ۆياچەسلاۆ زاششيتين 24 ماۋسىم كۇنى وتباسىمەن نوۆو-شۋلبا سۋ قويماسىنىڭ جاعاسىندا دەمالىپ جاتقان بولاتىن. كەنەت ايدىندا تولقىن كوتەرىلىپ, ۇستىندە ەكى ايەل مەن التى جاسار بالا قالقىپ جۇرگەن ماتراستى اۋدارىپ تاستايدى. بالا بىردەن باتىپ كەتەدى. ۆياچەسلاۆ جۇگىرىپ جەتكەن كەزدە سۋدا ەكى-اق ادام قالعان ەدى. زاششيتين بىردەن كومەككە ۇمتىلدى: اۋەلى باتىپ بارا جاتقانداردىڭ ءبىرىن جاعاعا الىپ شىقتى دا ىلە ءۇش ءجۇز مەتردەي جەردە باتىپ بارا جاتقان ەكىنشى ادامعا قاراي ءجۇزدى. ۆياچەسلاۆ ونى دا اجال اۋزىنان قۇتقارىپ قالدى. كەلەسى كۇنى زاششيتين باتىپ كەتكەن بالانىڭ مۇردەسىن ىزدەستى.
– بالا كەزىمدە جەتى جىل جۇزۋمەن اينالىستىم, - دەيدى ەرجۇرەك ازامات. – ءوز مۇمكىندىگىمدى ءبىلدىم. سۋدا كۇشىمدى ۇزاعىراق ساقتاۋ ءۇشىن جاعالاۋدا كوپ جۇگىردىم. ءبارىن اقىلمەن ىستەۋ كەرەك, قۇتقارۋدى دا.
ءبىراز ۋاقىت وتكەننەن كەيىن شقو توتەنشە جاعدايلار دەپارتامەنتى ۆياچەسلاۆ ءزاششيتيندى سۋعا باتقان ادامدى قۇتقارعانى ءۇشىن مەدالمەن ماراپاتتاۋ تۋرالى بۇيرىق شىعاردى. ول ماراپات قۇتقارۋشى كۇنىنە وراي مەتاللۋرگتەر سارايىندا وتكەن شارادا سالتاناتتى تۇردە تاپسىرىلدى.
- تەگى دە تەگىن قويىلماعان ازامات ارەكەتسىز قالار ما ەدى؟ – دەپ ويلايدى كاسىبي قۇتقارۋشىلىر. – ءوز ءومىرىن قاتەرگە تىگىپ, ادامدى اجالدان اراشالاپ قالدى, بۇل – ناعىز ەرلىك.
ۆياچەسلاۆ ماراپاتقا ريزاشىلىعىن ءبىلدىردى, بىراق ونى كەرەمەت ەرلىك دەپ سانامايتىنىن ايتتى. ءبىر ەستە قالارلىعى – ول باسىنان وتكەن بۇل جايتتى ۇجىمىندا دا ءتىس جارىپ ەشكىمگە ايتقان جوق, ونىڭ جاساعان ەرلىگىن تانىستارىنان بەلگىلى بولدى.
ۆياچەسلاۆ زاششيتين ەرەن ەرلىگى ءۇشىن شقو تجد-ءنىڭ ماراپاتىنان باسقا «كازتسينك» كومپانياسىنىڭ, سونداي-اق ۇيىم كاسىپوداعىنىڭ سىيلىقاقىسىنا يە بولدى.
ازامات قاسىم,
«ەگەمەن قازاقستان»
وسكەمەن
