ستويلوۆ تۇسىنداعى «استانا» تۋرالى نە بىلەمىز؟

ستانيمير ستويلوۆ «استاناعا» 2014 جىلدىڭ 21 ماۋسىمىندا باس باپكەر بولىپ تاعايىندالدى. بۇگىنگە دەيىنگى ۋاقىتتا كوماندا ءۇش دۇركىن ەل چەمپيونى اتانىپ, ءبىر-ءبىر مارتە قازاقستان كۋبوگى مەن قازاقستان سۋپەركۋبوگىنا يە بولدى. بۇدان بولەك, ەگەمەندىك العالى بەرى تۇڭعىش رەت چەمپيوندار ليگاسىنىڭ توپتىق كەزەڭىنە جولداما الدى. ودان كەيىنگى جىلدارى ەۋروپا ليگاسىنىڭ تۇراقتى قاتىسۋشىسى بولىپ كەلەدى.

ەرەكشە اتاپ وتەرلىك جايت, بىرەر كۇن بۇرىن «استانا» «وقجەتپەسكە» قارسى ويىندا 4:0 ەسەبىمەن باسىم تۇسكەن بولاتىن. بۇل ستويلوۆتىڭ «استاناداعى» 100-جەڭىسى رەتىندە تىركەلدى. اتاپ وتەر بولساق, پرەمەر-ليگادا 77 كەزدەسۋدى, ەل كۋبوگىندا 8 ويىندى جانە 14 ەۋروكۋبوكتىق ماتچتى جەڭىسپەن اياقتادى.   

ال ستانيمير ستويلوۆقا دەيىن «استانا» بيىك بەلەستەردەن كورىنە المادى. ىشكى بىرىنشىلىكتە: 2009 جىلى – 2-ورىن, 2010 جانە 2011 جىلدارى – 4-ورىن, 2012 جىلى – 5-ورىن, 2013 جىلى – 2-ورىن. ەل كۋبوگىندا عانا ەكى مارتە (2010, 2012) جەڭىسكە جەتتى, ال ەۋروكۋبوكتىق ويىنداردا ايتارلىقتاي كوزگە تۇسە المادى.

كوماندا 2015 جىلى چەمپيوندار ليگاسىنىڭ توپتىق كەزەڭىندە ونەر كورسەتكەنىنىڭ ارقاسىندا 16 ملن ەۋرودان استام قارجى تاپتى. كەلەر جىلىندا دەڭگەيى تومەندەۋ ەۋروپا ليگاسىنا قاتىسقاندىقتان ءتورت ملن ەۋروعا جۋىق قاراجاتقا يە بولدى. ال بيىلعى ەۋروكۋبوكتىق ويىنداردا قازىردىڭ وزىندە 6 ملن 660 مىڭ ەۋروعا قول جەتكىزدى. الدا ءالى ءۇش ويىن بار. جەڭىسكە جەتىپ جاتقان جاعدايدا, ءار ويىندا 320 مىڭ ەۋرودان, ال تەڭ تۇسكەندە 120 مىڭ ەۋرودان الماق.

17 ويىن بويى جەڭىلمەي كەلەدى

«استانا» بۇگىندە ءوز الاڭىندا ەشكىمگە ەسە جىبەرمەيتىن كومانداعا اينالدى. «استانا-ارەنا» ستاديونىندا 17 ماتچ بويى ەشكىمنەن جەڭىلمەي كەلەدى. ناقتىراق توقتالايىق.

