پالاتا قازاقستان مەن ساۋد ارابياسى كورولدىگى اراسىنداعى ۇستاپ بەرۋ تۋرالى كەلىسىمدى راتيفيكاتسيالادى.
كەلىسىم ءاربىر ۋاعدالاسۋشى مەملەكەتتىڭ ءوزىنىڭ اۋماعىندا جۇرگەن ۇستاپ بەرۋگە اكەلەتىن قىلمىستار ءۇشىن كۇدىك كەلتىرىلەتىن, ايىپتالاتىن نەمەسە سوتتالعان كەز كەلگەن ادامدى قىلمىستىق جاۋاپكەرشىلىككە تارتۋ نەمەسە سوت ۇكىمىن ورىنداۋ ماقساتتارىندا ۇستاپ بەرۋىنە باعىتتالعان.
كەلىسىمدە ادامدى ۇستاپ بەرۋدىڭ جانە ودان باس تارتۋدىڭ نەگىزدەرى كوزدەلگەن.
سونداي-اق, قازاقستان مەن ساۋد ارابياسى كورولدىگى اراسىنداعى سوتتالعان ادامداردى بەرۋ تۋرالى كەلىسىم راتيفيكاتسيالاندى.
قۇجات سوتتالعان ادامداردىڭ ازاماتتىعى جاعىنان تيەسىلى قوعامعا قايتا ارالاسۋىنا جاردەم كورسەتۋگە, الەۋمەتتىك وڭالتۋعا, سوتتالعان ادام ازاماتى بولىپ تابىلاتىن مەملەكەتتە جازانى وتەۋدى جالعاستىرۋ ماقساتىندا بارىنشا ىنتىماقتاسۋدى جۇزەگە اسىرۋعا باعىتتالعان.
كەلىسىمنىڭ ەرەجەلەرىنە سايكەس, تاراپتاردىڭ ارقايسىسى ەكىنشى تاراپقا ونىڭ اۋماعىندا ەكىنشى تاراپتىڭ كەز كەلگەن ازاماتىنا قاتىستى شىعارىلعان, باس بوستاندىعىنان ايىرۋ تۇرىندەگى جازانى كوزدەيتىن, سوتتىڭ زاڭدى كۇشىنە ەنگەن ۇكىمدەرى تۋرالى دەرەۋ حابارلاۋعا مىندەتتەنەدى.
سەناتورلار ۇستاپ بەرۋ تۋرالى كونۆەنتسيانى راتيفيكاتسيالادى. كونۆەنتسياعا 1933 جىلعى 26 جەلتوقساندا مونتەۆيدەو قالاسىندا (ۋرۋگۆاي رەسپۋبليكاسى) قول قويىلعان.
كونۆەنتسيا ايىپتالۋشىلاردى نەمەسە سوتتالعان ادامداردى الەۋمەتتىك وڭالتۋعا جاردەمدەسۋ ماقساتىندا ولاردى ۇستاپ بەرۋ سالاسىندا ىنتىماقتاستىق ورناتۋدى, سونداي-اق سوتتالعان ادامدار ءۇشىن جازاسىن ءوز ەلىندە وتەۋ مۇمكىندىگىن جاساۋدى كوزدەيدى.
وسى كونۆەنتسيانىڭ ەرەجەسىنە سايكەس, وعان قاتىسۋشى مەملەكەتتەر وزدەرىنىڭ اۋماعىندا جۇرگەن ايىپتالۋشىلاردى نەمەسە سوتتالعان ادامداردى قىلمىسى ءۇشىن قىلمىستىق قۋدالاۋدى جانە سوت ۇكىمىن ورىنداۋدى جۇزەگە اسىرۋ ءۇشىن بەرۋگە مىندەتتەنەدى.
كونۆەنتسياعا سايكەس ۇستاپ بەرىلگەن ادامنىڭ ۇستاپ بەرۋدى سۇراتۋعا سەبەپ بولعان قۇقىققا قارسى ءىس-ارەكەتتى جاساۋ ارقىلى العان نەمەسە دالەلدەمە رەتىندە پايدالانىلۋى ىقتيمال مۇلكى تاركىلەنۋگە جانە تالاپ ەتۋشى ەلگە بەرىلۋگە جاتادى.
كونۆەنتسيانى راتيفيكاتسيالاۋ كەزىندە قازاقستان رەسپۋبليكاسى كونستيتۋتسياسىنىڭ 11-بابىنا سايكەس كونۆەنتسيانىڭ 2-بابى بويىنشا وزدەرىنىڭ ازاماتتارىن ۇستاپ بەرمەۋى تۋرالى, سونداي-اق 15-بابى بويىنشا ىزدەستىرىلىپ جاتقان ادامنىڭ م ۇلىكتەرىن تاركىلەۋ جانە بەرۋ قازاقستان رەسپۋبليكاسىنىڭ زاڭناماسىنا سايكەس جۇزەگە اسىرىلاتىنى جونىندە مالىمدەمە جاساۋ ۇسىنىلادى.
