قازىر بۇكىل قوعام بولىپ قولعا الىپ, ءار سالادا ىرگەلى ىستەر اتقارىپ جاتقان «بولاشاققا باعدار: رۋحاني جاڭعىرۋ» باعدارلاماسى ەلدىڭ ساناسىنا سەرپىلىس بەرگەن باستاما بولدى. ەلباسى 2012 جىلعى جەلتوقسان ايىندا جاريا ەتكەن «قازاقستان-2050» ستراتەگياسىندا 2025 جىلدان باستاپ لاتىن الىپبيىنە كوشۋگە كىرىسۋىمىز كەرەكتىگىن مالىمدەگەن بولاتىن. وسى مالىمدەمەسى رۋحاني جاڭعىرۋدىڭ وزەكتى ءبىر سالاسى رەتىندە اتالمىش ماقالادا كەڭىنەن كورىنىس تاپتى. وسىدان سوڭ-اق ەلىمىزدە لاتىن ءالىپبيىنىڭ ءتيىمدى نۇسقاسىن دايىنداۋ, 2018 جىلدان باستاپ جاڭا ءالىپبيدى ۇيرەتەتىن مامانداردى جانە ورتا مەكتەپتەرگە ارنالعان وقۋلىقتاردى دايىنداۋعا كىرىسۋ ءۇشىن الداعى 2 جىلدى ۇيىمداستىرۋ جانە ادىستەمەلىك جۇمىستار جۇرگىزۋگە ارناۋ, سونداي-اق 2025 جىلعا قاراي ءىس قاعازدارىن, مەرزىمدى ءباسپاسوزدى, وقۋلىقتاردى لاتىن الىپبيىمەن باسىپ شىعارۋعا كىرىسۋ مىندەتتەمەسى قويىلدى.
ەلباسىنىڭ تاپسىرماسىنا جانە كەستەگە ساي جۋىردا عالىمداردىڭ, ءتىل ءبىلىمى سالاسىنىڭ وكىلدەرىنىڭ جانە بارشا قانداستارىمىزدىڭ اتسالىسىپ اقىلداسۋى ناتيجەسىندە قازاق ءالىپبيىنىڭ جاڭا گرافيكاداعى بىرىڭعاي ستاندارتتى نۇسقاسى ۇسىنىلدى. جوبانىڭ تيىمدىلىگى مەن قازاق تىلىندەگى دىبىس, ارىپتەردى بەرۋدەگى تيىمدىلىگى ءتىل ءبىلىمى سالاسىنىڭ كورنەكتى عالىمدارىنىڭ تالقىلاۋىنان وتكەن جانە ۇيرەنۋشىلەر ءۇشىن جەڭىل بولۋىمەن ەرەكشەلەنەدى.
ءۇش ءتىلدى ءبىلىم بەرۋ باعدارلاماسى بويىنشا ءدارىس الىپ جاتقان وقۋشىلار ءۇشىن لاتىن ءالىپبيى قازىردىڭ وزىندە كەڭىنەن قولدانىستا جانە بۇل ماسەلەگە جالپىحالىقتىق تۇرعىدا ۇلكەن دايىندىقپەن, زور ۇيىمداستىرۋ جۇمىستارى ناتيجەسىندە كەلەتىندىكتەن, اتالمىش الىپبيگە ءوتۋ بارىسىندا وقۋشىلار تاراپىنان اسا قاتتى قينالىس بولا قويمايدى دەپ سەنەمىز. بالاباقشالاردا جۇمىس جۇرگىزۋدىڭ دە وزىندىك جولىن, باعىت-باعدارىن بەلگىلەپ, سول ارقىلى مەكتەپكە دەيىنگى تاربيەدە بالانىڭ ساناسىنا, وي-تانىمىنا جاڭا ءالىپبيدىڭ نەگىزىن قالاپ جىبەرۋ باستى نازاردا.
لاتىن الىپبيىنە كوشۋ – قازاق حالقى ءۇشىن شىنايى رۋحاني جاڭعىرۋدىڭ كورىنىسى بولماق. بۇل – الەمدىك عالامتورلىق جانە اقپاراتتىق كەڭىستىككە ەنۋ, تاريحي, ادەبي-مادەني جاڭالىقتارعا قولجەتىمدىلىك, وتكەندى تانۋ جانە تاريحي نەگىزگە جاقىنداي ءتۇسۋ. سوندىقتان, ۇيىمداستىرۋ جۇمىستارىنا بارشامىز ءبىر كىسىدەي اتسالىسىپ, جاقسى ىسكە قولداۋ كورسەتۋدى ازاماتتىق پارىز سانايمىز.
مانەت شىراقباي,
«جاۋقازىن» بالالار باقشاسىنىڭ مەڭگەرۋشىسى,
تۇپقاراعان اۋداندىق ءماسليحاتىنىڭ دەپۋتاتى
ماڭعىستاۋ وبلىسى,
تۇپقاراعان اۋدانى