2015 جىل. چەمپيوندار ليگاسىنىڭ ىرىكتەۋ كەزەڭى:

«استانا» 3:1 «ماريبور»
«استانا» 4:3 حيك
«استانا» 1:0 اپوەل

چەمپيوندار ليگاسى. توپتىق كەزەڭ:

«استانا» 2:2 «گالاتاساراي»
«استانا» 2:2 «بەنفيكا»
«استانا» 0:0 «اتلەتيكو»

2016 جىل. چەمپيوندار ليگاسىنىڭ ىرىكتەۋ كەزەڭى:

«استانا» 2:1 «جالگيريس»
«استانا» 1:1 «سەلتيك»
«استانا» 2:0 باتە

2016 جىل. ەۋروپا ليگاسى. توپتىق كەزەڭ:

«استانا» 0:0 «يانگ بويز»
«استانا» 1:1 «وليمپياكوس»
«استانا» 2:1 اپوەل

2017 جىل. چەمپيوندار ليگاسىنىڭ ىرىكتەۋ كەزەڭى:

«استانا» 1:1 «سپارتاك» (يۋرمالا)
«استانا» 3:1 «لەگيا»
«استانا» 4:3 «سەلتيك»

2017 جىل. ەۋروپا ليگاسى. توپتىق كەزەڭ:

«استانا» 1:1 «سلاۆيا»
«استانا» 4:0 «ماككابي»

كوماندا سوڭعى رەت ءوز الاڭىندا 2014 جىلى يسپانيانىڭ «ۆيلياررەالىنا» ەۋروپا ليگاسىنىڭ ىرىكتەۋ كەزەڭىندە 0:3 ەسەبىمەن ەسە جىبەرگەن بولاتىن. ەندى جەرلەستەرىمىزدى «استانا-ارەنادا» ءدال وسى «ۆيلياررەالعا» قارسى ويىن كۇتىپ تۇر.

ال ەندى وسى تۇستا سوڭعى جىلدارى چەمپيوندار ليگاسىنىڭ فينالىنا ءجيى شىعىپ جۇرگەن «اتلەتيكو» مەن «استانانىڭ» ترانسفەرلىك قۇنىن ەسەپتەپ كورەيىك. Transfermarkt مالىمەتى بويىنشا يسپانيالىق فۋتبولشىلاردىڭ جالپى سوماسى 2015 جىلى 338 ملن ەۋروعا باعالانعان. ال «استانا» ويىنشىلارىنىڭ جالپى باعاسى سول جىلى 15,2 ملن ەۋرونى قۇراعان.

باۋىرجان جولشيەۆ

جوعارىدا ايتىلعاندار ستانيمير ستويلوۆتىڭ كوز كورگەن, ەل بىلەتىن جەتىستىكتەرى. بۇل ايسبەرگتىڭ سۋ بەتىندەگى بولىگى دەپ ايتۋعا بولادى. ال ەندى ونىڭ كورىنە بەرمەيتىن جاقتارىنان كوپشىلىك بەيحابار. بولگار مامانىنىڭ ەڭ جاقسى قاسيەتتەرىنىڭ ءبىرى – ۇزدىك ويىنشىلارىن ەشقاشان بايلاپ ۇستامايدى. جۇلدىز اۋرۋىنا ۇشىراپ, كەتەمىن دەگەن شاكىرتىنە «قالا عوي!» دەمەيدى, «جولىڭ بولسىن!» ايتىپ شىعارىپ سالادى.

ءبىز وسى تۇستا بىرەر جىل بۇرىن «استانا» ساپىندا ونەر كورسەتكەن باۋىرجان جولشيەۆتى الايىق. تالانتى ەشكىمنەن كەم ەمەس ەدى. وتانداسىمىزعا سىرتتان بىرنەشە ۇسىنىس جاسالعانىن بىلەمىز. باسقا ورتادا ءوزىن سىناعىسى كەلدى مە, الدە جوعارى جالاقى تالاپ ەتتى مە «استانانى» تاستاپ كەتە بارعان. الايدا, ەۋروپاعا بارىپ تا ءوز ورنىن تاپپاي, قايتا كەلگەن. ال «استانا» بۇل كەزدە ونىڭ ورنىنا فۋتبولشى الىپ قويعان بولاتىن.

