىنەن زاماناۋي جاڭعىرتىلعان توپتامالاردان تۇرادى. جۇمىستارىنىڭ كوپشىلىگى سوڭعى ۇلگىدە ورىندالسا دا, ۇلتتىق ناقىشتاعى ەلەمەنتتەر كورىنىس بەرەدى.
«Arujan» ءسان ءۇيى جانە ونىڭ يدەيالىق شابىتتاندىرۋشىسى – راحيما ابىشەۆانىڭ دا توپتامالارى وزىمىزگە عانا ەمەس, شەتەلدەرگە دە جاقسى تانىس. شەبەردىڭ قولىنان شىققان «التىن قۇم» توپتاماسى ماسكەۋدە وتكەن «جوعارعى ءسان» اپتالىعىندا قازىلار القاسىن ءتانتى ەتكەن بولاتىن.
ۇلتتىق مۋزەيدە ءداستۇرلى جانە جاڭا ستيلدەگى مودانىڭ كورسەتىلۋى ءبىزدىڭ ۇلتتىق كيىمدەرىمىزدىڭ تانىمالدىلىعىن ارتتىرادى. توپتامالاردى كورسەتۋ شەڭبەرىندە مۋزەيدىڭ «شەبەر» جانە «بەينەلەۋ ونەرى ستۋدياسى» ۇيىرمەلەرىنە قاتىساتىن بالالاردىڭ تۋىندىلارىنان دا كورمە ۇيىمداستىرىلدى.
تالعات سادىق ۇلى
