ءوڭىردىڭ جالپى ءونىمى جارتى جىلدا 11 پايىزعا ءوسىپ, 990 ملرد تەڭگەنى قۇراعان. بۇل تۋرالى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا وبلىس باسشىسى التاي كولگىنوۆ باياندادى. سونىمەن قاتار ول كەلەسى جىلى ورالدىڭ اۋەجايى كۇردەلى جوندەۋدەن وتەتىنىن ايتىپ ءوتتى.
«اۋەجاي ماسلەسى وتە ماڭىزدى. ءبىز بۇل رەتتە اشىق اسپان قاعيداسىن قولدانۋىمىز قاجەت. ول ينۆەستيتسياعا دا جاقسى, سونىمەن قاتار ءبىزدىڭ جولاۋشىلارعا دا ءتيىستى قولايلى جاعداي تۋعىزۋعا مۇمكىندىك بەرەدى. وزدەرىڭىزگە بەلگىلى وسىدان ەكى جىل بۇرىن ۇشۋ-قونۋ جولى جوندەلدى. قازىرگى ۋاقىتتا ول ءتيىستى ستاندارتتارعا سايكەس كەلەدى. بۇرىن ۇزىندىعى 2 شاقىرىپ 400 مەتر بولاتىن بولسا, قازىر 2 شاقىرىم 800 مەتر. ياعني ۇشاقتى بارلىق تۇرلەرىن قابىلداي الادى. سونىمەن قاتار ەنى دە كەڭەيدى. ول بويىنشا ماسەلە جوق. بۇرىن قيىن بولاتىن. قازىرگى ۋاقىتتا تەرمينال تۋرالى ماسەلە تۋىنداپ تۇر. ول ەسكى. قىرىق جىلدان اسىپ كەتتى. قازىرگى زاماناۋي تالاپتارعا ول سايكەس كەلمەيدى. وعان تۇرعىندار تاراپىنان دا, جولاۋشىلار تاراپىنان دا كوپتەگەن شاعىمدار, سىني پىكىرلەر دە ءتۇسىپ جاتىر. ءبىز ونى قابىلدايمىز. جەكە كاسىپكەردىڭ قولىندا. بىراق ءبىز وعان دامۋ, ىلگەرىلەۋ بولۋى كەرەك دەگەن تالاپ قويىپ وتىرمىز. سول سەبەپتى ءبىز مەملەكەتتىك جەكە مەنشىك سەرىكتەستىكتىڭ اياسىندا سونى جاسايمىز. قازىرگى تاڭدا جوبالىق سمەتالىق قۇجاتتاما دايىندالۋدا. ول تەرمينالدى ءبىز كەڭەيتەمىز. ازاماتتاردىڭ ۇشۋ-قونۋ بولمەلەرى دۇرىستالادى. جۇك قابىلداۋ ورىندارى ءتيىستى دارەجە دە جوندەلەدى. بۇل جۇمىستار كەلەسى جىلى باستالاتىن بولادى. قاراجات كوزىن تاپتىق. ءبىزدىڭ نەگىزگى ماقساتىمىز ازاماتتارعا قولايلى جاعداي جاساۋ. حالىقارالىق رەيستەر اشىلدى. الداعى ۋاقىتتا ءبىز ونى كوبەيتەمىز», دەدى التاي كولگىنوۆ.
راۋان قايدار,
"ەگەمەن قازاقستان"