ەگەر ستانيمير ستويلوۆتىڭ ورنىندا وزگە بىرەۋ بولسا, نەگىزگى ويىنشىسىن «كەلىسىمشارتىڭ بار» دەپ جىبەرمەي قويار ما ەدى؟! الايدا, ول مۇنداي قادامعا بارمادى. وسى تۇستا بىرنارسەنى ەسكەرۋ كەرەك, كوماندادا باپكەردىڭ ابىرويى ويىنشىدان تومەن بولسا, ول ۇجىمنىڭ بيىككە كوتەرىلۋى قيىنداۋ. باپكەر ىلعي دا شاكىرتتەرىن وزىنە باعىندىرا ءبىلۋى قاجەت. ال تارتىپكە مويىنسۇنباعان ويىنشىنى كوماندادا ۇستاۋدىڭ ەش قاجەتى جوق. ستانيمير ستويلوۆ مىنە, ءدال وسى قاعيدانى جاقسى ۇستانعانى بايقالادى.

«ونىڭ نە ويلاپ جۇرگەنىن ەشكىم بىلمەيدى. ازىرگە ول بىزدە ويناعىسى كەلەتىنىن ايتقان جوق. مەن مۇنداي ادامنىڭ ارتىنان جۇگىرىپ, جالىنبايمىن. كەز كەلگەن ويىنشى ءۇشىن «استانادا» ونەر كورسەتۋ ۇلكەن جەتىستىك بولىپ ەسەپتەلەدى», – دەگەن ەدى 2016 جىلى قازاقستان سۋپەركۋبوگىنىڭ الدىندا. 

ال باۋىرجان جولشيەۆتىڭ جاعدايى نە بولدى؟ وسى ماۋسىمنىڭ باسىندا «اقتوبەمەن» بىرگە وقۋ-جاتتىعۋ جيىنىنا اتتانعانى حابارلانىپ ەدى. الايدا ول جەردە دە جوعارى جالاقى سۇراپ, باسشىلىقپەن ورتاق ىمىراعا كەلە الماعانى بەلگىلى بولدى. باپكەرگە باعىنباي, جۇلدىز اۋرۋىنا شالدىققان جولشيەۆتىڭ كاسىبي فۋتبولدا الاڭعا شىقپاعانىنا ەكىنشى جىل ءوتتى...

نەمانيا ماكسيموۆيچ

ستانيمير ستويلوۆتىڭ بىلىكتى باپكەر ەكەنىنە كوپتەگەن دالەل بار. بولگار مامانىنىڭ كەزەكتى ءبىر قىرىن اشپاس بۇرىن «استانانىڭ» ەكس-ويىنشىسى نەمانيا ماكسيموۆيچ تۋرالى قىسقاشا ايتىپ وتەيىك.

سەربيالىق جارتىلاي قورعاۋشىنىڭ «استانادا» باعى اشىلدى دەسەك ارتىق ايتقاندىق ەمەس. ەلوردادا ءجۇرىپ ول ۇلكەن جەتىستىكتەرگە جەتتى. ەڭ باستىسى ەۋروكۋبوكتىق ويىندارعا العاش رەت قاتىسىپ, تاجىريبە جينادى. بۇدان بولەك «Golden boy», ياعني 21 جاسقا دەيىنگى الەمنىڭ ەڭ ۇزدىك ويىنشىسىنا بەرىلەتىن سىيلىققا ۇمىتكەر بولدى. «استانا» ساپىنداعى ونەرىنىڭ ارقاسىندا سەربيا قۇراماسىنان شاقىرتۋ الدى. 2015 جىلى 21 جاسقا دەيىنگى جاستار اراسىندا ەۋروپا چەمپيونى اتاندى. Transfermarkt نۇسقاسى بويىنشا قازاقستان پرەمەر-ليگاسىنداعى ترانسفەرلىك قۇنى ەڭ قىمبات ويىنشى بولدى. قىسقاسى «استاناعا» تارىداي بولىپ كىرىپ, تاۋداي بولىپ شىقتى. وعان پورتۋگاليانىڭ «بەنفيكا», «سپورتينگ», انگليانىڭ «ۋەست حەم», ءتىپتى «مانچەستەر يۋنايتەد», يسپانيانىڭ «ۆالەنسيا» كوماندالارى قىزىعۋشىلىق تانىتتى.

