شارانىڭ اشىلۋ راسىمىنە كورەيا رەسپۋبليكاسىنىڭ قازاقستانداعى ەلشىلىگىنىڭ حاتشىسى تە كەن گەن قاتىسىپ, كورەيا پرەزيدەنتى مۋن تسزى ءيننىڭ قۇتتىقتاۋ حاتىن وقىدى. ۇلتتىق مۋزەيدىڭ ديرەكتورى مىندەتىن اتقارۋشى لەونيد كوچەتوۆ: «مۇندا ەلىمىزدە تۇراقتاعان كورەيلەردىڭ قازىرگى تۇرمىس-تىرشىلىگى جان-جاقتى باياندالادى. نەگىزىنەن استانا, الماتى, قىزىلوردا, ۇشتوبە قالالارىنداعى كورەيلەردىڭ سۋرەتتەرى توپتاستىرىلعان ۇلتتىق مۋزەيدەگى فوتوكورمە ەشكىمدى دە بەي-جاي قالدىرماسى انىق. الداعى ۋاقىتتا ەكى ەل اراسىنداعى مادەني جانە مۋزەي سالاسىنداعى ىنتىماقتاستىق قارىم-قاتىناستار بارىنشا جاندانا تۇسەتىنىنە سەنىمدىمىن», – دەپ تىلەك ءبىلدىردى.
كورمەگە قاتىسۋشى, پارلامەنت ءماجىلىسىنىڭ دەپۋتاتى رومان كيم:
– بيىلعى جىل قازاقستاندىق كورەيلەر ءۇشىن ايتۋلى جىل بولعالى تۇر. سەبەبى قازاق جەرىنە كورەيلەردىڭ قونىستانعانىنا 80 جىل تولادى, سونىمەن قاتار ەكى ەل اراسىنداعى ديپلوماتيالىق قارىم-قاتىناستىڭ ورناعانىنا – 25 جىل. وسىدان 80 جىل بۇرىن تاعدىردىڭ ايداۋىمەن قازاقستانعا تاباندارى تيگەن كورەيلەر جەرگىلىكتى حالىقتىڭ قامقورلىعىنىڭ ارقاسىندا زۇلمات جىلدار زوبالاڭىنان امان قالدى. اش-جالاڭاش, ءۇيسىز-كۇيسىز كەلگەن ولاردى قازاقتار جاتسىنباي باۋىرىنا تارتىپ, قولدارىنان كەلگەنشە جاقسىلىق جاسادى. مۇنداعى بارشا كورەي قاۋىمى قازاق حالقىنىڭ قولداۋىنا ريزاشىلىق سەزىمدەرىن بىلدىرەدى, – دەدى.
8 قاراشاعا دەيىن جالعاساتىن فوتوكورمەگە كورەيالىق فوتوسۋرەتشى كيم دجينسوكتىڭ 1937 جىلعى ماجبۇرلەپ كوشىرۋ ساياساتى سالدارىنان قازاقستانعا قونىس اۋدارعان كورەيلەردىڭ قازىرگى ۇرپاقتارىنىڭ كۇندەلىكتى ءومىر-تىرشىلىگىن بەينەلەيتىن دۇنيەلەر قويىلىپ, تانىستىرىلدى.
قازاقستان اۋماعىندا ءومىر ءسۇرىپ جاتقان كورەيلەردىڭ تاعدىرى مەن تاريحىنان فوتودەرەكتەر جيناۋ ماقساتىنداعى بۇل فوتوجوباسىن ازىرلەۋگە كورەي مادەنيەت ورتالىعىنىڭ باستاماسىمەن كيم دجينسوك 2016 جىلدان باستاپ كىرىسكەن بولاتىن.
قازاقستانداعى ەتنيكالىق كورەيلەردىڭ پورترەتتەرىنەن بولەك, كيم دجينسوكتىڭ جۇمىستارىندا بۇگىنگى قازاقستاننىڭ دا جارقىن قىرلارى قالتارىستا قالمايدى: قالالىق پەيزاجدار, تابيعي لاندشافتار جانە قاراپايىم ادامداردىڭ ءومىرى شەبەرلىكپەن ۇيلەستىرىلگەن.
كيم دجينسوك فوتوكورمەسى نەسىمەن ەرەكشەلەنەدى, نە ءۇشىن بۇل جوباعا ونىڭ سۋرەتتەرى اتتاي قالانىپ تاڭدالعان, بولماسا ءبىز ول تۋرالى نە بىلەمىز دەسەك, بۇل ەسىم كورەيا رەسپۋبليكاسىنا ايگىلى فوتوجۋرناليست رەتىندە ءمالىم. الەم ەلدەرىنە ساياحات جاساي ءجۇرىپ ول كورەياداعى چەدجۋ ارالىنداعى «وللە», يسپانياداعى ەل كامينو دە سانتياگو قاجىلىق جولىنداعى, نەپالداعى گيمالاي, پاريجدەگى فرانتسۋز-شۆەيتسارلىق مونبلان باعىتىنداعى جاياۋ جۇرگىنشىلەر ساياحاتىنا قاتىسقان. ول ءوزىنىڭ بارلىق ساپارلارى كەزىندە ادامداردىڭ ومىرلەرىندەگى ەڭ كوركەم ساتتەردى ءوز وبەكتيۆىنە سىيدىرتا الۋىمەن ارىپتەستەرى اراسىندا اسا قۇرمەتكە يە. ونىڭ دەر كەزىندە دالدىكپەن فوتواپپارات نۇكتەسىن باسا ءبىلۋى ارقىلى دۇنيەگە كەلگەن تۋىندىلارى كورەيا كورمەلەرىنە قويىلعان. فوتوگرافتىڭ ءوزى قاراپايىم ادامدارمەن اراداعى تىعىز قارىم-قاتىناستى جوعارى باعالايدى, ادامداردىڭ تەك باستارىنان كەشكەن حيكايالاردى تىڭداپ قانا قويمايدى, سونىمەن قاتار تاريحي ساتتەردى اپپاراتىنا باسىپ ۇلگەرەدى. فوتوشەبەر كينو ونەرى سالاسىنا دا ەداۋىر تەر توگىپتى, جانە كوپتەگەن ۋنيۆەرسيتەتتەردە فوتوونەر تۋرالى تاعىلىمدى لەكتسيالار وقىعان. قازىرگى تاڭدا ول كورەيا رەسپۋبليكاسى پرەزيدەنتى «چونحۆادە» اكىمشىلىگىنىڭ فوتوگرافى.
قاراشاش توقسانباي,
«ەگەمەن قازاقستان»
