ەقىۇ-نىڭ توراعاسى اۋستريا تاراپى اتالعان ءىس-شارا جاڭاشا ويلاۋعا جانە قورشاعان ورتا سالاسىنداعى ماسەلەلەردى بىرلەسە شەشۋگە ۇلەس قوساتىنىن ايتىپ, «جاسىل» ەكونوميكا ماسەلەلەرىنە اسا ءمان بەرەتىنىن مالىمدەدى. وسى ورايدا ەقىۇ ەكونوميكا جانە ەكولوگيا كوميتەتىندەگى قازاقستاننىڭ توراعالىعىن ەرەكشە اتاپ ءوتتى جانە ۇيىمنىڭ ەكونوميكالىق جانە ەكولوگيالىق فورۋمىنىڭ (ەەف) ەكىنشى دايىندىق جينالىسى بيىل ماۋسىمدا استانادا وتكەن ەكسپو-2017 حالىقارالىق مامانداندىرىلعان كورمەسى شەڭبەرىندە ۇيىمداستىرىلۋىنىڭ ماڭىزدىلىعىنا نازار اۋداردى.
ەقىۇ ەكونوميكا جانە ەكولوگيا كوميتەتىنىڭ توراعاسى, قازاقستان رەسپۋبليكاسىنىڭ ەقىۇ-داعى تۇراقتى وكىلى قايرات سارىباي قازاقستاننىڭ قورشاعان ورتا سالاسىندا «قازاقستان-2050» ستراتەگياسى, ء«ۇشىنشى جاڭعىرۋ» جانە «جاسىل كوپىر» حالىقارالىق باعدارلامالارى شەڭبەرىندە جۇرگىزىلىپ جاتقان جۇمىس تۋرالى ەگجەي-تەگجەيلى اقپارات ۇسىندى. سونداي-اق ەكسپو ينفراقۇرىلىمى نەگىزىندە استانادا قۇرىلاتىن «بولاشاقتىڭ ەنەرگياسى» جاسىل تەحنولوگيالار جانە ينۆەستيتسيالىق جوبالار حالىقارالىق ورتالىعىنىڭ جۇمىسىنا ەقىۇ ۇلەس قوسا الاتىنىن اتاپ ءوتتى.
شاراعا قازاقستان ەكولوگيالىق ۇيىمدارىنىڭ ءتورايىمى ايگۇل سولوۆەۆا مەن «حالىقارالىق ارالدى قۇتقارۋ قورى» سۋ رەسۋرستارى دەپارتامەنتىنىڭ جەتەكشىسى ءامىرحان كەنشىموۆ قاتىسىپ, جينالىس بارىسىندا كوتەرىلگەن وزەكتى ماسەلەلەر بويىنشا ويلارىمەن ءبولىستى.
اتاپ ايتقاندا, ءا.كەنشىموۆ سۋ ماسەلەلەرىنە ارنالعان سەسسيا بارىسىندا حالىقارالىق ۇيىمدارمەن, ونىڭ ىشىندە ەقىۇ-مەن بىرلەسە ارال تەڭىزىن قۇتقارۋ شەڭبەرىندە جۇزەگە اسىرىلعان جوبالار تۋرالى حاباردار ەتتى جانە قازاقستاندا سۋ شارۋاشىلىعى ماماندارىن دايارلاۋ تۋرالى ماعلۇمات ۇسىندى.
ا.سولوۆەۆا ەنەرگەتيكا تيىمدىلىگى مەن جاڭعىرمالى ەنەرگەتيكا تاقىرىبىنا ارنالعان سەسسيادا سپيكەر رەتىندە قازاقستان ۇكىمەتى مەن قوعامدىق بىرلەستىكتەردىڭ اتالعان سالاداعى جۇمىسى تۋرالى تولىمدى اقپارات بەردى.
يتاليانىڭ ەقىۇ-داعى تۇراقتى وكىلى الەسساندرو ازوني قورىتىندى سەسسيادا ءوز ەلىنىڭ 2018 جىلى ۇيىمعا توراعالىعى بارىسىندا گەرمانيانىڭ 2016 جىلعى جانە اۋستريانىڭ ۇستىمىزدەگى جىلعى توراعالىقتارىنىڭ ەكىنشى ولشەمدەگى باسىمدىقتارىن جالعاستىراتىنىن جانە ەەف-ءتىڭ ءبىرىنشى دايىندىق جينالىسىن تسيفرلى پىشىمگە كوشىرۋ, ەكىنشى دايىندىق جينالىسىن ادام كاپيتالىن دامىتۋ مەن جىل سايىنعى پراگا فورۋمىن جاقسى باسقارۋ جانە جاۋاپتى باسشىلىق تاقىرىبىنا ارنايتىنىن مالىمدەدى. سونىمەن قاتار يتاليا توراعالىعى بارىسىندا بيزنەس-كونفەرەنتسيا جوسپارلانعانىن اتاپ ءوتتى.
ايتا كەتەيىك, الداعى 7-8 جەلتوقساندا ۆەنادا وتەتىن ەقىۇ مينيسترلەر كەڭەسىنىڭ ناتيجەسى رەتىندە ەقىۇ اۋستريا توراعالىعى كوميتەتتەگى قازاقستان توراعالىعىمەن بىرلەسە ەكونوميكا جانە قورشاعان ورتا بويىنشا شەشىم جوبالارىن قابىلداۋدى جوسپارلاۋدا.
«ەگەمەن-اقپارات»