نەمانيانىڭ ءوزى ەل چەمپيوناتى اياقتالعاننان كەيىن «استانامەن» كەلىسىمشارتىن ۇزارتپايتىنىن مالىمدەدى. بۇل ۋاقىتتا ەۋروپادا قىسقى ترانسفەر ۋاقىتى باستالعان ەدى. ال ونىڭ كەلىسىمى 2017 جىلدىڭ جازىنا دەيىن جارامدى بولاتىن. سەربيالىق ويىنشى «ۆالەنسيامەن» اۋىزشا كەلىسىمگە كەلگەن. العاشىندا ونىڭ ترانسفەرلىك قۇنى 300 مىڭ ەۋرونى قۇرايدى دەگەن اقپارات تاراعان ەدى. الايدا, «استانا» مەن «ۆالەنسيا» ورتاق ىمىراعا كەلە المادى. ناتيجەسىندە ماكسيموۆيچ تەك جارتى جىلدان كەيىن يسپانياعا اتتاندى.

ەندى وسى تۇستا ايتا كەتەرلىك ءبىر جايت, ستانيمير ستويلوۆ ونىڭ كومەگىنە مۇلدەم جۇگىنبەدى, ياعني بىردە ءبىر ويىنعا شىعارمادى. ەلوردالىقتار ىشكى بىرىنشىلىكتىڭ العاشقى تۋرىندا شىمكەنتتىڭ «ورداباسى» ۇجىمىنان 0:3 ەسەبىمەن ۇتىلدى. قازاقستان كۋبوگىنىڭ 1/8 فينالىندا «جەتىسۋدان» 1:2 ەسەبىمەن ەسە جىبەرىپ, جارىس جولىنان شىعىپ قالدى. مىنە, ءدال وسى ويىنداردا ماكسيموۆيچتىڭ جوقتىعى بىلىنگەن ەدى. الايدا, باس باپكەر وزگە جىگىتتەرگە كوبىرەك مۇمكىندىك بەرۋدى ءجون كوردى. العاشقى كەزدەسۋدەن باستاپ-اق ويىنشىلاردىڭ ءبىر-بىرىمەن ءتۇسىنىسىپ, ۇيلەسىمدى ويىن كورسەتۋىن ماقسات ەتتى. باسىندا قيىن بولعانمەن, تۇبىندەگى جەتىستىكتى ويلادى.

بۇل دا بولگار مامانىنىڭ بىلىكتىلىگى, كورەگەندىگى دەپ ايتۋعا بولادى. سەبەبى, وزگە باپكەر بولسا, كومانداداعى بىرىزدىلىكتى بۇزباي, ناتيجەگە كەرى اسەرىن تيگىزبەس ءۇشىن ماكسيموۆيچتى سوڭىنا دەيىن پايدالانار ما ەدى؟!

كومانداعا ءتارتىپ ورناتتى

كوماندا قانشا جەردەن تالانتتى ويىنشىلارعا تولى بولسا دا, ءتارتىپ, باپكەرگە باعىنۋشىلىق بولماسا ۇلكەن جەتىستىكتەرگە جەتۋى ەكىتالاي. ستانيمير ستويلوۆتىڭ وسى تۇستا تىنىمسىز ەڭبەكتەنگەنى بايقالادى. ول جۇلدىز اۋرۋىنا شالدىققان ويىنشىسىن نە قوسالقى قۇرامعا وتىرعىزىپ قويادى, نە وزگە كومانداعا جالعا بەرەدى.

