35 جاستاعى پەتروپاۆلدىق تۇرعىننىڭ وكپە دىمكاسىنە شالدىققانىنا ون جىلعا تاياپ قالىپتى. اسقىندىرىپ العاندىقتان قانشا ەم-دوم قابىلداسا دا, قۇلان-تازا ايىعىپ كەتە الماعان. سىرقاتى جانىنا قاتتى باتقان ول دارىگەرلەردىڭ كەڭەسىنە قۇلاق اسىپ, وپەراتسيا ۇستەلىنە جاتۋعا تاۋەكەل ەتكەن. باعىنا قاراي ەلىمىزدە العاش رەت قولدانىلعان زاماناۋي وتا ادىسىنە كەزىگىپ, بىردەن كەلىسكەن.
– بۇعان دەيىن ول وتە ءالسىز بولاتىن. ءجۇرىپ-تۇرۋى قيىنعا سوققاندىقتان, تەز ەنتىگىپ, شارشاپ قالاتىن. تەگىن وتادان كەيىن جاعدايى جاقسارىپ, جاقىن ارادا ۇيىنە ورالادى, دەدى وبلىستىق تۋبەركۋلەزگە قارسى ديسپانسەردىڭ حيرۋرگيا بولىمشەسىنىڭ مەڭگەرۋشىسى توبىلجان جاماقوۆ ناۋقاستىڭ قازىرگى جاعدايى تۋرالى.
ونىڭ ايتۋىنشا, بۇل ءادىستى ۇلتتىق فتيزيوپۋلمونولوگيا عىلىمي ورتالىعى وكپە حيرۋرگياسى ءبولىمىنىڭ مەڭگەرۋشىسى, پروفەسسور قۇلاحمەت ەرىمبەتوۆ وسىدان ەكى جىل بۇرىن تاجىريبەگە ەنگىزگەن ەكەن. بۇعان دەيىن ناۋقاستىڭ جارتى وكپەسى مەن بىرنەشە قابىرعاسى الىنىپ تاستالىپ, سالدارىنان ءجۇرىسى وزگەرىپ, ءبىر جاعىنا قاراي قيسايىپ قالاتىن. ەندى قابىرعالاردىڭ استىنا سيليكون قويۋ ارقىلى وكپەدەگى تەسىكتەر بىتەلەدى. ارنايى يمپلانت تۋبەركۋلەز تاياقشالارىنىڭ تاراپ كەتۋىنىڭ, ۆيرۋستاردىڭ كوبەيۋىنىڭ جولىن كەسەدى. سيليكوندى يمپلانتتىڭ قۇنى 400 مىڭ تەڭگە تۇرادى, شىعىن مەملەكەت تاراپىنان وتەلەدى.
باس دارىگەر قانىش بيجانوۆ جىل وتكەن سايىن ماتەريالدىق-تەحنيكالىق بازانىڭ نىعايا تۇسكەنىن, كۇردەلى جوندەۋ جۇمىستارىنا 100 ميلليون تەڭگە بولىنگەنىن, جوعارى تەحنولوگياعا نەگىزدەلگەن مەديتسينالىق قۇرال-جابدىقتار ساتىپ الىنعانىن جەتكىزدى.
بۇگىندە 648 ادام ارنايى ەسەپكە الىنىپ, تۇراقتى ەم-دوم كورسەتىلۋدە. جاڭا تاسىلمەن ءۇش ناۋقاسقا وتا جاساۋ مىندەتى تۇر.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
سۋرەتتى تۇسىرگەن
امانگەلدى بەكمۇراتوۆ
