– جاھاندانۋ, تەحنولوگيالىق يننوۆاتسيالار, كليماتتىق, دەموگرافيالىق جانە باسقا دا وزگەرىستەر ادامدار مەن قوعام ءتيىمدى يكەمدەلۋى ءتيىس جاڭا تالاپتار قويىپ, جاڭا مۇمكىندىكتەرگە جول اشادى. الەمنىڭ وزگەرۋى – بالالاردىڭ وزگەرۋى. قازىرگى بالالاردىڭ ءومىرى تۋا تىرشىلىگىنە دەندەپ ەنگەن قۋاتتى تەحنولوگيالارعا بايلانىستى بۇرىنعى الەۋمەتتىك ماڭىزدى ينستيتۋتتاردىڭ ءبىرى بولعان اۋلالاردى جوعالتۋدان باستالادى. ولار الەۋمەتتىك جەلىلەردە وزدەرىنە ءتان تالقىلارمەن, ازىلدەرىمەن, سويلەۋىمەن ءومىر سۇرە باستادى, – دەدى باسقارما ءتورايىمى. وسى رەتتە ك.ءشامشيدينوۆا ساراپشىلار مەن پەداگوگتاردىڭ ايتۋىنشا, بۇگىنگى بالالاردىڭ الدىڭعى بۋىنداعى بالالارعا قاراعاندا كوپ وزگەرگەنىن جەتكىزدى. ياعني, قابىلداۋى جىلدامىراق, ەستە ساقتاۋى ازىراق, ىزدەۋ مەن تابۋدى بىلەتىن, ازداعان اقپاراتتاردى بولىسە الاتىن, ورتاعا تەز قوسىلاتىن, ويىن باتىل جەتكىزۋگە قورىقپايتىن ۇرپاق ءوسىپ كەلەدى. سونداي-اق ولار الەۋمەتتىك جەلىلەردە قالاي جاقسى تابىس تابۋ تۋرالى دا جەتىك بىلەدى. وسى ىسپەتتى وزگەرىستەر زامانىندا مەكتەپتەر وقۋشىلاردى ومىرگە دايىنداپ ۇلگەرە مە دەگەن ساۋال تۋى زاڭدىلىق. بۇل قوعامنىڭ دا, جۇمىس بەرۋشىلەردىڭ دە كوكەيىندە تۇرعان ماسەلە.
وسى سياقتى كۇردەلى جايتتەردىڭ شەشىمىن ىزدەۋدەگى حالىقارالىق زەرتتەۋلەردى تىلگە تيەك ەتكەن كۇلاش نوعاتايقىزى زياتكەرلىك مەكتەپتەردىڭ ماقساتى وزگەرىسكە تەز بەيىمدەلۋگە قابىلەتتى تۇلعا تاربيەلەۋ ەكەنىن ايتتى. قازىرگى كەزدە زياتكەرلىك مەكتەپتەردە نەگىزگى ءبىلىم بەرۋ باعدارلاماسى قوسىمشا ەلەكتيۆتى كۋرستارمەن جانە ساباقتان تىس تاربيە شارالارىمەن تولىقتىرىلعان. بۇل ورايدا «تۋعان ەلگە – تاعزىم», «100 كۇيدىڭ تاريحى», «ەكى اپتا اۋىلدا», «قازاق اندەرى» سىندى جوبالار ساتىمەن جۇزەگە اسىرىلۋدا. وسى جوبالار اياسىندا ولكەتانۋ ەكسپەديتسيالارى ۇيىمداستىرىلىپ, بەس جىلدا 20-عا جۋىق مارشرۋت بويىنشا تاريحي-تانىمدىق زەرتتەۋ جۇمىستارى جۇرگىزىلدى. وقۋشىلار 300-گە جۋىق تاريحي نىساندارمەن تانىستى. ونىڭ ىشىندە كونە ارحەولوگيالىق مۇرالار, وندىرىستىك كاسىپورىندار مەن تابيعي قورىقتار دا بار.
دۋمان اناش,
«ەگەمەن قازاقستان»