پالاتا «قازاقستان رەسپۋبليكاسى مەن ازيا دامۋ بانكى اراسىنداعى № 2967-KاZ قارىز تۋرالى كەلىسىمگە (جاي وپەراتسيالار) (واوەى 2 ءدالىز ينۆەستيتسيالىق باعدارلاماسى [ماڭعىستاۋ وبلىسىنداعى ۋچاسكەلەر] – 2-جوبا) تۇزەتۋلەرگە قاتىستى قازاقستان رەسپۋبليكاسى مەن ازيا دامۋ بانكى اراسىنداعى كەلىسىم-حاتتى راتيفيكاتسيالاۋ تۋرالى» زاڭدى قابىلدادى.
قۇجاتتىڭ نەگىزگى ماقساتى واوەى 2 ءدالىز ينۆەستيتسيالىق باعدارلاماسىنىڭ 1-قوسىمشاسىمەن ماڭعىستاۋ وبلىسىنداعى ۇزىندىعى 73 شاقىرىم «جەتىباي-جاڭاوزەن» جولىن رەكونسترۋكتسيالاۋدى قارجىلاندىرۋ بولىپ تابىلادى.
جوبا قازاقستان مەن ازيا دامۋ بانكى اراسىنداعى قارىز تۋرالى كەلىسىم اياسىندا «شەتپە-اقتاۋ» جوباسى بويىنشا ۇنەمدەلگەن قاراجات ەسەبىنەن جۇزەگە اسىرىلاتىن بولادى.
كەلىسىم-حاتتى راتيفيكاتسيالاۋ قازاقستان اۆتوموبيل جولدارىن دامىتۋ جانە رەكونسترۋكتسيالاۋ بويىنشا شىعىنداردى ءتيىمدى باسقارۋعا باعىتتالعان. وسى جوبانىڭ ىسكە اسۋى قازاقستاندا كولىك دالىزدەرىن دامىتۋعا نەگىزدەلگەن جانە كولىككە جاردەمدەسۋ سالاسىنداعى شارالاردى جاقسارتۋعا باعدارلانعان كولىك ساياساتىن قالىپتاستىرۋعا ىقپال ەتەتىن بولادى.
سەنات وتىرىسى بارىسىندا سەناتور ن.قىلىشباەۆ پرەمەر-مينيستر ب.ساعىنتاەۆقا قىتايداعى ەتنيكالىق قازاق ۇلتى وكىلدەرى قۇقىقتارىنىڭ بۇزىلۋى جونىندەگى باق-تاعى اقپاراتتارعا تۇسىنىك بەرۋ تۋرالى دەپۋتاتتىق ساۋال جولدادى.
«قىتاي حالىق رەسپۋبليكاسىنىڭ شىڭجان – ۇيعىر اۆتونومدى ايماعىندا تۇراتىن قازاق ۇلتى وكىلدەرىنىڭ زاڭدى قۇقىقتارى قىسىم كورىپ جاتقانى تۋرالى شىلدە ايىنداعى دۇنيەجۇزى قازاقتارىنىڭ قۇرىلتايىندا كوتەرىلگەن بولاتىن. سودان بەرى اقپاراتتىق كەڭەستىك پەن الەۋمەتتىك جەلىلەردە شىڭجاندا قونىس تەپكەن ءبىر جارىم ميلليونان استام قانداستارىمىزدىڭ زاڭدى قۇقىقتارىنىڭ شەكتەلۋى جونىندەگى اڭگىمە كەڭىنەن تارالىپ كەلەدى», - دەدى ن.قىلىشباەۆ.
سەناتور: «بۇل اقپارات قانشالىقتى شىندىققا جاناسادى جانە ءسىم ماسەلەنى زەردەلەپ ساراپتاۋ ءۇشىن قانداي جۇمىستار جۇرگىزدى, ديپلوماتيالىق جولدار ارقىلى قىتاي تاراپىمەن كەلىسسوزدەر ءيا بولماسا كونسۋلتاتسيالار جۇرگىزىلدى مە؟», - دەپ سۇراق قويدى.
سەنات وتىرىسىندا سونداي-اق ەرىك سۇلتانوۆتىڭ - سولتۇستىك قازاقستان جانە قوستاناي وبلىستارىندا توپتىق سۋ قۇبىرلارىن قايتا قۇرۋ ءۇشىن قاراجات ءبولۋ قاجەتتىلىگى تۋرالى; ءالي بەكتاەۆتىڭ - مەديتسينا قىزمەتكەرلەرىنىڭ ەڭبەك اقىسىن كوتەرۋ تۋرالى; سەناتور ۆلاديمير ۆولكوۆتىڭ - تمد پارلامەنتارالىق اسسامبلەياسىنىڭ ءتيىستى ۇلگى زاڭدارى مەن ۇسىنىمدارىنىڭ نورماتيۆتىك قۇقىقتىق اكتىلەرىن ازىرلەۋ كەزىندە «قۇقىقتىق اكتىلەر تۋرالى» زاڭعا ەسەپ جۇرگىزۋدى كوزدەيتىن تولىقتىرۋ ەنگىزۋ مۇمكىندىگىن قاراستىرۋدى ەسكەرۋ تۋرالى; دارحان قالەتاەۆتىڭ - گيدروتەحنيكالىق قاداعالاۋعا قاتىستى جانە ءزىلزالادان قاۋىپسىزدىكتى قامتاماسىز ەتۋ سالاسىنداعى پروبلەمالىق ماسەلەلەر تۋرالى دەپۋتاتتىق ساۋالدارى جاريا ەتىلدى.