مىنا جايلاردى بايىپتاپ كورەيىك. سوڭعى جىلدارى «استانا» ءبىراز ويىنشىسىن جالعا بەردى. مىسالى, بيىلدىڭ وزىندە قوستانايدىڭ «توبىلىنا» ديدار جالمۇقان, الەكسەي ششەتكين, ازدرەن للۋللاكۋ, «اقتوبەگە» اباي ءجۇنىسوۆ, قاراعاندىنىڭ «شاحتەرىنە» گەۆورگ نادجاريان كەتتى. «استانا» بەس بىردەي ويىنشىسىن جالعا بەردى. سونداي-اق, بيىل ءدال وسى «توبىلعا» جالعا بەرىلگەن سەرگەي مالىي, اسحات تاعىبەرگەن, دجوردجە دەسپوتوۆيچ كەرى قايتارىلدى.

ەندى وسى جەردە «استانا» مەن «توبىلدىڭ» جاعدايىن ويلانىپ كورەلىك. ەلوردادا فۋتبولشىلار ءۇشىن جاعدايدىڭ ءبارى جاسالعانى انىق. كۇن سۋىق كەزدە «استانا-ارەنا» ستاديونىنىڭ شاتىرى جابىلىپ, قولايلى تەمپەراتۋرادا جاتتىعۋىنا, ماتچ وتكىزۋىنە مۇمكىندىك بەرەدى. ەۋروكۋبوكتىق ويىندارعا تۇراقتى تۇردە قاتىسادى. چەمپيوندار ليگاسى مەن ەۋروپا ليگاسىندا ونەر كورسەتۋ كەز كەلگەن قازاقستاندىق ويىنشى ءۇشىن ارمان دەپ ايتۋعا بولادى. ال ازىرگە ەلىمىزدە «استانا» عانا اتالعان ەكى تۋرنيرگە تۇراقتى قاتىسىپ ءجۇر. ەندى وسى تۇستا «توبىلدى» الىپ كورەلىك. بۇل كومانداداعى فۋتبولشىلارعا جاسالعان جاعداي «استانامەن» سالىستىرۋعا كەلەر مە ەكەن؟! مىنە, وسىنداي شاقتا جۇلدىزى ۇستاعان ويىنشى تاۋبەسىنە ءتۇسىپ, «استاناعا» ورالۋعا تىرىسادى.

ارينە, بۇل بولجام عانا.

سەرىكجان مۋجيكوۆ

ءاربىر بىلىكتى باپكەر جاڭا كومانداعا كەلگەندە فۋتبولشىلاردىڭ تالانتىن اشۋعا تىرىسادى. ونىڭ كورەگەندىگى, كاسىبيلىگى دە وسىندا. ماسەلەن, الەمگە تانىمال يۋرگەن كلوپپ بىرنەشە جىل بۇرىن دورتمۋندتىڭ «بورۋسسياسىنا» جەتەكشىلىك ەتكەندە كوپشىلىك بىلە بەرمەيتىن ماركو رويستى «بورۋسسيا مەنحەنگلادباحتان», روبەرت لەۆاندوۆسكيدى پولشانىڭ «لەح» كومانداسىنان ساتىپ العان. وسىلايشا دورتمۋد كومانداسىندا ماركو رويس, روبەرت لەۆاندوۆسكي جانە ماريو گەتتسە ۇشتىگىن قۇردى. كەيىنىرەك بۇل ۇشتىكتىڭ قانداي جەتىستىكتەرگە جەتكەنى كوپشىلىككە بەلگىلى. ولاردىڭ دارىنىن اشىپ, تانىمال ەتكەن ءدال وسى يۋرگەن كلوپپ بولاتىن.

