تايىنشا اۋدانىندا تۇرعىنداردىڭ وي-پىكىرلەرى مەن تالاپ-تىلەكتەرى تىڭدالىپ, قىزمەت كورسەتۋ قىزمەتىنىڭ مولدىرلىگى مەن اشىقتىعى زەردەلەندى. ورتالىق اۋرۋحانانىڭ باس دارىگەرى اناتولي رافالسكي قىزمەت كورسەتۋدىڭ ەلەكتروندى تۇرىنە كوشكەلى قولجەتىمدىلىكتىڭ ارتا تۇسكەنىن جەتكىزدى.ەندى ناۋقاستار تىركەۋ بولىمىندە بۇرىنعىداي كەزەك كۇتىپ, سابىلىپ جۇرمەيدى. مۇندا سوزىلمالى دەرتكە ۇشىراعانداردى ساۋىقتىرۋعا ارنالعان «دەنساۋلىق بولمەسى» جۇمىس ىستەيدى. دەسەك تە, كەزدەسۋ بارىسىندا جۇرتشىلىقتىڭ مەملەكەتتىك قىزمەت كورسەتۋ ورىندارىنىڭ جۇمىسىنا اركەز كوڭىلدەرى تولا بەرمەيتىنى اڭعارىلدى.
ماسەلەن ءتورت ەلدى مەكەننىڭ باسىن توعىستىراتىن كەللەروۆكا اۋىلدىق اكىمدىگى تاراپىنان اتقارىلىپ جاتقان شارالار قاناعاتتاندىرا بەرمەيدى. سول سياقتى جامبىل اۋداندىق حالىققا قىزمەت كورسەتۋ ورتالىعىندا بىرقاتار ولقىلىقتاردىڭ ورىن العانى انىقتالىپ, الىس اۋىلداردان كەلەتىن ادامدار ءۇشىن بارلىق جاعدايدى جاساۋ, ەلەكتروندى قىزمەتتى جەتىلدىرۋ قاجەتتىگى اتاپ كورسەتىلدى.
مامليۋت اۋدانىنىڭ تۇرعىندارى ەمتيحان الۋ-تىركەۋ جانە كوشى-قون بولىمدەرىنىڭ جۇمىستارىنداعى قاعازباستىلىققا شاعىمدانىپ, قولايلى مۇمكىندىكتەر كورسەتىلسە دەگەن وتىنىشتەر ءبىلدىردى. اليك شپەكباەۆ استانادا بۇل قىزمەت تۇرلەرى حالىققا قىزمەت كورسەتۋ ورتالىقتارىنا بەرىلگەلى قىزمەت ساپاسىنىڭ نىعايعانىن, سوندىقتان بۇل ماسەلە توڭىرەگىندە ويلاسۋ قاجەتتىگىن العا تارتتى.
«سەۆكازەنەرگوسبىت» جشس باس ديرەكتورىنىڭ مىندەتىن اتقارۋشى ماعاۋيا ساعىندىقوۆ جەتىلدىرىلگەن قىزمەت تۇرلەرى بارلىق سالادا قولدانىلاتىنىن اڭگىمەلەپ بەردى. ايىنا 25 مىڭنان استام تۇتىنۋشى كومپانيا قىزمەتىنە جۇگىنەدى. ساll-ورتالىعى, ونلاين جۇيەسى دەمالىسسىز جۇمىس ىستەيدى.
№1 حالىققا قىزمەت كورسەتۋ ورتالىعىنىڭ جۇمىسى دا تالاپقا ساي ۇيىمداستىرىلعان. مۇندا 500-دەن استام مەملەكەتتىك قىزمەت ءتۇرى كورسەتىلەدى. وسى جەردە وبلىس ورتالىعىنداعى 3 حالىققا قىزمەت كورسەتۋ ورتالىعىن ءبىر جەرگە بىرىكتىرۋ جايلى ۇسىنىستار ايتىلىپ, ەسكەرىلەتىن بولدى.
سىبايلاس جەمقورلىقتىڭ الدىن الۋ جونىندەگى ۆەدومستۆوارالىق كوميسسيانىڭ كەزەكتەن تىس وتىرىسىنا اگەنتتىك توراعاسىنىڭ ورىنباسارى ا. شپەكباەۆ, مونيتورينگتىك توپتىڭ مۇشەلەرى, اۋماقتىق, جەرگىلىكتى اتقارۋشى ورگانداردىڭ باسشىلارى مەن وكىلدەرى قاتىسىپ, مەملەكەتتىك قىزمەت كورسەتۋ ساپاسىن ارتتىرۋ جايى جان-جاقتى تالقىلاندى. جيىندى ايماق باسشىسى قۇمار اقساقالوۆ كىرىسپە سوزبەن اشىپ, كەز كەلگەن قۇقىق بۇزۋشىلىقتاردىڭ جولىن كەسۋ, بولدىرماۋ باسىم باعىت بولىپ قالا بەرەتىنىن اتاپ كورسەتتى.
ا.شپەكباەۆ اۋداندار مەن مەكەمەلەردە ىشكى تالداۋ جۇيەسىن جۇيەلى جۇرگىزۋ ارقىلى جەمقورلىق سيپاتتاعى كەلەڭسىز كورىنىستەردى انىقتاۋ جاعىنا ەرەكشە توقتالىپ, زاڭ تالاپتارىن مۇلتىكسىز ورىنداۋعا قاتىستى بىرقاتار تاپسىرمالار جۇكتەدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
