جىل: 2017
ەل: رەسەي
رەجيسسەر: الەكسەي ۋچيتەل
باستى رولدەردە: ميحالينا ولشانسكا, لارس ايدينگەر, لۋيزا ۆولفرام, دانيلا كوزلوۆسكي, ينگەبورگا داپكۋنايتە, سەرگەي گارماش, ەۆگەني ميرونوۆ, گريگوري دوبرىگين, گالينا تيۋنينا, ۆيتالي كوۆالەنكو
جانر: دراما, تريللەر, تاريحي
بيۋدجەت: $25 000 000
الەمدىك پرەمەرا: 8 قازان 2017
قازاقستانداعى پرەمەرا: 26 قازان 2017
جاس شەكتەۋى: ە16 - ون التى جاسقا دەيiنگi كورەرمەندەرگە اتا-انالارىمەن بiرگە كورۋگە ۇسىنىلاتىن فيلمدەر
ۇزاقتىعى: 109 مينۋت
بالەرينا ماتيلدا كشەسينسكايا مەن يمپەراتور II نيكولايدىڭ اراسىنداعى قارىم-قاتىناسقا قۇرىلعان كوركەم تۋىندىنىڭ رەجيسسەرى الەكسەي ۋچيتەل. كارتيناداعى باستى ءرولدى پولياك اكتريساسى ميحالينا ولشانسكا سومداسا, يمپەراتور ەكىنشى نيكولايدى نەمىس اكتەرى لارس ايدينگەر ويناپ شىقتى. سونىمەن بىرگە فيلمگە ينگەبورگا داپكۋنايتە, سەرگەي گارماش, ەۆگەني ميرونوۆ, دانيلا كوزلوۆسكي, گريگوري دوبرىگيندەرمەن جانە باسقالار ءتۇستى. ءبىر قىزىعى لارس ايدينگەر ورىس ءتىلىن بىلمەيتىن بولعاندىقتان, رەسەيدىڭ تەاتر جانە كينو ءارتيسى ماكسيم ماتۆەەۆ دۋبلياج جاساعان.
«فيلم ءدىندارلاردىڭ سەنىمىن اياقاستى ەتتى» دەگەن ۋاجبەن گوسدۋمانىڭ دەپۋتاتى ناتاليا پوكلونسكايا مەن بىرقاتار پراۆوسلاۆ قوعامدىق ۇيىمدارى كارتينانىڭ باستى قارسىلاسىنا اينالدى. ءتىپتى پوكلونسكايا باس پروكۋراتۋراعا شاعىم ءتۇسىرىپ, فيلم ماتەريالدارىن جۇيەلى ساراپتامادان وتكىزۋ كەرەكتىگىن العا تارتتى. ونىڭ ايتۋىنشا, فيلمدەگى وبراز اۋليە قاتارىنا كوتەرىلگەن نيكولايدىڭ تۇلعاسىنا قايشى كەلىپ وتىر. وسىمەن بىرگە دەپۋتات كارتينانى كورمەگەنىن, مۇلدەم كورگىسى كەلمەيتىنىن ايتقان. فيلم سيۋجەتىنە نارازىلىق تانىتقاندار ءفيلمنىڭ نارىققا شىعۋىنا قارسىلىق رەتىندە ارنايى پەتيتسيا ۇيىمداستىرىپ, وعان 13 مىڭنان استام ادام قول قويعان. اتالعان فاكتىلەر بويىنشا رەسەيدىڭ باس پروكۋراتۋراسى رف مادەنيەت مينيسترلىگى مەن سانكت-پەتەربۋرگ ۋنيۆەرسيتەتى ماماندارىنان قۇرىلعان ساراپشىلار كەڭەسىمەن بىرلەسىپ زەرتتەۋ جۇرگىزدى. ناتيجەسىندە ءفيلمنىڭ نارىققا شىعۋىنا تىيىم سالۋعا ەش نەگىز جوق ەكەنىن حابارلادى.
رەسەيلىك بەلگىلى كينوسىنشى انتون دولين رەجيسسەر الەكسەي ۋچيتەل قوعام تالقىلاۋدان اينالىپ وتەتىن, تىيىم سالىنعان تاقىرىپتى قوزعادى دەپ ەسەپتەيدى.
«1917 جىلعى رەۆوليۋتسيانىڭ ءجۇز جىلدىعىندا ءبىزدىڭ كينوماتوگرافتار بالىقتاي ءۇنسىز وتىر. قىزىلدار مەن اقتارعا, لەنين مەن پاتشاعا ءتيىسۋ ارقىلى الدەكىمدى جابىرلەپ الاۋدىڭ قاۋىپتى ەكەنىن بارلىعى سەزەدى. حانزادا مەن حاس سۇلۋدىڭ ماحاببات تاريحى ەرتەگىدەي اتموسفەراعا قۇرىلىپ قانا قويماي, تەڭدەسسىز كوركەم شەشىم تۋدىرعان. قايتالانباس دەكوراتسياسى مەن وپەراتورلىق جۇمىستىڭ مىنسىزدىگىنەن باسىڭ اينالادى, ال كوستيۋمدەر ءوز الدىنا بولەك اڭگىمە. فيلم ەمەس, مەرەيتويعا تارتۋ ەتىلگەن تورت سىقىلدى», دەيدى ول.
ءفيلمنىڭ ءتۇسىرىلىم جۇمىسترى مارينسكي تەاترى مەن ەكاتەرينينسكي, الەكساندروۆسكي سياقتى ءىرى سارايلاردا ءوتتى. كارتيناعا 17 توننادان استام ماتا جۇمسالىپ, 5 مىڭداي كيىم تىگىلگەن. فيلم مۋزىكاسىن وسكار جۇلدەسىنىڭ يەگەرى امەريكالىق كومپوزيتور ماركو بەلترامي جازىپ, مارينسكي تەاترىنىڭ سيمفونيالىق وركەسترى ورىنداپ شىققان.
ايا ءومىرتاي,
«ەگەمەن قازاقستان»
