قازاق ەلىنە قۇتتى بولسىن ايتامىن. وسىمەن ۇلكەن جۇمىس اياقتالدى دەپ ەسەپتەمەۋ كەرەك. كەرىسىنشە, قات-قابات, قىرۋار, ماڭىزدى جۇمىستىڭ باسى دەپ قابىلداۋىمىز كەرەك. كەلەسى جىلدان باستاپ تياناقتى ىسكە اسىرۋعا كىرىسەمىز. الدا ءالى جاڭا ءالىپبيدىڭ ىسكە اسىرۋ تەتىكتەرىن باعدارلاۋ, عىلىمي-ادىستەمەلىك جوسپارىن جاساۋ, كوپشىلىكتىڭ كەڭەسىن زەردەلەۋ سەكىلدى تولىپ جاتقان مىندەتتەر تۇر. جۇمىس باستالدى. لاتىن الىپبيىنە كوشكەندە ءتىل ەرەجەلەرى قايتادان جاسالادى. ەڭ باستىسى, ءتىلىمىزدىڭ بۇكىل زاڭدىلىقتارىن ءوزىنىڭ تابيعاتىنا ساي جاساپ شىعارۋىمىز كەرەك.
زيالى قاۋىم وكىلدەرى, تىلشىلەر قاۋىمى جاڭا ءالىپبيدىڭ ەرەجەلەرىن, وقۋلىقتارىن, مۇعالىمدەرىن دايىنداۋ ىسىنە اسىقپاي, ناۋقانداتپاي جۇمىلا كىرىسكەنى ءجون. ءتىل ءبىلىمى عىلىمىنىڭ زاڭدىلىقتارى بويىنشا ولقى تۇستارىن جەتىلدىرىپ, قولعا الىنۋى ءتيىس ماڭىزدى كەزەڭدەرىن جۇيەلەپ, ءتىزىمىن جاساپ, جوسپارلى تۇردە جۇمىس ىستەۋگە عالىمدارىمىز ازىرلىگىن وسى ساتتەن باستاپ كەتۋى كەرەك. حالىقارالىق تاجىريبەنى ەسكەرىپ, ءوز ءتىلىمىزدىڭ نەگىزىنە سۇيەنە وتىرىپ, جاڭا الىپبيمەن قازاقي, ءتول دىبىستىڭ زاڭدىلىقتارىنا سايكەستەندىرىپ, ءبىر ءتىلدىڭ تابيعي ەرەكشەلىگىنە باعىندىرۋ وڭاي شارۋا ەمەس. ا.بايتۇرسىنوۆ نەگىزىن قالاپ بەرگەن جاپ-جاقسى, جان-جاقتى ءتول, عىلىمي جۇيەمىزگە ورالۋدىڭ مۇمكىندىگى بۇل. سوزبەن ەمەس, بىلەك سىبانىپ ءىس-قيمىل تانىتاتىن كەزەڭ كەلدى. مەملەكەتتىك ماڭىزى زور بۇل ىرگەلى ماقساتتى ورىنداۋعا ءتىل ءبىلىمى ينستيتۋتى جۇمىلا كىرىسەدى. ەڭ باستىسى, مەملەكەتتىك ءتىلىمىزدى بۇكىل قوعامدىق سالادا ەركىن قولدانىلاتىن دارا, نەگىزگى, ءارى جۇمىستىڭ, ءارى قارىم-قاتىناستىڭ قۇرالىنا اينالدىرۋىمىز كەرەك. نەگىزگى ماقسات – قازاقستانداعى ءار ازاماتتىڭ مەملەكەتتىك ءتىلدى جەتىك بىلۋىنە جاعداي جاساۋ. ويتكەنى ءتىلىمىز ەركىن دامىعان جاعدايدا قازاقستان تاۋەلسىزدىگى تۇعىرىنا تۇسەدى دەپ ەسەپتەيمىز. لاتىن ءالىپبيىن قابىلداۋ دا وسى ۇلى ماقسات جولىنداعى باستى قادام.
ەردەن قاجىبەك,
ا.بايتۇرسىنوۆ اتىنداعى ءتىل ءبىلىمى ينستيتۋتىنىڭ ديرەكتورى, ۇعا كوررەسپوندەنت-مۇشەسى, فيلولوگيا عىلىمدارىنىڭ دوكتورى, پروفەسسور
