بۇل – قىزىلوردالىق كەدەنشىلەر جىلدىق تاپسىرمانى 104,9 پايىزعا ورىندادى دەگەن ءسوز. مۇنىمەن قوسا, كەدەندىك قايتا باقىلاۋ ناتيجەسىندە 339 ملن. 312 مىڭ تەڭگە تولەمدەر مەن سالىقتار قوسىمشا ەسەپتەلىپ, ونىڭ 153 ملن. 340 مىڭ تەڭگەسى ءوندىرىلىپ الىنعان. ايتا كەتۋ كەرەك, وبلىستىق سىرتقى ساۋدا اينالىمى وتكەن جىلى 836,9 ملن. اقش دوللارىن قۇراسا, مۇنداعى ەكسپورت ۇلەسى – 443,5 ملن., ال يمپورت ۇلەسى 393,4 ملن. اقش دوللارىنا تەڭ. وسى دەرەكتەرگە قاراپ, سىرتقى ساۋدا اينالىمى وتكەن جىلى الدىڭعى جىلمەن, ياعني 2008 جىلدىڭ كورسەتكىشىمەن سالىستىرعاندا ەكى ەسەدەي كولەمگە تومەندەگەنىن بايقايمىز.
ەركىن ءابىل, قىزىلوردا.
2 000 000 000 ءوڭىردىڭ مادەنيەت سالاسىنداعى قۇرىلىسقا اعىمداعى جىلى وسىنشاما قارجى قاراستىرۋ كوزدەلگەن. جىل وتكەن سايىن ءوڭىر جۇرتشىلىعىنىڭ رۋحاني قاجەتىن وتەيتىن مادەنيەت سالاسىنا بولىنگەن قارجى كولەمى ءوسىپ كەلەدى. قازىرگى كەزدە 474 مەملەكەتتىك مادەنيەت مەكەمەلەرىنىڭ قاتارىنداعى 223 مادەنيەت ءۇيى, 225 كىتاپحانا, 22 مۇراجاي, بيكەن ريموۆا اتىنداعى وبلىستىق دراما تەاترى جانە باسقا دا شىعارماشىلىق ورتالىقتارى “مادەني مۇرا” باعدارلاماسى بويىنشا جۇمىس ىستەۋدە. وتكەن جىلى وسىلاردىڭ قاتارىنا جاڭادان 15 مادەنيەت ءۇيى مەن كلۋب, 11 كىتاپحانا قوسىلدى. ال ۇستىمىزدەگى جىلى مۇنداي ءۇردىس جالعاسىن تاۋىپ, مادەنيەت سالاسىنداعى 4 نىساننىڭ قۇرىلىسى مەن 29 نىساننىڭ كۇردەلى جوندەلۋىنە بيۋدجەتتەن 2,0 ملرد. تەڭگە قاراستىرۋ ويلاستىرىلىپ وتىر. ءسويتىپ, جەتىسۋلىقتاردىڭ رۋحاني جاعىنان بايۋىنا جان-جاقتى جاعداي جاسالماق.
كۇمىسجان بايجان, الماتى وبلىسى.
900 000 000 بۇل – ماڭعىستاۋ وبلىسىندا “جول كارتاسى” باعدارلاماسى بويىنشا دەنساۋلىق ساقتاۋ سالاسىنىڭ قۇرىلىس نىساندارىن سالۋ مەن جوندەۋگە بولىنگەن قارجى كولەمى. وسىنشاما قىرۋار قارجىنىڭ قايتارىمى دا جوق ەمەس. وبلىستا وتكەن جىل انا مەن بالا جىلى بولىپ بەلگىلەنىپ, ءبىرشاما جەتىستىكتەرگە قول جەتتى. انا مەن بالا ءولىمى ازايدى. ايماقتا سوڭعى كەزدە كەڭ ەتەك العان وكپە اۋرۋى دا الدىڭعى جىلمەن سالىستىرعاندا, 22 پايىزعا تومەندەدى. سابيلەر قاتارىن كوبەيتۋدە رەسپۋبليكادا الدىڭعى ورىنداردىڭ بىرىنە كوتەرىلگەندىك بايقالادى. بۇل كۇندەرى سالانىڭ جەتى ۇلكەن نىسانىنىڭ قۇرىلىسى قارقىندى ءجۇرىپ جاتىر. “وسى جەتىستىكتەردى جالعاستىرا ءتۇسۋ ءۇشىن 2010 جىلدى وتباسى جىلى دەپ بەلگىلەدىك”, – دەيدى وبلىستىق دەنساۋلىق ساقتاۋ باسقارماسىنىڭ باستىعى سەرىكبول مۋسينوۆ.
جولامان بوشالاق, ماڭعىستاۋ وبلىسى
