قاراپايىم كولىك جوندەۋشىدەن باستاپ جەتەكشىگە دەيىنگى كادر دايىنداۋ جۇيەسىن جەتىلدىرۋ باعىتىندا اتىراۋدا بىرقاتار شارالار جۇزەگە اسۋدا. «اتىراۋ-سمارت» مەكەمەسى قوعامدىق كولىكتەگى قىزمەتكەرلەردىڭ بىرىڭعاي مالىمەتتەر بازاسىن جاساقتاپ, مامانداردى دايىنداۋ مەن قايتا دايارلاۋ جۇمىسىن ۇيىمداستىرۋدى قولعا الدى. تاعى ءبىر جاڭالىق – مۇنايلى وڭىردە «قوعامدىق كولىكتى دامىتۋ-2020» باعدارلاماسى جاسالدى. سالا ماماندارى مەن عالىمداردىڭ قاتىسۋىمەن دايىندالعان باعدارلاما تۇجىرىمداماسى مۇنايلى ايماقتاعى كولىك قاتىناسىن رەتتەۋگە باعىتتالعان.
قازىر وبلىس ورتالىعىندا 24 قولدانىستاعى مارشرۋت بار. ونىڭ 12-ءسى قالا ماڭىنداعى اۋىلداردان كۇنىنە 84 مىڭعا جۋىق جولاۋشى تاسىمالدايدى. اۆتوبۋستاردىڭ ءبارى دەرلىك ەسكىرگەن. «وسى قارقىندا كەتە بەرسە, ەندى ءبىر بەس جىلدا اۆتوبۋستاردىڭ قولدانىستان شىعىپ قالۋى ابدەن مۇمكىن, – دەيدى ل.ب.گونچاروۆ اتىنداعى قازاق كولىك اكادەمياسىنىڭ پروفەسسورى, تەحنيكا عىلىمدارىنىڭ دوكتورى جۇماجان جاڭبىروۆ. – قازىردىڭ وزىندە حالىق تاكسي قىزمەتىنە كوبىرەك جۇگىنەدى».
عالىم اتىراۋ قالاسىنىڭ ماڭىنان سالىناتىن كولىك-لوگيستيكالىق ورتالىق كوپتەگەن كۇرمەۋلى ماسەلەلەردىڭ شەشىمىن تابادى دەگەن ۇمىتتە. دامۋ تۇجىرىمداماسىنا سايكەس, قالاعا ءالى دە 345 اۆتوبۋس كەرەك. ال جاڭا اۆتوبۋستار الىپ, ماتەريالدىق-تەحنيكالىق بازانى جاڭارتىپ, ينفراقۇرىلىم مەن جول قۇرىلىسىن جۇرگىزۋ ءۇشىن 12 ميلليارد تەڭگە قاجەت.
اتىراۋ قالاسى اكىمىنىڭ ورىنباسارى مەيىرىم قالاۋيدىڭ ايتۋىنشا, كاسىپكەرلەردىڭ وسى سالاعا ينۆەستيتسيا قۇيىپ, پايدا تابۋىنا مەملەكەت تاراپىنان كورسەتىلەتىن قولداۋ كوپ. ال جاڭا تۇجىرىمداما بويىنشا اۆتوبۋستار «اقىلدى» مارشرۋت كەستەسى نەگىزىندە قوزعالادى. سونداي-اق بىرنەشە باعىتقا جاڭا مارشرۋتتار قوسىپ, ەلەكتروندى بيلەت ەنگىزۋ دە جوسپاردا بار.
باقىتگۇل باباش,
«ەگەمەن قازاقستان»
اتىراۋ