ستانيمير ستويلوۆ تا مۇنداي تاجىريبەدەن كەندە ەمەس. قول استىنداعى كوپتەگەن ويىنشى ءوزىن جاقسى قىرىنان كورسەتتى, تالانتتارى اشىلدى. سولاردىڭ اراسىنان ستويلوۆتىڭ ءتول شاكىرتى – سەرىكجان مۋجيكوۆتى ەرەكشە اتاپ وتكەن ءجون. بولگار مامانى ونىڭ ەڭبەكقورلىعىن, تالانتىن «جەتىسۋدا» جۇرگەن كەزىندە-اق بايقاسا كەرەك. قول استىنا شاقىرىپ الدى. باپكەردىڭ باپتاۋى مەن ءوزىنىڭ ەڭبەكقورلىعى ساي كەلىپ, ناتيجەسىندە نەگىزگى قۇرامنان ءوز ورنىن الدى, باستى ويىنشىعا اينالدى. 2014 جىلدان بۇگىنگە دەيىن «استانا» ساپىندا 100 ويىنعا قاتىستى.

«اتلەتيكومەن» ويناپ, «قايراتتى» ويدا ۇستادى

«استانانىڭ» ءاربىر ويىنىن نازاردا ۇستايتىن جانكۇيەر مادريدتەگى «اتلەتيكوعا» قارسى ويىندى ۇمىتپاۋى كەرەك. بۇل چەمپيوندار ليگاسىنىڭ توپتىق كەزەڭىندەگى ماتچ بولاتىن. ستانيمير ستويلوۆ بۇل كەزدەسۋگە نەگىزگى قۇرامداعى باۋىرجان جولشيەۆ, روحەر كانياس, تاڭات نوسەرباەۆ, مارين انيچيچ, نەمانيا ماكسيموۆيچ, دميتري شومكو سەكىلدى نەگىزگى ويىنشىلارىن الماي كەتكەن بولاتىن. سەبەپ بىرەۋ. «استانانى» نەبارى ءتورت كۇننەن كەيىن ىشكى بىرىنشىلىكتە «قايراتپەن» كەزدەسۋ كۇتىپ تۇرعان. مادريدتەگى ويىننان كەيىن بۇل كەزدەسۋگە شارشاڭقى كۇيدە شىعاتىنى بەلگىلى. سوندىقتان باستى ويىنشىلارىنا دەمالىس بەردى. ال بۇل شاقتا «استانا» مەن «قايرات» اراسىندا چەمپيوندىققا تالاس قىزىپ تۇردى. ءاربىر ۇپاي ماڭىزدى, قاتەلەسۋگە بولمايدى.

ەلوردا كومانداسىنىڭ مادريدكە قوسالقى قۇراممەن اتتاناتىنى بەلگىلى بولعاننان كەيىن ستويلوۆتى سىنعا العاندار كوپ بولدى. ال بولگار مامانىنىڭ سول كەزدەگى جاۋابى قىسقا ءارى ناقتى ەدى: «ەندىگى ىشكى بىرىنشىلىكتە ۇپاي جوعالتۋىمىزعا بولمايدى. پرەمەر-ليگانىڭ ويىندارى اياقتالعاننان كەيىن بار ويىمىزدى چەمپيوندار ليگاسىنا بولەمىز. شىندىققا تۋرا قارايىق, نەگىزگى قۇراممەن بارعاننىڭ وزىندە «اتلەتيكونى» ءوز الاڭىندا ۇتۋىمىز ەكىتالاي. مادريدتىكتەر توبىمىزداعى فاۆوريت كوماندا بولىپ ەسەپتەلەدى», – دەدى.

الماتىداعى ماڭىزدى كەزدەسۋدە تاڭات نوسەرباەۆتىڭ جالعىز گولىنىڭ ارقاسىندا ەلوردالىقتار جەڭىسكە جەتتى. 2015 جىل قالاي اياقتالعانى بارىمىزگە بەلگىلى. ىشكى بىرىنشىلىكتە «استانا» «قايراتتان» جەتى ۇپايعا قالىپ كەلە جاتقانمەن, سوڭىندا چەمپيون اتاندى. ال چەمپيوندار ليگاسىنداعى دەبيۋتتىك ماۋسىمىندا توپتىق كەزەڭدى ءتورت ۇپايمەن ءتورتىنشى ورىندا اياقتادى.

