كىتاپحانانىڭ نەگىزى ءحىح عاسىردا قالانعانىمەن, 1937 جىلى ول وبلىستىق مارتەبە الدى. كونفەرەنتسيا جۇمىسىنا قازاقستاننىڭ بارلىق شالعايىنان جانە رەسەيدىڭ كورشى چەليابى وبلىسىنان قوناقتار كەلدى.
وندا ءسوز سويلەگەن وبلىس اكىمىنىڭ ورىنباسارى مارات جۇندىباەۆ كىتاپحانانىڭ بۇقارالىق سيپات الۋى اتقارۋشى بيلىك قامقورلىعىنىڭ كورىنىسى بولىپ تابىلاتىنىن ايتتى. وتكەن جىلى كىتاپحانانىڭ ماتەريالدىق-تەحنيكالىق بازاسىن نىعايتۋ ماقساتىندا بيۋدجەتتەن 58 ميلليون تەڭگە قاراجات ءبولىندى. ينتەرنەتتىڭ ومىرىمىزگە ارالاسۋىنا وراي, كىتاپحاناعا ادامدار بارمايدى دەگەن پىكىر قالىپتاسىپ تا ۇلگەرگەن. الايدا جەرگىلىكتى جەرلەردە كورىنىس, ءتىپتى باسقاشا بولىپ وتىر. كىتاپحانا قازىر كوپشىلىكتىڭ ءجيى باس سۇعاتىن ورنى, كىتاپ وقۋمەن بىرگە, مۇندا ءتۇرلى مادەني شارالار دا ءوتىپ جاتادى.
«جاقىندا قارابالىق پەن دەنيسوۆ اۋدانىنا بارعانىمىزدا كىتاپحانانىڭ اۋىلداعى باستى مادەني وشاق ەكەنىنە كوزىمىز جەتتى. وندا اۋىلداعىلاردىڭ قىزىعۋشىلىعىنا قاراي ءتۇرلى كلۋبتار جۇمىس ىستەيدى, اكتسيالار ءوتىپ جاتادى. كىتاپحانالاردىڭ قىزمەت ءتۇرى جىل سايىن كەڭەيىپ كەلەدى. تەك جەرگىلىكتى جەرلەردە وعان جەتكىلىكتى جاعداي جاسالۋى ءتيىس. وبلىستىق مارتەبەسى بار ەكى كىتاپحاناعا – قوستانايداعى ل.تولستوي اتىنداعى وبلىستىق كىتاپحانا مەن ارقالىق قالاسىنداعى ورتالىق ك ىتاپحاناعا كۇردەلى جوندەۋ جۇمىستارى قاجەت» دەدى وبلىستىق كىتاپحانانىڭ ديرەكتورى داريعا تورەبايقىزى.
عىلىمي-پراكتيكالىق كونفەرەنتسياعا بەلگىلى مادەنيەتتانۋشى, جازۋشى, قوعام قايراتكەرى مۇرات اۋەزوۆ تە شاقىرىلدى. ول كىتاپحانا قورىنا ءوزىنىڭ جاڭا كىتاپتارىن سىيعا تارتتى.
«كىتاپحانانىڭ قۇرىلعان جىلىنىڭ ءوزى ونىڭ قاسيەتتى قىزمەتىنەن حابار بەرىپ تۇرعانداي. 1937 جىلى حالقىمىزدىڭ رۋحاني تىرەگىنىڭ, قايماعىنىڭ بارلىعىن سىپىرىپ كەتكەندە, وبلىستاعى كىتاپحانا سونىڭ ورنىن تولتىرۋ ءۇشىن قۇرىلعانداي كورىنەدى ماعان. كىتاپحانا ناعىز ادامزات مادەنيەتىنىڭ تۇراقتى ورداسى» دەدى مۇرات مۇحتار ۇلى.
ءنازيرا جارىمبەت
«ەگەمەن قازاقستان»
قوستاناي
