سۋ قويماسى ىسكە قوسىلسا, 6 مىڭ گەكتار سۋارمالى جەر پايدا بولادى. وسكەمەندەگى اقپاراتتىق ورتالىقتا وتكەن بريفينگتە اۋدان اكىمى نۇرلان سىدىقوۆ وسىلاي دەپ ءمالىم ەتتى. اۋدان باسشىسىنىڭ ايتۋىنشا, ءوندىرىسى مەن اۋىل شارۋاشىلىعى قاتار وركەن جايعان جارما اۋدانى 10 ايدىڭ كورسەتكىشى بويىنشا وبلىستاعى 19 قالا مەن اۋدان ىشىندە 1 ورىندى يەلەنىپتى. «باقىرشىق كەن بايىتۋ كومبيناتى» بيىل اۋدان بيۋدجەتىنە 50 ميلليارد تەڭگە ينۆەستيتسيا سالىپتى. «كەن ورنى بيزنەستىڭ الەۋمەتتىك جاۋاپكەرشىلىگى اياسىندا اۋدانعا كومەك قولىن سوزىپ كەلەدى. بىلتىر اۋەزوۆ كەنتىندەگى «اققۋ» بالاباقشاسىن 240 ميلليون تەڭگەگە كۇردەلى جوندەۋدەن وتكىزىپ, ەل يگىلىگىنە بەردى.
وسى رەتتە ايتا كەتەر جاقسى جاڭالىعىمىز, كاسىپورىن جاقىندا وسى كەنتتەگى 1973 جىلدان بەرى جوندەۋ كورمەگەن مەكتەپتى كۇردەلى جوندەۋدەن وتكىزۋگە 300 ميلليون تەڭگە كولەمىندە قارجى ءبولۋ جونىندە شەشىم قابىلدادى. بۇل ءبىلىم ورداسىندا قازىر 475 بالا وقيدى. باقىرشىق ىسكە كىرىسكەننەن بەرى اۋىلداعى بالا سانى دا كوبەيىپ كەلەدى. بۇرىن باقىرشىق اتالعان كەنتكە 1967 جىلى ۇلى جازۋشى مۇحتار اۋەزوۆتىڭ ەسىمى بەرىلگەنىمەن, ەلدى مەكەندە قالامگەر اتىنا بىردە-ءبىر كوشە بەرىلىپ, ەسكەرتكىش قويىلماعان ەكەن. بيىل وسى ولقىلىقتىڭ ورنى تولتىرىپ, كەنتتىڭ ءبىر كوشەسىنە دارا تۇلعانىڭ اتىن بەرىپ, ەڭسەلى ەسكەرتكىشىن ورناتتىق», - دەيدى اۋدان اكىمى. ن.سىدىقوۆ بوكە كەنىشىنىڭ جۇمىسى دا قايتا جاندانىپ, كوشىپ كەتكەن اۋىل تۇرعىندارى قايتا ورالىپ, بۇرىنعى اۋدان ورتالىعى – شار قالاسىنا دا ەرەكشە كوڭىل ءبولىنىپ, شاعىن شاھاردى اباتتاندىرۋعا قوماقتى قارجى بولىنگەنىن اتاپ ءوتتى. مۇگەدەك بالالار مەن حالىققا قىزمەت كورسەتۋ ورتالىعى جاڭا عيماراتقا كوشىرىلىپ, قالا ورتالىعىندا ھاكىم ابايعا كەۋدە ءمۇسىن قويىلعانىن تىلگە تيەك ەتتى.
«بيىل شاردا 5 جارىم شاقىرىم جول اسفالتتالدى. بۇل – قالا تاريحىندا بۇرىن-سوڭدى بولماعان وقيعا. كەلەسى جىلى شار شاعىن قالالاردى دامىتۋ باعدارلاماسىنا ەنگىزىلەدى, وسى رەتتە تەك كوشەلەرگە قاتىستى 17 جوبا ازىرلەدىك. اتالعان جوبالارىمىز وسى باعدارلاماعا ەنەر بولسا, قالادا اسفالتتالماعان كوشە قالمايدى. سونىمەن قاتار شاردا سپورت كەشەنىن سالۋ ءۇشىن سمەتالىق-جوبالىق قۇجاتتاردى ازىرلەپ, ساراپتامادان وتكىزىپ قويدىق», - دەيدى ن.سىدىقوۆ.
ازامات قاسىم,
«ەگەمەن قازاقستان»
شىعىس قازاقستان وبلىسى,
جارما اۋدانى
سۋرەتتى تۇسىرگەن اۆتور