الماتىداعى جەڭىس ءۇشىن مادريدتەگى كەزدەسۋدى قۇرباندىققا شالدى. بۇل دا ستويلوۆتىڭ كورەگەندىگى دەپ ايتۋعا بولادى. وسى چەمپيوندىقتىڭ ارقاسىندا كەلەر جىلى چەمپيوندار ليگاسىنىڭ ىرىكتەۋ كەزەڭىنە قاتىستى. سول جىلى چەمپيوندار ليگاسىنا بولماسا دا ەۋروپا ليگاسىنىڭ توپتىق كەزەڭىنە جولداما الدى. «استاناداي» جاس كوماندا ءۇشىن ەۋروپا ليگاسىنا قاتىسۋ ۇلكەن جەتىستىك ەدى.

الەكساندر بوروديۋك – ستانيمير ستويلوۆ

بۇل تۇستا قوس ماماننىڭ ناتيجەلەرىن سالىستىرمايمىز, سەبەبى, ەكەۋىنىڭ اراسى جەر مەن كوكتەي. قايتا ولاردىڭ ءار ماتچتان كەيىنگى باق وكىلدەرىنە بەرگەن سۇحباتىن سالىستىرىپ كورەيىك.

«استانا» ءيزرايلدىڭ «ماككابي» كومانداسىنا قارسى كەزدەسۋىنەن كەيىن ستانيمير ستويلوۆ ءباسپاسوز كونفەرەنتسياسىندا سالقىنقاندىلىعىمەن جۋرناليستەردى ءتانتى ەتكەن. يزرايلدىكتەردى 4:0 ەسەبىمەن جەڭسە دە ماتچتان كەيىن ويىنشىلارىنا بىردەن الداعى كەزدەسۋدى ويلاۋ كەرەكتىگىن ەسكە سالدى. بۇل تۋرالى ول ويىننان كەيىنگى جۋرناليستەرگە بەرگەن سۇحباتىندا مالىمدەدى.

ال ماتچقا دەيىنگى سوزىندە: «استانا» ءوزىن ەۋروپالىق كوماندالارعا قارسى ويىندا فاۆوريت رەتىندە سەزىنە المايدى. ءوز مۇمكىندىگىمىزدى شەكتەن تىس اسىرمالاۋعا بولمايدى. ءبىز سوڭعى ءۇش جىلدا ەۋروپادا ونەر كورسەتىپ جۇرگەن بولساق تا, ءوزىمىزدى «رەالدىڭ» دەڭگەيىنە قويا المايمىز», – دەگەن بولاتىن. وسىلايشا ول كوماندادان بۇكىل پسيحولوگيالىق جۇكتى الىپ تاستادى. سەبەبى, كەز كەلگەن ماتچتا فاۆوريت بولىپ ويناۋ وتە قيىن. جانكۇيەرلەرىڭە جەڭىستى ۋادە ەتىپ, بىراق ورىنداي الماساڭ... مىنە, بۇل دا ستويلوۆتىڭ كاسىبيلىگى مەن كورەگەندىگىنىڭ ارقاسى.

ەندى قازاقستان ۇلتتىق قۇراماسىنىڭ باس باپكەرى الەكساندر بوروديۋكتى الايىق. رۋمىنياعا قارسى كەزدەسۋدە جەڭىلمەيتىنىن ايتقان. الايدا رۋمىنداردان 1:3 ەسەبىمەن ۇتىلدى. ماتچتان كەيىنگى تىلشىلەرگە مىناداي سۇحبات بەردى:

«جىگىتتەر بارىن سالدى. الايدا, شاكىرتتەرىمنىڭ جەكەلەگەن قاتەلىكتەرى بولىپ جاتقانى جاسىرىن ەمەس. ءبىز وسى جاعىن رەتتەۋىمىز كەرەك. قاتەلىكتەردىڭ سالدارىنان گول دا جىبەرىپ الدىق», – دەدى.

مىنە, وسى تۇستا ەكى باپكەردىڭ ءسوزى مەن ءىسى قانشالىقتى ساي كەلەتىنىن اڭعارۋعا بولادى. ستانيمير ستويلوۆ ىلعي دا ارىق سويلەپ, سەمىز شىعۋعا تىرىسادى.

«استانامەن» كەلىسىمشارتى اياقتالادى

ستانيمير ستويلوۆ پەن «استانانىڭ» كەلىسىمشارتى وسى جىلدىڭ سوڭىندا اياقتالادى. بولگار مامانى ەندىگى قازاقستاندىق كلۋبپەن جاڭا شارتقا قول قويا ما؟ بۇل ازىرگە بەلگىسىز. وسىعان دەيىن وعان تۇركيانىڭ «ترابزونسپور» كومانداسىنان, سونداي-اق قىتايدىڭ بىرنەشە كومانداسىنان ۇسىنىس تۇسكەنى حابارلانعان.

قىتايدىڭ سوڭعى جىلدارى اياقدوپ سپورتىنا قانشالىقتى كوڭىل ءبولىپ جۇرگەنى بارىمىزگە بەلگىلى. ال انادولى جەرىندە ەۋروكۋبوكتىق ويىندارعا ءجيى قاتىسىپ تۇرۋعا مۇمكىندىك بار. ونىڭ ۇستىنە «ترابزونسپور» كومانداسى جاڭا ويىنشىلار ءۇشىن قارجىسىن ايامايدى.

ستويلوۆ «ماككابيمەن» ويىننىڭ الدىندا جاڭا كەلىسىمشارت تۋرالى كەيىنىرەك ويلاناتىنىن جەتكىزگەن بولاتىن. كلۋب باسشىلىعى ەندىگى تۇستا كوپ ويلانباي بولگار مامانىنا ءتيىمدى كەلىسىمشارت ۇسىنعانى ءجون.

قورىتىندى

كەز كەلگەن كوماندانىڭ ناتيجەسى تىكەلەي باس باپكەرگە بايلانىستى. ءتىپتى, ەۋروپادا اتوي سالىپ جۇرگەن «بارسەلونا» مەن «رەال» دا بىلىكتى باپكەرگە تاۋەلدى. وعان مىسال رەتىندە حەراردو مارتينونىڭ تۇسىنداعى «بارسەلونانى» الايىق. ۇزدىك ويىنشىلارعا تولى كوماندا سول ماۋسىمدا بۇكىل جۇلدەدەن قاعىلدى. سونداي-اق, كلاۋديو رانەريدىڭ كەزىندەگى «لەستەردى» الايىق. اۋتسايدەر كوماندانىڭ اعىلشىن پرەمەر-ليگاسىنداعى چەمپيوندىعى ءالى كۇنگە دەيىن كوپشىلىكتى تاڭ قالدىرىپ كەلەدى.

ارينە, قارجى ماسەلەسى دە بەلگىلى ءبىر دەڭگەيدە ءرول اتقارادى. بىراق فۋتبولدا اقشانىڭ دا ماڭىزدى ەمەستىگىن «لەستەر» 2015/2016 ماۋسىمىندا دالەلدەپ بەردى. ءوز كەزەگىندە «استانا» دا ەۋروپا كوماندالارى سەكىلدى ميلليونداعان قارجى بولمەگەنمەن, الپاۋىت ۇجىمدارعا قارسى لايىقتى ونەر كورسەتىپ كەلەدى.

ستانيمير ستويلوۆ ەلىمىز ەگەمەندىك العان كەزدەن بەرگى ەڭ ۇزدىك باپكەر دەسەك ارتىق ايتقاندىق بولماس ەدى. وعان جوعارىداعى «استانانىڭ» جەتىستىكتەرى مەن باپكەردىڭ كومانداعا سىڭىرگەن ەڭبەگى دالەل.

ايان ءابدۋالي,
«ەگەمەن قازاقستان»